სომხეთში სტუდენტებმა შეწყვიტეს საპროტესტო აქცია, რომელიც ერთი კვირა გრძელდებოდა
ფოტო და ვიდეო: სედა გრიგორიანი, JAMnews
სტუდენტებმა შეწყვიტეს ჯარში გაწვევის გადავადების უფლების შეზღუდვის წინააღმდეგ საპროტესტო აქცია, რომელიც მათ ერთი კვირის წინ წამოიწყეს. მათ განაცხადეს, რომ მოცემული მომენტისთვის ქუჩის ბრძოლები წყდება და მრგვალი მაგიდის გარშემო მოლაპარაკებები იწყება.
სომხეთის სხვადასხვა უმაღლესი სასწავლებლის სტუდენტები შვიდი დღის განმავლობაში აწყობდნენ გაფიცვას, გუშინ კი ხუთი მათგანი ერევნის სახელმწიფო უნივერსიტეტის ერთ-ერთ აუდიტორიაში ჩაიკეტა და შიმშილობა გამოაცხადეს.
ადრე JAMnews-მა სტუდენტების ბრძოლის შესახებ გამოაქვეყნა ინფორმაცია, სადაც მომხრეების არგუმენტები წარმოადგინა.
https://jam-news.net/?p=68516&lang=ka
სტუდენტები მოითხოვენ, რომ მოქმედი კანონი შეუცვლელად შენარჩუნდეს, და ისინი, ვისაც 18 წელი შეუსრულდა და უფასოდ (ანუ მაღალი მოსწრებით) სწავლობს, ჯარში მხოლოდ უმაღლესი სასწავლებლის დამთავრების შემდეგ გაიწვიონ. მთავრობის მიერ შეთავაზებული ახალი კანონპროექტის თანახმად, გადავადების უფლებას მხოლოდ ის სტუდენტები მიიღებენ, რომლებიც ხელს მოაწერენ თავდაცვის სამინისტროსთან შეთანხმებას იმის თაობაზე, რომ უმაღლესი სასწავლებლის დასრულების შემდეგ სამხედრო სამსახურს გაივლიან, თანაც – ჩვეულებრივ ვადაზე ერთი წლით მეტ ხანს, ანუ სამი წლის განმავლობაში.
დღეს სტუდენტების საპროტესტო აქცია ეროვნული საკრებულოს შენობის წინ გრძელდებოდა. სტუდენტები თავიანთი მოთხოვნის – „გადავადება იქნება“ – სკანდირებას ჯერ ისევ აგრძელებდნენ, როდესაც პარლამენტმა კანონში შესატანი ცვლილებები მეორე მოსმენით საბოლოოდ დაამტკიცა – ამ პროექტის წინააღმდეგ ხმა მხოლოდ 6-მა დეპუტატმა მისცა.
ახალგაზრდებმა მოითხოვეს, რომ დეპუტატები გასულიყვნენ, დალაპარაკებოდნენ და მათი წინადადებები მოესმინათ. ამის ნაცვლად, ვიცე-სპიკერმა ისინი პარლამენტის შენობაში მიიწვია. ვიცე-სპიკერთან ერთად საკითხის განსახილველად საპროტესტო აქციის ხუთი მონაწილე გაეშურა.
მანამდე დემონსტაციის მონაწილეებსა და პოლიციის წარმომადგენლებს შორის შეტაკებები მოხდა – პოლიციაში განაცხადეს, რომ აქციის მონაწილეთა მიერ გადაკეტილი საგზაო მოძრაობის აღდგენის მიზნით, მათ მიმართ პროპორციული ძალა გამოიყენეს.
ინციდენტის შედეგად დააკავეს აქციის მონაწილე რობერტ გრიგორიანი. მოგვიანებით პოლიციაში აღნიშნეს, რომ ახალგაზრდა საგამოძიებო სამსახურში აღძრული სისხლის სამართლის საქმის ფარგლებში დააკავეს. პოლიციას არ უცნობებია, თუ რა სისხლის სამართლის საქმეზე იყო ლაპარაკი.
ვიცე-სპიკერთან შეხვედრის შემდეგ სტუდენტებმა განაცხადეს, რომ დროებით წყვეტენ გაფიცვასა და შიმშილობას, რათა მოლაპარაკებები მრგვალი მაგიდის გარშემო გაგრძელდეს.
„ვცდილობთ. შეძლებისდგვარად კონსტრქციულები ვიყოთ. მოცემულ მომენტში მიგვაჩნია, რომ ეს ჩვენთვის ხელმისაწვდომი ვარიანტებიდან საუკეთესოა და მსურველებს შეუძლიათ შემოგვიერთდნენ. გაფიცვა და შიმშილობა უნდა შევწყვიტოთ და მრგვალი მაგიდისთვის მოვემზადოთ. რაც მრგვალი მაგიდის შემდეგ იქნება, იქნება მრგვალი მაგიდის შემდეგ“, – თქვა დავიდ პეტროსიანმა, რომელიც დეპუტატებთან შეხვედრას ესწრებოდა.
მან ჟურნალისტებს გადასცა, თუ რა მიდგომა აქვს ამასთან დაკავშირებით ეროვნული საკრებულოს სპიკერს არა ბაბლოიანს:
ბატონმა ბაბლოიანმა აღნიშნა: “თუ ჩვენ დავამტკიცებთ, რომ გადავადების უფლების შეზღუდვის შესაბამისი ვითარება – არასწორი გადაწყვეტილებაა, ისინი, შესაძლოა, ცვლილებებზე წავიდნენ. ასევე მან ოფიციალურად განაცხადა, რომ იმ სტუდენტებზე, რომლებიც გაფიცვაში მონაწილეობდნენ, ზეწოლა არ განხორციელდება“, – თქვა დავიდ პეტროსიანმა.
