პრეზიდენტმა სალომე ზურაბიშვილმა დეკანოზი მამალაძე არ შეიწყალა
საქართველოს პრეზიდენტმა სალომე ზურაბიშვილმა საშობაოდ ხუთი მსჯავრდებული შეიწყალა. მოლოდინის მიუხედავად, მათ შორის არ არის დეკანოზი გიორგი მამალაძე, რომელიც უკვე ორი წელია ციხეში ზის ე.წ. “ციანიდის საქმეზე”.
____________________________________________________________________________________________
• რა ხდება ქართულ ეკლესიაში? პატრიარქის ტახტისთვის ბრძოლა გადამწყვეტ ფაზაში შედის
• საპატრიარქოს კაპიტალი. რა ქონებას ფლობს ყველაზე გავლენიანი ინსტიტუტი საქართველოში?
• ციანიდის საქმე. რეალური თავდასხმა თუ საპატრიარქოს კარის თამაშები?
მამალაძე 2017 წლის თებერვალში, თბილისის აეროპორტში დააკავეს, როდესაც იგი გერმანიაში მიდიოდა. იმ პერიოდში ილია მეორემ ოპერაცია გაიკეთა მიუნჰენში და პატრიარქის მთელი გარემოცვა, მათ შორის შორენა თეთრუაშვილიც გერმანიაში იმყოფებოდა. სწორედ იქ მიდიოდა დეკანოზი მამალაძეც. გამოძიების თანახმად, მამალაძის ბარგში ციანიდი იპოვეს, ხოლო მის სახლში კუსტარული იარაღი და ტყვიები. თავდაპირველად ითქვა, რომ მამალაძე ციანიდით პატრიარქის მოწამვლას აპირებდა, თუმცა მოგვიანებით ეს ვერსია შეიცვალა და ითქვა, რომ მისი სავარაუდო მსხვერპლი შორენა თეთრუაშვილი უნდა ყოფილიყო.
გასული წლის ბოლოს ეკლესიამ თქვა, რომ არ არის წინააღმდეგი, თუკი პრეზიდენტი მამალაძეს შეიწყალებს. დეკანოზის ადვოკატები და ოჯახის წევრები აცხადებენ, რომ მამალაძე უკანონო პატიმარია, რადგან მის წინააღმდეგ მტკიცებულებები რეალურად არ არსებობს. მსჯავრდებული არც თავად აღიარებს ბრალს.
სკანდალურადაა ცნობილი წერილი, რომელიც დეკანოზმა ციხეში ყოფნის დროს დაწერა. აღნიშნული წერილის შინაარსი საჯარო არ გამხდარა და მისი შინაარსი მხოლოდ რამდენიმე ადამიანმა იცის. გავრცელებული ინფორმაციით, წერილში სკანდალური ინფორმაციების მთელი კასკადია თავმოყრილი. დაწყებული სასულიერო პირების კორუფციით და ფინანსური მაქინაციებით, დამთავრებული კონკრეტული სასულიერო პირების მამათმავლობასა და პედოფილიაში მხილებით.
“ვერ მოვნახე არგუმენტი, მით უმეტეს, შეწყალების კრიტერიუმების გამკაცრების პირობებში, რატომ უნდა დაშვებულიყო გამონაკლისი დეკანოზ გიორგი მამალაძის საქმეზე, – განაცხადა პრეზიდენტმა ზურაბიშვილმა საგანგებო ბრიფინგზე.
ზურაბიშვილმა სამი ძირითადი არგუმენტი დაასახელა, თუ რატომ ვერ შეიწყალებს დეკანოზ მამალაძეს. პირველი არგუმენტი იყო – “საზოგადოებრივი სიმშვიდის” უზრუნველყოფა და დაპირისპირების თავიდან აცილება.
მეორე არგუმენტი, რომლითაც პრეზიდენტმა იხელმძღვანელა, იყო ის, რომ “ქართული სახელმწიფოს ისტორიულ სპეციფიკას ეფუძება”.
„ქართული სახელმწიფო განუყოფელია ეკლესიისგან. ეკლესიისგან, რომელიც მუდამ იყო მისი დამოუკიდებლობის გზის გამჭრელი. ეკლესიაზე შეტევა, მისი დისკრედიტაცია, ავტორიტეტის შელახვა უდრიდა და უდრის საქართველოს სახელმწიფოებრიობის შესუსტებას, ამდენად მასზე ნებისმიერი სახის შეტევა დაუშვებელია“, – განაცხადა პრეზიდენტმა.
მესამე არგუმენტი იყო პატრიარქის განსაკუთრებული ავტორიტეტი და როლი. სწორედ ეს არგუმენტი მოჰყავს პრეზიდენტს, მიუხედავად იმისა, რომ მამალაძის საქმეში პატრიარქზე თავდასხმა არ ფიგურირებს. საუბარია პატრიარქის მდივანზე და არა პატრიარქზე.
“ჩემთვის ცხადზე ცხადია, რომ როცა საქართველოს სახელმწიფო მრავალი გამოწვევის წინაშე დგას, პატრიარქის ავტორიტეტისა და მისი სიცოცხლის ხელყოფა ნიშნავს საქართველოს ხელყოფას,” – აღნიშნა ზურაბიშვილმა.
