საჩუქრების საახალწლო ბაზრობა

ახალი წელი  კარსაა მომდგარი. ბევრი უკვე ფიქრობს, თუ რა აჩუქოს საყვარელ ადამიანს თუ ოჯახის წევრებს. არჩევანის გაკეთება განსაკუთრებით მათ უჭირთ, ვისაც დასასაჩუქრებელთა გრძელი სია აქვს.

მათთვის და ყველასთვის, ვისაც უბრალოდ ლამაზი ნივთები უყვარს, წარმოსახვის მქონე და არმქონე შოპოჰოლიკებისთვის სასტუმრო ‘არმენია-მერიოტში’ 19-20 დეკემბერს ყოველწლიური წინასაახალწლო გამოფენა გაყიდვა გაიმართა.

აქ წარმოდგენილი ხელნაკეთი ნივთები ქვეყნის სხვადასხვა რეგიონიდან ჩამოიტანეს. გამოფენაზე ყველაფერს ნახავდით _ ნაძვის ხის სათამაშოებით, სანთლებითა და მოსართავებით დაწყებული,  ტკბილეულობით დასრულებული.

გამოფენაზე მოსულ სტუმარს სომხური პლანშეტის, ArmTab-ის შეძენაც შეეძლო, რომლის პროექტს სომხეთში აკეთებენ და აქვე აწყობენ. თუმცა, ეს დანადგარი გამოფენა-გაყიდვაზეც კი შეზღუდული რაოდენობით იყო წარმოდგენილი. მას მაღაზიებში ვერ შეიძენთ, რადგან მხოლოდ სპეციალური სასკოლო პროგრამებისა და ექსპორტისთვისაა განკუთვნილი.

საზოგადოებრივმა ორგანიზაცია ‘სამშობლოს კარიბჭე’–მ საზღვრისპირა თავუშის ოლქის სკოლის მოსწავლეების მიერ დამზადებული ხელნაკეთი ნივთები წარმოადგინა.

გამოფენა-გაყიდვამ განსაკუთრებით დააინტერესა მოდის მიმდევარი გოგონები, რადგან პავილიონების დიდი ნაწილი ქალის ხელნაკეთ სამკაულებს ეკავა.