სომხეთს დეფოლტი არ ემუქრება - ირწმუნება ქვეყნის ცენტრალური ბანკი

სომხეთიდან ფულის გადინება არ ხდება და არც ყოფილა. ეს კი იმას ნიშნავს, რომ დეფოლტის არავითარი საფრთხე არ არსებობს. ამის შესახებ ცენტრალური ბანკის წარმომადგენლებმა განაცხადეს.

რის შესახებ იუწყებოდა მედია?

სომხეთის მასობრივი საინფორმაციო საშუალებები ადრე იუწყებოდნენ, რომ ქვეყანას დეფოლტი ემუქრება, და სომხური დრამის კურსის ვარდნას წინასწარმეტყველებდნენ.

 „მოსალოდნელია, რომ „დღესასწაულის დასრულებისთანავე“ სომხეთის ეკონომიკა სერიოზულ პრობლემებს წააწყდება, ხელისუფლება კი „იძულებული გახდება, ეროვნული ვალუტის კურსის 20%-იან დევალვაციაზე წავიდეს“, – წინასწარმეტყველებდა გაზეთი „ჟამანაკი“ [„დრო“].

სომხეთის საინფორმაციო რესურსები ასევე იუწყებოდნენ, რომ სომხეთიდან კაპიტალის გადინება და ქვეყანაში ტრანსფერტების მოცულობის შემცირება შეინიშნება.

• რატომ აღარ არის სომეხი მუშახელისთვის ხელსაყრელი რუსეთში გამგზავრება?  

• რა შეიცვალა სომხეთის ეკონომიკაში ნიკოლ ფაშინიანის ხელისუფლებაში ყოფნის პირველ 100 დღეში

• სომხეთის ათი მოქალაქიდან სამი ღარიბია

ცენტრალური ბანკის რეაქცია

მედიის ამ ცნობებს მაშინვე მოჰყვა რეაქცია სომხეთის ცენტრალური ბანკის მხრიდან, რომელმაც ეს ინფორმაცია უარყო.

 „სომხეთის ფინანსური სისტემა დღეს სტაბილური და მდგრადია. მსგავს განცხადებებს და პუბლიკაციებს საზოგადოებაში უსაფუძვლო შფოთვის გამოწვევა შეუძლია, რაც ქვეყნის გრძელვადიანი განვითარების თვალსაზრისით უადგილოა“, – აღნიშნა ცენტრალური ბანკის პრეს-მდივანმა არუტ კბეიანმა.

ამ სიტუაციის შესახებ კომენტარი გააკეთა ასევე სომხეთის ცენტრალური ბანკის საბჭოს წევრმა არტურ სტეპანიანმა. მან უარყო ინფორმაცია, თითქოს სომხეთიდან კაპიტალი გაედინება. ხოლო ფულადი ტრანსფერტების ნაკადის შემცირება, მისი აზრით, სომხეთის ეკონომიკაზე მნიშვნელოვან გავლენას ვერ მოახდენს:

 „სომხეთის ეკონომიკისთვის ტრანსფერტების მნიშვნელობა არც ისე დიდია, როგორც -10 წლის წინათ. თუკი მაშინ ფულადი გადარიცხვები მთლიანი შიდა პროდუქტის 20-26%-ს შეადგენდა, შემდეგ კი დროთა განმავლობაში 17-18%-მდე დავიდა, ახლა ეს მაჩვენებელი დაახლოებით 10%-ის დონეზეა“.

ექსპერტების აზრები

სომეხი ექსპერტები ასევე აღნიშნავენ, რომ უახლოეს ხანში ქვეყნის ეკონომიკას არაფერი ემუქრება. მათი აზრით, რევოლუციამ ეკონომიკური ზრდის ტემპებზე გავლენა მოახდინა, თუმცა ახალმა ხელისუფლებამ მნიშვნელოვანი სტრესების თვიდან აცილება შეძლო.

ეკონომისტი ვარდან ბოსტანჯანიანი მიიჩნევს, რომ ამ მომენტში დეფოლტზე ლაპარაკი უაზრობაა:

„რესპუბლიკაში არსებული ეკონომიკური სიტუაცია ღელვის საფუძველს არ იძლევა. მოსალოდნელია 5-პროცენტიანი ეკონომიკური ზრდა, ბიუჯეტის საშემოსავლო ნაწილი წარმატებით სრულდება, მოსალოდნელია  დაგეგმილზე დაბალი დეფიციტი, ფინანსური ბაზარი სტაბილურია. ინფლაციის დონე ყველაზე დაბალი ნიშნულის ქვევით არის დაფიქსირებული, და 1,8%-ის ფარგლებში მერყეობს. „ხავერდოვანი“ რევოლუციის დღეებშიც კი ფინანსური დესტაბილიზაცია არ შეინიშნებოდა, თუმცა მსგავს სიტუაციებში ეს მოსალოდნელი და სრულიად კანონზომიერია.“

ვარდან ბოსტანჯანიანის მოსაზრებას მეორე ეკონომისტი აიკ მნაცკანიანიც იზიარებს. ის დარწმუნებულია, რომ,  დრამის კურსის ვარდნის თაობაზე არსებული ცნობების მიუხედავად, სომხური ვალუტის კურსი სტაბილურობას შეინარჩუნებს:

„ასეთი მოლოდინი არ არსებობს, და უახლოეს ხანში არც შეიძლება იყოს. შესაბამისად, მოქალაქეებს სამომავლოდ შეუძლიათ მშვიდად იყვნენ. კაპიტალის გადინება და შემოდინება სტაბილურ დონეზე ნარჩუნდება“.

The Economist։ სომხეთი – წლის ქვეყანა

ვიდრე სომხეთის მედია შესაძლო დეფოლტის შესახებ წერდა, ავტორიტეტულმა გამოცემამ TheEconomist სომხეთი „წლის ქვეყანად“ აღიარა:

 „უძველესმა  და ხშირად ცუდად მართულმა ქვეყანამ, რომელიც არცთუ მშვიდ რეგიონში მდებარეობს, ამ წელს უჩვენა, რომ დემოკრატიის და განახლების შანსი აქვს. ამ მიზეზით, სომხეთი ჩვენი „წლის ქვეყანა“ გახდა.

წლის ქვეყანად ყოველწლიურად აღიარებენ არა ყველაზე გავლენიან სახელმწიფოს, არა ყველაზე მდიდარს და არა ყველაზე გემრიელი საჭმლის მქონეს… ეს პროგრესის აღნიშვნისკენაა მოწოდებული“.

The Economist-ის ამ გადაწყვეტილების მიზეზის გახდა სომხეთის რევოლუცია, რომელსაც ხელისუფლებიდან „პუტინის ხელდასმულის“ განდევნა და ხელისუფლების მშვიდობიანად შეცვლა მოჰყვა.