ხუთი ნაცემი ოპოზიციონერი შვიდ დღეში - ჯავახეთი წინასაარჩევნოდ ცხელ წერტილად იქცა

ჯავახეთში წინასაარჩევნო ვითარება კვლავ დაძაბული რჩება. ბოლო ერთი კვირის განმავლობაში აქ საავადმყოფოში ხუთი ადამიანი მოხვდა – ხუთივე ოპოზიციის წევრი და ხუთივე ხელკეტებით ნაცემი.

ყველა საქმეში ერთი ადამიანის გვარი ფიგურირებს –  მმართველი პარტიის, “ქართული ოცნების” წევრის, საქართველოს პარლამენტის დეპუტატის ენზელ მკოიანის. 

_______________

ახალქალაქში უცნობები ოპოზიციის მხარდამჭერს, ადგილობრივ მკვიდრს რემიკ პოღოსიანს დაესხნენ თავს.

პოღოსიანი ქალა-ტვინის ტრავმით ახალქალაქის საავადმყოფოში მოხვდა.

პოღოსიანზე თავდასხმა მას შემდეგ მოხდა, რაც მან ინტერვიუ მისცა ტელეკომპანია “რუსთავი 2-ს” და ადგილობრივი მაჟორიტარი დეპუტატის, მმართველი პარტიის “ქართული ოცნების” წევრის ენზელ მკოიანის ბიზნესებსა და კორუფციულ საქმიანობაზე ილაპარაკა.

•  როგორ აირჩიეს ნინოწმინდაში პრეზიდენტად სააკაშვილი

• საპრეზიდენტო არჩევნები საქართველოში. რატომ ლაპარაკობს ხელისუფლება სამოქალაქო ომზე?

• 25 ფოტო ჯავახეთიდან, საქართველო: სოფლები, ჩიტები, ტბები

• ჯავახეთში ყინულის დნობა დაიწყო. ვის აძლევს ხმას ეროვნული უმცირესობა?

• დერეფანი. JAMnews-ის სპეცპროექტი ჯავახეთიდან მიგრირებული ფრინველებისა და ადამიანების შესახებ  

პოღოსიანმა “რუსთავი 2”-ის ინტერვიუში თქვა, რომ ენზელ მკოიანი მთელს რეგიონს აკონტროლებს, მისი საკუთრებაა თითქმის ყველა მსხვილი ბიზნესი და კარტოფილის ფასსაც კი ხელოვნურად არეგულირებს, რის გამოც ბევრი ადგილობრივი ფერმერი ზარალდება.

ორი დღეც არ გასულა ამ ინტერვიუდან და რემიკ პოღოსიანს სოფელ ჩანდურაში თავს დაესხნენ. როგორც “რუსთავი 2” გადმოსცემს, ის ხელკეტებითაა ნაცემი.

სამი განსხვავებული ვერსია

მომხდართან დაკავშირებით რეგიონში სამი სხვადასხვა ვერსია ვრცელდება:

1) ახალქალაქში ოპოზიციური “ნაციონალური მოძრაობის” შტაბის ხელმძღვანელი აშოტ რაისიანი, ამბობს რომ პოღოსიანი „ოცნების“ აქტივისტებმა სცემეს და ამ საქმეში ენზელ მკოიანის ხელი ურევია.

2)  ენზელ მკოიანი ინციდენტთან ყველანაირ კავშირს უარყოფს. „ოცნების“ წევრები აცხადებენ, რომ დაპირისპირება სოფელ ჩანდურაში ადგილობრივ ფეხბურთის გუნდებს შორის მატჩის დროს მოხდა, რა დროსაც პოღოსიანი დაზიანდა. პოლიტიკა ამ ფაქტთან კავშირში არაა და ყველაფერი რუსთავი2-მა გააბუქა, აცხადებს ახალქალაქში სალომე ზურაბიშვილის შტაბის უფროსი ნაირი ირიციანი.

3) თავად დაზარალებული პოღოსიანი, რომელიც საავადმყოფოშია, საერთოდაც უარყოფს მასზე თავდასხმის ფაქტს. როგორც ადგილობრივი ვებ-გვერდი “სამხრეთის კარიბჭე” წერს, პოღოსიანმა მასთან დაკითხვაზე  მისულ პოლიციელებს უთხრა, რომ სახლში შეშას ჩეხავდა და ამ პროცესის დროს დაზიანდა.

“გამოკითხვისას განაცხადა, რომ ჩეხავდა შეშას, დაუსრიალდა ფეხი, დაარტყა თავი და დაზიანებები ამ დროს მიიღო”, – განუცხადეს “სამხრეთის კარიბჭეს” შსს–ში.

ამასთან, შინაგან საქმეთა სამინისტრო მომხდარს სისხლის სამართლის კოდექსის 126-ე მუხლით იძიებს, რაც ცემას გულისხმობს.

