სომხეთი: კორონავირუსით ინფიცირების 32 ახალი შემთხვევა, სულ - 84. საგანგებო მდგომარეობის პირველი დღე

სომხეთში, საგანგებო მდგომარეობის რეჟიმში ცხოვრების პირველმა დღემ ჩაიარა, რომელიც კორონავირუსის გავრცელების შესაჩერებლად, 16 მარტის საღამოს გამოცხადდა.

18 მარტს ცნობილი გახდა, რომ ქვეყანაში ინფიცირების 32 ახალი შემთხვევა გამოვლინდა. ამრიგად, კორონავირუსით დაავადებულთა რიცხვმა 84-ს მიაღწია. მათგან ერთი პაციენტი უკვე გამოჯანმრთელდა და საავადმყოფოდან გაეწერა.

მათი დიდი ნაწილი, ვისაც 17 მარტს აღმოუჩინეს ვირუსი, ამ დროისთვის უკვე იზოლირებული იყო. ესენი არიან ადამიანები, რომლებსაც კონტაქტი ჰქონდათ ადრე გამოვლენილ ინფიცირებულებთან.

სომხეთში, ძალაში შევიდა ახალი აკრძალვები. კერძოდ, გამოცხადდა ქვეყნების სია, რომლის მცხოვრებლებსაც 17 მარტიდან სომხეთში შესვლა აეკრძალათ.

ყველა დეტალი: „დახურულ“ ქალაქ ეჩმიაძინში არსებული სიტუაციის, სპირტის ფასის, პროდუქტის ხელმისაწვდომობისა და ასევე, საგანგებო მდგომარეობის პირობებში მედიის მუშაობის შესახებ

• სომხეთში საგანგებო მდგომარეობა გამოცხადდა: ეს რას ნიშნავს

• კორონავირუსი: გამოცხადდა პანდემია. რას ნიშნავს ეს და რას უნდა ველოდოთ

• კორონავირუსის ეპიდემია კავკასიაში. ფაქტები და რიცხვები რეგიონის შესახებ

დამატებითი შეზღუდვები ეჩმიაძინში

სომხეთში, ყველაზე მძიმე სიტუაცია ქალაქ ეჩმიაძინშია, რომელიც ერევნიდან, დაახლოებით, 20 კილომეტრში მდებარეობს. ინფიცირებულთა დიდი ნაწილი სწორედ იქ იმყოფება.

ახალ ინფიცირებულებს შორის ასევე არიან ადამიანები, რომლებსაც კონტაქტი ჰქონდათ ეჩმიაძინიდან პირველ ინფიცირებულთან. საუბარია ქალზე, რომელიც იტალიიდან დაბრუნდა და იზოლაციის ნაცვლად, ხალხმრავალ ღონისძიებებს დაესწრო.

ამის გამო ქალაქი პრაქტიკულად სრულად იზოლირებულია.

ეჩმიაძინს 27 გასასვლელი აქვს, მაგრამ ხელისუფლების გადაწყვეტილებით, ადამიანებს ახლა მხოლოდ სამით შეუძლიათ სარგებლობა. გასვლისას ექიმები მოქალაქეებს ტემპერატურას უზომავენ და ნორმიდან გადახვევის შემთხვევაში, მათ ან საავადმყოფოში ან თვითიზოლაციაში უშვებენ.

ჩაკეტილ გასასვლელებს პოლიცია აკონტროლებს.

სომხეთში შესვლაზე აკრძალვის შესახებ

გამოქვეყნდა 16 ქვეყნის სია, სადაც განსაკუთრებით მძიმე ეპიდემიოლოგიური სიტუაციაა და ამიტომ, ამ ქვეყნის მოქალაქეები სომხეთში შესვლას ვერ შეძლებენ.

ეს ქვეყნებია: ჩინეთი, ირანი, სამხრეთ კორეა, იაპონია, იტალია, ესპანეთი, საფრანგეთი, გერმანია, შვეიცარია, დანია, ავსტრია, ბელგია, ნორვეგია, შვედეთი, ნიდერლანდები, დიდი ბრიტანეთი.

სომხეთის მოქალაქეები, რომლებიც ამ ქვეყნებიდან დაბრუნდნენ სახლში, 14-დღიან კარანტინს გაივლიან.

შეზღუდვები არ შეეხება ტვირთის გადაზიდვას.

