სამუდამო პატიმრობამისჯილი ტერორისტი, რომელიც მხილებას აპირებდა, სომხეთის ციხეში გარდაიცვალა
გარდაიცვალა ედუარდ გრიგორიანი, რომელსაც 1999 წლის 27 ოქტომბერს პარლამენტის შენობაში მომხდარ ტერაქტში მონაწილეობისთვის სამუდამო პატიმრობა ჰქონდა მისჯილი. ამ დღეს ექიმმა ედუარდ გრიგორიანმა შეიარაღებულ პირთა ჯგუფთან ერთად, რომელსაც ნაირი უნანიანი ხელმძღვანელობდა, ეროვნული საკრებულოს შენობაში შეაღწია. სროლის შედეგად დაიღუპა 8 ადამიანი, მათ შორის სომხეთის პრემიერ-მინისტრი, პარლამენტის სპიკერი, მისი მოადგილეები და დეპუტატები.
გასულ წელს ედუარდ გრიგორიანი საზოგადოებას დაჰპირდა, რომ მოუყვებოდა მათ იმას, რაც 27 ოქტომბერთან დაკავშირებით მათთვის დამალული იყო.
3 ოქტომბერს სასჯელაღსრულებითი დაწესებულებიდან პრესამ მიიღო შეტყობინება, რომ ედუარდ გრიგორიანს ღამით გულის არეში მწვავე ტკივილი დაეწყო. სასწრაფო დახმარებამ ის საავადმყოფოში გადაიყვანა, სადაც ის გარდაიცვალა.
თუმცა, ედუარდ გრიგორიანის მამა – გარეგინ გრიგორიანი ამტკიცებს, რომ მისი ვაჟი მოკლეს.
„პატიმრები დაგვიკავშირდნენ და შეგვატყობინეს, რომ ედუარდს გუშინ ღამით ორი ძლიერი გულის შეტევა ჰქონდა. ის საავადმყოფოში დილით გადაიყვანეს, როდესაც მას შეტევა გაუმეორდა. მიიყვანეს საავადმყოფოში და გარდაიცვალა. ეს ყველაფერი სხვა პატიმრებისგან შევიტყვე.
ეს ნიშნავს, რომ მოკლეს. საავადმყოფოში ადრე რომ მიეყვანათ, მის გადარჩენას შეძლებდნენ. ნებისმიერ შემთხვევაში, ეს მათი დაუდევრობის შედეგია. სასწრაფო დახმარების ექიმმა თქვა, რომ საჭირო იყო მისი საავადმყოფოში გადაყვანა, მას კი უპასუხეს, რომ ციხის უფროსი უფლებას არ იძლეოდა“, – განაცხადა გარეგინ გრიგორიანმა.
მან აღნიშნა, რომ გაკვეთის შემდეგ სიკვდილის მიზეზი დადგინდება, და დასძინა, რომ მის ვაჟს გულის იშემიური დაავადება ჰქონდა – მისი აზრით, ეს ინფარქტი იყო.
2013 წელს ედუარდ გრიგორიანმა გულის ოპერაცია გადაიტანა. ამ ოპერაციის ჩასატარებლად თანხა სომხეთის ყოფილმა პრემიერ-მინისტრმა, საზოგადოებრივი საბჭოს ხელმძღვანელმა ვაზგენ მანუკიანმა გაიღო.
ედუარდ გრიგორიანამდე ტერაქტის მონაწილე და 27 ოქტომბრის საქმის მოწმე კიდევ 8 ადამიანი დაიღუპა. სომხეთის მედიამ 4 ოქტომბერს იმ ადამიანების სია გამოაქვეყნა, რომლებიც საეჭვო ვითარებაში დაიღუპნენ.