მამალაძის შეწყალების თხოვნით პრეზიდენტს ქართული ეკლესიის წმინდა სინოდმა 2019 წლის 31 ოქტომბერს მიმართა. ეს მას შემდეგ მოხდა, რაც ეკლესიის წიაღში მორიგი სკანდალი დაიწყო – გავლენიანმა სასულიერო პირებმა რამდენიმე სკანდალური განცხადება გააკეთეს, მათ შორის იყო პატრიარქის დადანაშაულება პედოფილიაში.
გამომდინარე იქედან, რომ პრეზიდენტი ზურაბიშვილი ხელისუფლების მიერ მხარდაჭერილი კანდიდატურა იყო ამ პოსტზე და პრეზიდენტობის ერთი წლის განმავლობაში მას არასოდეს გამოუჩენია მთავრობის და საერთო სახელისუფლებო ხაზისგან განსხვავებული პოზიცია, ეჭვი არავის ეპარება იმაში, რომ ზურაბიშვილი არც ამ შემთხვევაში მოქმედებდა დამოუკიდებლად.
პრეზიდენტის დღევანდელი ბრიფინგის შემდეგ განცხადება გააკეთა დეკანოზ მამალაძის ძმამ თორნიკე მამალაძემ. მან თქვა, რომ სალომე ზურაბიშვილის უარი შეწყალებაზე პატრიარქის პოზიციაა და პრეზიდენტი ამ შემთხვევაში დამოუკიდებლად არ მოქმედებდა.
„რა თქმა უნდა, სალომე ზურაბიშვილმა რაც თქვა, ეს დამოუკიდებელი გადაწყვეტილება არ არის. წინა დღეებში ის პატრიარქს შეხვდა და მე მაქვს ინფორმაცია, თუმცა ამ წუთამდე თავს ვიკავებდი ამ კომენტარისგან, რომ თავად კათოლიკოს-პატრიარქმა, ილია მეორემ სალომე ზურაბიშვილს პირად საუბრებში უარი უთხრა დეკანოზის შეწყალებაზე. გამომდინარე აქედან, წმინდა სინოდის მიერ მიღებული გადაწყვეტილება, რომ პრეზიდენტისადმი შუამდგომლობა გაეგზავნათ, იყო ფარსი. კათოლიკოს პატრიარქმა წმინდა სინოდის წევრებიც კი მოატყუა, მან მოატყუა მთელი საზოგადოება და დადგა სპექტაკლი, რა სპექტაკლშიც მიიღო მონაწილეობა პრეზიდენტმა“, – განაცხადა თორნიკე მამალაძემ.
“ევროპული საქართველოს” ლიდერის გიგი უგულავას აზრით, ზურაბიშვილი ქვეყნის არაფორმალური მმართველის ბიძინა ივანიშვილის პოზიციის გამტარებელია ამ შემთხვევაშიც:
„ის არ არის პრეზიდენტი, რომელიც იწყალებს, ის არის ივანიშვილის სადამსჯელო ჯაჭვის ერთ-ერთი რგოლი. სამარცხვინოა მისი გადაწყვეტილება. სამარცხვინოა მთლიანად რაც გიორგი მამალაძესთან დაკავშირებით ხდება. მე ხაზი მინდა გავუსვა საპატრიარქოს პოზიციას, რომელსაც პილატეს პოზიცია აქვს. როდესაც საპატრიარქოს რაღაც სურს, ჩვენ გვინახავს მათი დაჟინებული თხოვნაც. ის პოზიცია კი, რაც საპატრიარქომ დაიჭირა, არის ის, რომ ხელები დაიბანა როგორც პილატემ და გიორგი მამალაძე ჩაუგდო სამოქალაქო ხელისუფლებას და ჯალათებს,“ – განაცხადა გიგი უგულავამ.
ზურაბიშვილის გადაწყვეტილება უკვე გააკრიტიკეს ასევე იურისტებმა.
არასამთავრობო ორგანიზაცია ადამიანის უფლებების სწავლებისა და მონიტორინგის ცენტრი (EMC) აღნიშნავს, რომ პრეზიდენტის არგუმენტები საერთოდ ამოვარდნილია შეწყალების კონცეფციიდან.
“არცერთი კომენტარი პრეზიდენტს არ გაუკეთებია სასულიერო პირის მძიმე ჯანმრთელობისა და ემოციური მდგომარეობის, საპატიმრო პირობებში სასჯელის მოხდის სირთულეების და ასევე, ამ საქმეზე მართლმსაჯულების ხარვეზების შესახებ”.
დღემდე პრეზიდენტს პატიმართა შეწყალებაზე მორატორიუმი ჰქონდა გამოცხადებული. სალომე ზურაბიშვილმა ეს გადაწყვეტილება 18 სექტემბერს მიიღო მას შემდეგ, რაც ცნობილი გახდა, რომ 28 აგვისტოს, მარიამობის დღესასწაულთან დაკავშირებით შეწყალებულთა შორის იყვნენ მძიმე მკლელებებისთვის ბრალდებული პირები, რასაც საზოგადოების პროტესტი მოჰყვა.
