ცხინვალის მეჯლისის ტენდენციები

ცხინვალში 2016 წლის სკოლადამთავრებულთა გამოსაშვები მეჯლისი გაიმართა. ქალაქის მთავარ მოედანზე 400-მდე სკოლადამთავრებულმა მოიყარა თავი. ზოგი მშობლებთან ერთად მივიდა.  

 ბევრ მოქალაქეს უბრალოდ ლამაზი სანახაობის ნახვა სურდა და მათ იმედი არ გაცრუებიათ.

ფასონები

თუკი ადრე სკოლადამთავრებულები საბალეტის გრძელ, თეთრ კაბებს ანიჭებდნენ უპირატესობას, რის გამოც, გამოსაშვები საღამო პატარძლების აღლუმს ჰგავდა ხოლმე, ამჯერად მეჯლისი ნამდვილ სილამაზის კონკურსს მოგაგონებდათ.

 სითამამის ხარისხი

ამ დღეს თითქმის ყველა სკოლადამთავრებულმა გოგონამ გრძელი კაბის ჩაცმა არჩია; მოკლე კაბა მხოლოდ რამდენიმეს ეცვა. ღია მხრებითა და ზურგით კი წვეულებაზე გოგონების თითებზე ჩამოსათვლელი რაოდენობა გამოცხდდა – სულ ხუთი.

ფერთა გამა

წელს უპირობოდ ლიდერობდა წითელი ფერი, რომელიც მეჯლისის მონაწილე გოგონების უმრავლესობამ არჩია.
ზოგიერთმა სკოლადამთავრებულმა აღნიშნა, რომ კაბის შერჩევისას საყვარელ ფერებზე – ცისფერზე, მწვანეზე, ჩალისფერზე მოუხდათ უარის თქმა.

თუმცა ბევრი აღიარებს, რომ კაბის შერჩევისას გადამწყვეტი კრიტერიუმი ის არის, თუ რამდენად კარგად “გადგას” ტანზე და რამდენად უკეთეს “ტანს გიჩენს”. სწორედ ამ მიზეზით შეარჩია ბევრმა გოგონამ შავი კაბა.

ვარცხნილობები

 ამ სეზონზე მოდაშია დახვეული ან ერთ კონად შეკრული ვარცხნილობა. ორივე ვარიანტისთვის გრძელი თმაა საჭირო. სხვათა შორის, სამხრეთ ოსეთში მცხოვრები სკოლადამთავრებული გოგონებისათვის ეს პრობლემას არ წარმოადგენდა. ბევრი მათგანი ოსური ცეკვის სხვადასხვა ანსამბლის წევრია და გრძელი თმა  მათთვის აუცილებელი ატრიბუტია.

აქსესუარები

ცხინვალში თითქმის ყველა სკოლადამთავრებულ გოგონას დიადემა და გრძელი, “კონწიალა” საყურე ეკეთა და “კლაჩი”  ჩანთა ეკავა.

ასევე – თმაში ჩაწნული ყვავილები და ხელებზე სამაჯურები.

ჭაბუკების არჩევანი

გამოსაშვები მეჯლისისათვის თითქმის ყველა ჭაბუკმა ევროპული კოსტიუმი და ჰალსტუხი აირჩია. ბაფთა  მხოლოდ რამდენიმეს ეკეთა. ჭარბობდა კონსერვატიული ფერის (შავი, მუქი ლურჯი) კოსტუმები. ღია ფერები ერთმნიშვნელოვნად უმცირესობაში აღმოჩნდა.

ფასები

ნინა ჩოჩიევა, სკოლადამთავრებულის დედა:

“ჩემი ვაჟის თანაკლასელების მშობლებისგან ვიცი, რომ გამოსაშვები საღამოს ტანსაცმელი გოგონებისთვის ძალიან ძვირია. ყველაფერს ვლადიკავკაზში ყიდულობენ, რადგან იქ უფრო დიდი არჩევანია.

კაბის ფასები 8-დან 20 ათას რუბლამდე [$120-$300] მერყეობს, ფეხსაცმელი 4-5 ათასი [დაახლოებით $80] ღირს. გარდა ამისა, ბიჟუტერიაც ხომ საჭიროა!

ცხინვალში ვარცხნილობის გაკეთება 1,5-2 ათასი რუბლი [დაახლოებით $30] ღირს.

მე ვაჟი მყავს და ჩემთვის ყველაფერი უფრო მარტივადაა. თან კოსტუმის არჩევისას გაგვიმართლა. ჩემს შვილს რაღაც გამორჩეული სურდა. საყიდლებზე, მშობლების უმრავლესობის მსგავსად, გამოსაშვებ საღამომდე დიდი ხნით ადრე ჩავედით ვლადიკავკაზში. ბოლო ოქროსფერი კოსტუმი ჩაგვივარდა ხელში – ყავისფერი ელფერი დაჰკრავდა. 8 ათასად დაგვითმეს [დაახლოებით [$120] ფეხსაცმელი 4 ათასად ვიყიდეთ [დაახლოებით $60], პერანგი კი 2500 რუბლი [დაახლოებით $40] დაგვიჯდა.”

• სამხრეთ ოსეთში წელს ატესტატი 489 სკოლადამთავრებულმა მიიღო, მათგან 368 მოსწავლემ ქალაქის სკოლა დაამთავრა, 121-მა კი საშუალო განათლება რაიონებში მიიღო.
• 2015 წელთან შედარებით, წელს სკოლადამთავრებულთა რიცხვი 14 ადამიანით მეტია.

სტატიაში გამოთქმული მოსაზრებები, ტერმინები და პოზიცია მთლიანად ავტორს ეკუთვნის და, შესაძლოა, რედაქციის აზრს არ ემთხვეოდეს