2000 წელს სასჯელაღსრულებით დაწესებულებაში, საკუთარ საკანში, ოფიციალური მონაცემებით, დენის დარტყმით გარდაიცვალა მოწმის სახით ამ საქმესთან კავშირში მყოფი ნორაირ ეგიაზარიანი, რომელიც სპეციალობით ელექტრიკოსი იყო. სასამართლო-სამედიცინო ექსპერტიზის თანახმად, ეგიზარიანი 220 ვოლტისგან დაიღუპა. ამავდროულად, პრესაში გამოქვეყნებული პუბლიკაციების მიხედვით, ნორაირ ეგიაზარინს თვზე დარტყმების კვალი აღმოაჩნდა, რაც ოფიციალურად არ დადასტურდა.
მოგვიანებით, 2004 წელს, ოფიციალური ცნობის მიხედვით, საკუთარ საკანში თავი მოიკლა 27 ოქტომბრის ტერაქტის მონაწილემ ვრამ გალსტიანმა, რომელსაც სამუდამო პატიმრობა ჰქონდა მისჯილი. სასამართლო განხილვის მიმდინარეობისას ვრამ გალსტიანი პერიოდულად აცხადებდა, რომ მას ფსიქოტროპულ პრეპარატებს უკეთებდნენ და ყველანაირად უბიძგებდნენ სუიციდისკენ, რათა ადამიანებს სიმართლე არ გაეგოთ.
2010 წლის მაისში იმავე სასჯელაღსრულებით დაწესებულებაში გარდაიცვალა ჰამლეტ სტეპანიანი, რომელსაც 27 ოქტომბრის საქმესთან დაკავშირებით 14 წლით პატიმრობა ჰქონდა მისჯილი. მისი პატიმრობის ვადა ორ წელიწადში იწურებოდა. წინასწარი დასკვნის მიხედვით, 57 წლის ჰამლეტ სტეპანიანის სიკვდილის მიზეზი გულის შეტევა გახდა. თუმცა, მისი დამცველები ამტკიცებდნენ, რომ სტეპანიანს მანამდე გულის პრობლემები არ ჰქონია.
ჟურნალისტი, საზოგადოებრივი ტელევიზიის საბჭოს თავმჯდომარე, ტიგრან ნაგდალიანი, რომელიც ნაირი უნანიანს ახლოს იცნობდა და 27 ოქტომბრის საქმის მოწმე იყო, 2002 წელს ერევანში თავისი მშობლების სახლიდან გამოსვლისას მოკლეს.
2004 წელს აპარან-ერევანის ავტოსტრადაზე ავარიაში მოყვა ეროვნული საკრებულოს დეპუტატი მუშეგ მოვსესიანი. თვის დროზე ის 27 ოქტომბრის საქმეზე დააკავეს და გარკვეული დროის შემდეგ გაათავისუფლეს. ავარიის შემდეგ მას რამდენიმე ოპერაცია ჩაუტარადა, თუმცა მოვსესიანი გონებაზე მოუსვლელად დაიღუპა.
იმავე 2004 წელს ასევე ავარიის შედეგად აშშ-ში დაიღუპა ამ საქმის მოწმე, ეროვნული საკრებულოს ყოფილი მედდა როზა ოგანესიანი – ტერაქტის დღეს ის პარლამენტში იმყოფებოდა.
2004 წელს ეროვნული საკრებულოს შენობაში თავი ჩამოიხრჩო პარლამენტის ოქმების განყოფილების თანამშრომელმა ქალმა, 45 წლის ასმიკ აბრამიანმა. ის ასევე ამ საქმის მოწმეთაგანი იყო.
2014 წელს აშშ-ში ერთ-ერთი მთავარი მოწმე დაიღუპა. სომხეთის ეროვნული ტელევიზიის კორესპონდენტი და კომენტატორი, ნაირი უნანიანის ახლო მეგობარი, ტიგრან ნაზარიანი, რომელიც ტერაქტის დღეს ეროვნული საკრებულოს დარბაზში შევიდა და შეიარაღებული ჯგუფის მეთაურს 2 საათის განმავლობაში ესაუბრებოდა.