მედიის მუშაობის შესახებ

საგანგებო მდგომარეობის პირობებში, სომხეთის ხელისუფლებამ განაცხადა ინფორმაციის გავრცელების შეზღუდვის შესახებ – როგორც მედიაში, ისე, სოციალურ ქსელებში. ხელისუფლებამ განმარტა, რომ ასე სურთ შეაჩერონ პანიკა და აგრესიული გამონათქვამები კორონავირუსით დაზარალებულებთან დაკავშირებით. ამ მოთხოვნის დარღვევის შემთხვევაში, გათვალისწინებულია ადმინისტრაციული პასუხისმგებლობის დაკისრება.

სომხეთში, კორონავირუსის შესახებ ნებისმიერი ინფორმაცია, უნდა იყოს დაფუძნებული ოფიციალურ ცნობებზე, რომელსაც კომენდანტის ოფისი გაავრცელებს.

17 მარტს, ჟურნალისტებს ინფორმაცია ასევე გააცნეს ჯანდაცვის მინისტრმა და მისმა პრეს-მდივანმა.

„არ შეიძლება ინფიცირებულების სახელების გამოქვეყნება. ადამიანის პირადი მონაცემების გამოქვეყნება ნორმალურ პირობებშიც კი არ ექვემდებარება გასაჯაროებას, მით უფრო, ამის გაკეთება არ შეიძლება ახლა“, – განაცხადა 17 მარტს, იუსტიციის მინისტრის მოადგილე, ვაგე დანიელიანმა.

სპირტის გაძვირების შესახებ

სომხეთში, სპირტი გაძვირდა, მაგრამ არა კორონავირუსის გამო, დაწერა Facebook-ის საკუთარ გვერდზე სომხეთის პრემიერ-მინისტრმა, ნიკოლ ფაშინიანმა:

„სპირტის ფასის გაძვირება დაკავშირებულია საგადასახადო კოდექსში ცვლილებებთან, შეიცვალა „მინიმალური ფასის“ გაგება სპირტთან დაკავშირებით და გაძვირება მხოლოდ ამის გამო მოხდა“.

ხელისუფლების განცხადებით, საქონელზე დეფიციტი არ არის

ეკონომიკური კონკურენციის სახელმწიფო კომიტეტის ხელმძღვანელი, გეგამ გევორგიანი ადამიანებს მოუწოდებს, არ დაიწყონ პანიკური შესყიდვა. მან ოფიციალურად განაცხადა, რომ სომხეთში პროდუქტებზე დეფიციტი და შეზღუდვები არ არის:

„ერთადერთი პრობლემა – ყოველდღიურად მაღაზიებში საქონლის ხელმისაწვდომობის უზრუნველყოფაა, რადგან დღის განმავლობაში, ადამიანები ძალიან დიდი მოცულობით საქონელს ყიდულობენ, თანაც აბსურდულად. ამ მომენტში უნდა მოესწროს საწყობიდან მაღაზიებისთვის საქონლის მიწოდება.

შესაძლოა, რაღაც მომენტში აჟიოტაჟის გამო თაროები ცარიელდება, მაგრამ შემდეგ ისევ ივსება და პრობლემები გვიან საათებშიც კი არ არის – ამ დროს თაროები სავსეა“.

30-40 პროცენტით გაიზარდა სავაჭრო ბრუნვა სუპერმარკეტების მსხვილ ქსელებში, მაგრამ შემცირდა ბრუნვა პატარა მაღაზიებში.

„მოგიწოდებთ, არ დაივიწყოთ მცირე და საშუალო ბიზნესი. მესმის, რომ სუპერმარკეტებში ადვილია შესყიდვა, მაგრამ დღეს გვაქვს დიდი ოდენობით პროდუქტები მობილიზებული პატარა მაღაზიებშიც“, – განაცხადა პრემიერ-მინისტრმა.

კორონავირუსის 5000 ახალი ტესტი

სომხეთი, ამ კვირის ბოლომდე კორონავირუსზე შესამოწმებელ 5 000 ახალ ტესტს მიიღებს.

„ეს ამ დროისთვის საკმარისია, მაგრამ ჩვენ ვმუშაობთ ახალი ტესტების მიღებაზე, მუდმივად ვთანამშრომლობთ საერთაშორისო პარტნიორებთან“, – განაცხადა ჯანდაცვის მინისტრის მოადგილე ლევან ნანუშიანმა.