ჯავახეთი – ყველაზე ცხელი წერტილი წინასაარჩევნოდ

ეს პირველი შემთხვევა არ არის, როდესაც წინასაარჩევნო პერიოდში ჯავახეთში თავს დაესხნენ ოპოზიციის წარმომადგენლებს.

30 ოქტომბერს ახალქალაქში ასევე ხელკეტებით სცემეს გაერთიანებული ოპოზიციის “ძალა ერთობაშია” კანდიდატის გრიგოლ ვაშაძის საარჩევნო შტაბის ოთხი წევრი. ოთხივეს სერიოზული ტრავმები ჰქონდა – ისინი ამ დრომდე საავადმყოფოში რჩებიან.

ორივე ეს ინციდენტი ერთ სახელს – ენზელ მკოიანს უკავშირდება.

ოპოზიციის განცხადებით, ორივე თავდასხმა ენზელ მკოიანის მიერაა ორგანიზებული.

2 ნოემბერს პროკურატურამ ამ საქმესთან დაკავშირებით ხუთ ადამიანს წარუდგინა ბრალი ჯგუფურ თავდასხმაში. აქედან სამნი საქართველოს პარლამენტის წევრის, ენზელ მკოიანის ნათესავები არიან. სასამართლომ ბრალდებულები სამი ათას ლარიანი (ათას დოლარზე ცოტა მეტი) გირაოთი გაათავისუფლა.

ვინ არის ენზელ მკოიანი

ამჟამად ენზელ მკოიანი მმართველი პარტიის “ქართული ოცნების” წევრი და საქართველოს პარლამენტის მაჟორიტარი დეპუტატია ნინოწმინდიდან და ახალქალაქიდან.

ენზელ მკოიანი რეკორდსმენია – უკვე 19 წელია ის  საქართველოს პარლამენტის წევრია. ამ ხნის განმავლობაში ის უკლებლივ ყველა მმართველი პარტიის წევრი და მთავარი დასაყრდენი იყო ჯავახეთის რეგიონში.

სააკაშვილის მმართველობის დროს ის “ნაციონალური მოძრაობის” შემადგენლობაში იყო და ყველა არჩევნებზე რეგიონიდან მმართველი პარტიის სასარგებლოდ ამომრჩეველთა ხმების მაღალ პროცენტს უზრუნველყოფდა.

ივანიშვილის ხელისუფლებაში მოსვლისთანავე კი მკოიანი “ქართულ ოცნებაში” გადაბარგდა და ახლა რეგიონში “ქართული ოცნების” ინტერესებს იცავს.

ზოგადად, ჯავახეთი, სადაც მოსახლეობის 90 პროცენტზე მეტი ეთნიკურად სომეხი მოსახლეობა ცხოვრობს, ქართული ენის არცოდნის გამო, ტრადიციულად პოლიტიკურად პასიურია.

აქ ყველა არჩევნებზე ხმების დიდი ნაწილი ხელისუფლების ყულაბაში ვარდება და ამის ერთ-ერთი მიზეზი ერთად ენზელ მკოიანია, რომელიც წლებია განაგებს რეგიონს როგორც ადგილობრივი ფეოდალი.

აქამდე არც ერთ ხელისუფლებას უარი არ უთქვამს მკოიანის დახმარებასა და “ერთგულებაზე”, რადგან ყველა აცნობიერებს მის რესურსს რეგიონში.

მით უფრო, მკოიანის მხარდაჭერაზე უარს არ ამბობს “ქართული ოცნება”, რომელსაც საპრეზიდენტო არჩევნების მეორე ტურისთვის საკმაოდ მძიმედ აქვს საქმე – პირველი ტური სახელისუფლებო კანდიდატმა სალომე ზურაბიშვილმა თითქმის ყველა დიდ ქალაქში წააგო. ეთნიკური უმცირესობებით დასახლებული რეგიონები (ჯავახეთი  და ასევე, ქვემო ქართლი, სადაც ეთნიკურად აზერბაიჯანული მოსახლეობა ცხოვრობს) “ქართული ოცნების” უმნიშვნელოვანესი დასაყრდენია. პირველ ტურში აქ მათ ხმების ყველაზე დიდი პროცენტი მოაგროვეს.

ოპოზიციონერი დეპუტატების ცემის შემდეგ ოპოზიცია მკოიანისთვის სადეპუტატო მანდატის შეჩერების მოთხოვნით გამოვიდა. თუმცა, პასუხად მმართველი გუნდისგან მტკიცე უარი მიიღო.

პირიქით, პარლამენტის თავმჯდომარემ ირაკლი კობახიძემ პარტიის სახელით სრული ნდობა და მხარდაჭერა გამოუცხადა მკოიანს და თქვა, რომ იგი “მმართველი გუნდის ღირსეული წევრია”.