სომხეთის ეროვნულმა საკრებულომ მთავრობის მიერ წარმოდგენილი „განვითარების პროგრამა“ დაამტკიცა

სომხეთის  ეროვნულმა საკრებულომ დღეს მხარი დაუჭირა მთავრობის მიერ წარმოდგენილ მომავალი 5 წლის პროგრამას. 105 დეპუტატიდან 64-მა ამ პროგრამის სასარგებლოდ მისცა ხმა, წინააღმდეგი იყო – 31.

პარლამენტში წარმოდგენილი ოთხი პოლიტიკური ძალიდან ორმა – ფრაქცია „ცარუკიანმა“ და „ელკმა“ – მთვრობის პროგრამის წინააღმდეგ მისცეს ხმა. ორმა სხვა ძალამ კი მას მხარი დაუჭირა: პრემიერ-მინისტრის გუნდმა, რესპუბლიკური ფრაქციის სახით, და მისმა კოალიციურმა პარტნიორმა  პარტიამ სომხეთის რევოლუციური ფედერაცია „დაშნაკცუტიუნი“.

სამთავრობო პროგრამა ითვალისწინებს წლიურ 5-პროცენტიან ეკონომიკურ ზრდას, სიღარიბის თითქმის ორჯერ შემცირებას, მინიმალური ხელფასის გაზრდას, და ექსპორტის მნიშვნელოვან მატებას.

კარენ კარაპეტიანის თქმით, პროგრამას საფუძვლად უდევს „უსაფრთხო, სამართლიანი და ინტელექტუალური სომხეთის კონცეფცია“, ის ცხოვრების ხარისხის შეცვლისკენაა მიმართული – ადამიანებმა უზრუნველყოფილად უნდა იცხოვრონ, ბიზნესისთვის კი უფრო სტაბილური და უსაფრთხო გარემო უნდა შეიქმნას.

როგორც პრემიერ-მინისტრი ირწმუნება, მომავალი ხუთი წლის განმავლობაში დიასპორის სომხებისთვის და ადგილობრივი მაცხოვრებლებისთვისაც კეთილსაიმედო და კონკურენტუნარიანი გარემო შექმნება; რათა სომხეთი „შემოქმედებისა და შენების საყრდენად იქცეს“ და რომ „მეწარმეებმა თავი კომფორტულად იგრძნონ“.

კარენ კარაპეტიანმა კორუფციასთან ბრძოლის მნიშვნელობაზე ილაპარაკა. მან აღნიშნა, რომ სომხეთში ახალი ანტიკორუფციული ორგანოს გაჩენა  და არაკანონიერად გამდიდრების კრიმინალიზება კორუფციის „მიუღებლობაზე“ მეტყველებს.

თუმცა,  ოპოზიციონერი დეპუტატები და ეკონომისტები წარმოდგენილი პროგრამით კმაყოფილები არ არიან. მათი აზრით, მთავრობამ, კარენ კარაპეტიანის მეთაურობით, ისეთი უმნიშვნელოვანესი ეკონომიკური საკითხების იგნორირება მოახდინა, რომლებზეც დაუყოვნებლივ საჭიროა პასუხის გაცემა.

მაგალითად, ეკონომისტმა ვააგან ხაჩატრიანმა თქვა, რომ წარმოდგენილია „ანტიპროგრამა“, და ის სომხეთში ცხოვრების ხარისხს ვერ შეცვლის. სხვა ეკონომისტმა – მესროპ არაქელიანმა აღნიშნა, რომ სომხეთის მოქალაქეებს ნორმალურად სურთ ცხოვრება, საოჯახო საჭიროებების უზრუნველყოფა ქვეყნიდან გაუსვლელად. მაგრამ, „მოგვცემს კი ამის განხორციელების საშუალებას პროგრამით გაცხადებული 5-პროცენტიანი ზრდა? არაქელიანის აზრით, ამ კითხვაზე პასუხი არ არსებობს.

ოპოზიციონერი დეპუტატების ყურადღების ცენტრში კიდევ ერთი საკითხი იყო: დარჩება თუ არა კარენ კარაპეტიანი თავის თანამდებობაზე 2018 წლის შემდეგ.

კონსტიტუციაში შეტანილი ცვლილებების თანახმად, 2018 წლიდან ქვეყანას არა პრეზიდენტი, არამედ პრემიერ-მინისტრი უხელმძღვანელებს – სომხეთის საპარლამენტო მართვის ფორმაზე გადავიდა.

ამასთან დაკავშირებით ოპოზიციონერ დეპუტატებს აღელვებთ საკითხი: განხორციელდება თუ არა ეს პროგრამა მოქმედი პრემიერის დროს, თუ 2018 წლის შემდეგ მთავრობის მეთური შეიცვლება და კარდინალურად სხვა დოკუმენტი გაჩნდება.

ეს კითხვა არაერთხელ განმეორდა, და საბოლოოდ კარენ კარაპეტიანი იძულებული გახდა,  ეპასუხა, რომ „ის მზადაა იყოს პრემიერ-მინისტრი“.