სომხეთის მოსახლეობა ბერდება. პენსიონერების რაოდენობა მნიშვნელოვნად გაიზარდა

სომხეთი დაბერებადი ქვეყანა ხდება, – განაცხადა სოციალური უზრუნველყოფის სახელმწიფო სამსახურის ხელმძღვანელმა ოვანეს სააკიანმა:

„ქვეყნის დემოგრაფიული მონაცემები იმაზე მეტყველებს, რომ უახლოესი შვიდი წლის განმავლობაში პენსიონერების რაოდენობის დაახლოებით 2500 ადამიანით ზრდის ტენდენცია შეინიშნება“.

ამჟამად სომხეთში 446.249 პენსიონერია.

გაეროს მოსახლეობის ფონდის მონაცემებით, სომხეთი მჭიდროდ მიუახლოვდა დაბერებადი საზოგადოებების ზღვარს. იმავე ფონდის პროგნოზებით კი, ქვეყანა მალე ამ ზღვარს გადააბიჯებს: 2050 წელს მოსახლეობის 22-23%-ს 65 წელიწადზე უფროსი ადამიანები შეადგენენ.

„დაბერებადი ერების რიცხვში მოხვედრის განმსაზღვრელი ფაქტორებია დაბალი შობადობა, და რასაკვირველია, ემიგრაციის მაღალი დონე. ამან ერთმნიშვნელოვნად იქონია გავლენა, რადგან, როგორც ვიცით, ყოველწლიურად დაახლოებით  40.000 ადამიანის ოდენობის უარყოფითი ბალანსი გვაქვს – ეს არის განსხვავება ჩამოსულებსა და გამგზავრებულებს შორის. თუკი ბოლო ათ წელიწადს განვიხილავთ, დაახლოებით ნახევარი მილიონი მოსახლეობა დავკარგეთ. მიზეზი ისაა, რომ ბუნებრივი ნამატის მხრივ, ჩვენ ზედა ზღვარზე ვიმყოფებით (ლაპარაკია შობადობასა და სიკვდილიანობას შორის განსხვავებაზე)“, – განმარტავს სიტუაციას გაეროს მოსახლეობის ფონდის (UNFPA) ერევნის ოფისის აღმასრულებელი წარმომადგენელი გარიკ აირაპეტიანი.

ექსპერტის სიტყვებით, პრობლემის გადაწყვეტა იმაზეა დამოკიდებული, თუ რა პოლიტიკას გაატარებს სომხეთი ამ გამოწვევებთან გასამკლავებლად.

2009 წელს სახელმწიფომ პირველად მიიღო სომხეთის დემოგრაფიული განვითარების სტრატეგიული პროგრამა. ახლა ქვეყანაში შობადობის ხელშეწყობის და სტიმულირების პოლიტიკის შემუშავებას იწყებენ, კერძოდ კი, იგეგმება მესამე და მეოთხე ბავშვის გაჩენის წახალისება.