სამინისტროს ვიდეოკამერები, რომლებსაც გატაცება შეიძლებოდა აესახა, არ მუშაობდა - აფგან მუხტარლის ადვოკატი

გატაცებული აზერბაიჯანელი ჟურნალისტის აფგან მუხტარლის მეუღლე ლეილა მუსტაფაევა და ადვოკატი არჩილ ჩოფიკაშვილი საქმის მასალებს გაეცნენ.

მუხტარლის ადვოკატი ამბობს, რომ ვიდეოკამერები, რომლებზეც შესაძლოა ასახული იყოს მუხტარლის გამტაცებლების გადაადგილება, არ მუშაობდა. ადვოკატ არჩილ ჩოფიკაშვილის თქმით, ყველა ეს კამერა არის საქართველოს შინაგან საქმეთა სამინისტროს მმართველობის ქვეშ და არცერთ მათგანზე ჩანაწერი არ არის.

ჩოფიკაშვილი შიშობს, რომ დანაშაული შესაძლოა არ გაიხსნას.

“არ არსებობს ჩანაწერები, რაც მიუთითებს იმაზე, რომ პირველადი დასკვნები, რაც ჩვენ მიერ გაკეთდა, ფაქტობრივად ძალაში რჩება. კერძოდ, ის, რომ გამოძიება მიმდინარეობდა მხოლოდ იმიტომ, რომ გაცხადებული ყოფილიყო, რომ გამოძიება მიმდინარეობს. თუ ვიდეოჩანაწერები არ იქნება და არ მოხდება სატრანსპორტო საშუალების იდენტიფიცირება, რომლითაც მუხტარლი გაიტაცეს, შეუძლებელი იქნება სიმართლის დადგენა. მიუხედავად იმისა, რომ ერთი თვე გავიდა, არც ავტოსატრანსპორტო საშუალებაა იდენტიფიცირებული, რომლითაც აფგან მუხტარლი ბარათაშვილის ხიდიდან წავიდა სახლის მიმართულებით, ამ კუთხით ახალი არაფერია”, – განაცხადა ჩოფიკაშვილმა.

ამ საქმესთან დაკავშირებით 19 ივნისს გამოცემა “პრაიმტაიმთან” ისაუბრა საქართველოს შინაგან საქმეთა მინისტრმა გიორგი მღებრიშვილმა. მან გამორიცხა მუხტარლის გატაცების საქმეში სამინისტროს თანამშრომლების მონაწილეობა. ამასთან განაცხადა, რომ ვიდეოკამერებიდან ამოღებულ ჩანაწერებში არ ჩანან პოლიციის ფორმიანი თანამშრომლები.

“საერთოდ, როგორ ფიქრობთ, მოვლენათა ყველაზე წარმოუდგენელი განვითარების შემთხვევაშიც, კრიმინალური პოლიცია, თავისი ფორმით, იტაცებს ადამიანს დღისით-მზისით, ქალაქის ცენტრში და ამას ვერავინ ხედავს. ამ ვერსიას თეორიულადაც კი ვერ დავუშვებ. ამასთანავე, ჩვენ, სასამართლოს განჩინების საფუძველზე, ამოვიღეთ აფგან მუხტარლის მიერ ადვოკატისთვის დასახელებულ ლოკაციებსა და ყველა სავარაუდო მარშრუტზე განთავსებული ვიდეოკამერების ჩანაწერები, გამოვკითხეთ უამრავი პირი. დარწმუნებით შემიძლია გითხრათ, რომ პოლიციის ტანსაცმლიანი ადამიანის მოძრაობა მიმდებარე ტერიტორიებზე დროის მოცემულ მონაკვეთში საერთოდ არ ფიქსირდება”, – განაცხადა მღებრიშვილმა.

ჟურნალისტი აფგან მუხტარლი აზერბაიჯანიდან საქართველოში 2014 წელს გაემგზავრა. ის აზერბაიჯანის ხელისუფლების მხრიდან ხშირად განიცდიდა სხვადასხვა სახის ზეწოლას. მისი რამდენიმე სარჩელი ევროპის ადამიანის უფლებათა სასამართლოში კომუნიკაციის პროცესშია. ბოლო დროს ის თანამშრომლობდა საერთაშორისო მედიასა და ორგანიზაციებთან – IWPR და Meydan.tv

მუხტარლი თბილისიდან 2017 წლის 29 მაისს გაუჩნარდა. მოგვიანებით გაირკვა, რომ ის აზერბაიჯანელი სამართალდამცავების ხელში იყო. თავად მუხტარლის თქმით, ის საქართველოდან ადგილობრივი სპეცსამსახურების თანამშრომლებმა გაიტაცეს, ტომარა ჩამოაცვეს და აზერბაიჯანელ სამართალდამცავებს გადასცეს. მუხტარლის აზერბაიჯანის სასამართლომ 3-თვიანი წინასწარი პატიმრობა შეუფარდა საზღვრის უკანონო კვეთისა და კონტრაბანდის ბრალდებით. მუხტარლის თქმით, მას საზღვარზე 10 ათასი ევრო ჩაუდეს.