მწერალი ზურაბ ჯიშკარიანი: შურისძიების სურვილი ხელს გვიშლის აფხაზებში ადამიანი დავინახოთ
მწერალი ზურაბ ჯიშკარიანი, აფხაზეთის დროშიანი მაისური
ქართველმა მწერალმა ზურაბ ჯიშკარიანმა, რომელიც ცოტა ხნის წინ ე.წ. აფხაზეთის დროშიანი მაისურის ჩაცმისთვის გააკრიტიკეს, აფხაზებისა და ქართველების ურთიერთობაზე და ცნობილ მაისურზე “ტაბულას” გადაცემაში “მძიმე კაცთან” ისაუბრა.
“მშვიდობა მირჩევნია ომს, მთელი ცხოვრებაა ომში ვარ”, – აღნიშნა ჯიშკარიანმა. მისი თქმით, ქართველებიც და აფხაზებიც ჩიხში არიან და თუ ორივე არ დათმობს, ამ ჩიხიდან გამოსვლა გაუჭირდებათ.
“ისინი [აფხაზები] ჩაიკეტნენ მანდ, სადღაც რუსეთის გარშემო, გასასვლელი არსად აქვთ და ერთადერთი გასასვლელი შეიძლება ჰქონდეთ საქართველოს მხარეს. ჩვენთან წლების განმავლობაში ერთიდაიგივე პოლიტიკა მიდის: ან გვინდა, რომ შევვარდეთ და ომით დავიბრუნოთ აფხაზები, რაც ძირშივე არასწორია, ან მეორე ნაწილი ამბობს, რომ მშვიდობით უნდა შევიდეთ, მაგრამ როგორ – პასუხი არ აქვთ. მე ვფიქრობ, ჩვენ ხალხმა ბურთი უნდა გადმოვიტანოთ, რუსეთის მოედანზე კი არ ვითამაშოთ, ჩვენ მოედანზე უნდა ვითამაშოთ. მჯერა, რომ საბოლოოდ ხალხის ნება, თავისუფალი ადამიანების ნება გაცილებით მეტს ნიშნავს, ვიდრე – უზარმაზარი სახელმწიფოების”, – თქვა ჯიშკარიანმა.
მისი თქმით, დროა ქართველებმა დაინახონ, რომ აფხაზები არსებობენ, ეს კი იმას ნიშნავს, რომ დაპირისპირება და მსხვერპლი ორივე მხარემ უნდა დაივიწყოს და ურთიერთობის ახალ ეტაპზე უნდა გადავიდნენ.
“რაღაც მომენტში ჩვენ პატივი უნდა მივაგოთ ყველა იმ ადამიანს, ვინც იბრძოდა იქეთა მხარეს და აქეთა მხარს. ისინი იბრძოდნენ, შეიძლება მცდარი იყო მათი იდეები, მაგრამ მათ სჯეროდათ. ამიტომ ჩვენ უნდა დავივიწყოთ ჩვენი მკვდრები, მათ – თავისი. დავიწყება არ ნიშნავს, რომ სანაგვეზე გადავაგდოთ. ეს ნიშავს, რომ ჩვენ უნდა ვთქვათ: კი ეს მოხდა და წინ უნდა წავიდეთ. ვიცი, რომ ყველაზე რთული გადასაგორებელია ის სისხლი, რაც მაშინ დაიღვარა, მაგრამ სისხლი სისხლის წილ პრინციპით ეს პრობლემა არასოდეს მოგვარდება. შურისძიების შეგრძნება გვაბრმავებს და ხელს გვიშლის აფხაზში ადამიანი დავინახოთ. ხო, მე ვუწვდი ხელს და სალამს ვეუბნები ჩემს ნაცნობებს და ნათესავებს იქეთ მხარეს და ველოდები იგივეს მათგან!”, – თქვა ჯიშკარიანმა.
27 ივნისის გავრცელებულ ფოტოს, სადაც ილიაუნის ლიტერატურული კონკურსის ერთ-ერთ გამარჯვებულ ზურაბ ჯიშკარიანს დე ფაქტო აფხაზურდროშიანი მაისური ეცვა, ქართული საზოგადოების ნაწილი აღაშფოთებით შეხვდა. ჯიშკარიანმა მაშინვე განმარტა, რომ ეს მაისური მას აფხაზმა მეგობრებმა აჩუქეს და ხშირად აცვია, მისი აფხაზი მეგობრები კი საქართველოს დროშის გამოსახულებიან მაისურებს აფხაზეთში ატარებენ. თუმცა, კრიტიკა ჯიშკარიანის მისამართით არ შეწყვეტილა. სოციალური ქსელის მომხმარებლები წერდნენ:
“მალე ალბათ ცალკე სახელმწიფოებადაც ვაღიარებთ აფხაზეთს და ე.წ. სამხრეთ ოსეთს”
“ილიაუნი – უნივერსიტეტი, რომელიც ლიბერალიზმის ერთ-ერთი მთავარი ინკუბატორია საქართველოში, რომლის ლექტორებს, მათ შორის ლაშა ბუღაძეს, ყველგან კრემლის რუსული პროპაგანდა ელანდებათ, თავად აჯილდოებენ “მწერალ” ზურა ჯიშკარიანს, რომელსაც სოლიდარობის მიზნით რუსული სეპარატისტული აფხაზეთის გერბიანი მაისური აცვია.”
“აფხაზებს ვეზიზღებით და არ თქვათ, რომ ეს ესე არ არის. დღევანდელი გადმოსახედიდან სიყვარულით გაწვდილი ხელი ერთ დიდ სისულელედ მიმაჩნია, მათი ფუნდამენტური სიძულვილის ფონზე.”
“რა უსინდისობაა თქვენი მხრიდან, აფხაზების სისხლის წყურვილში დაადანაშაულო ისინი, ვისაც თქვენი მაისური არ მოეწონა. ერთადერთი სცენარი, რომლითაც აფხაზეთის და სამაჩაბლოს დაბრუნება წარმომიდგენია, მშვიდობიანია. მხოლოდ მათთან ერთად წარმომიდგენია იქ ცხოვრება და სხვა ვარიანტი უსამართლობად მიმაჩნია. მაგრამ ეს დროშა არის სეპარატისტული აფხაზეთის სიმბოლო. ხვალ რომ თბილისში რუსებმა იფრიალონ მაგ დროშებით რას ვეუბნებით?”
სოციალურ ქსელში იყვნენ მომხმარებლები, ვინც ჯიშკარიანის პოზიციას იცავდა და კონფლიქტის მშვიდობიან მოგვარებაზე საუბრობდა.
“სწორედ ამიტომაც არის შეუძლებელი ომის გააზრება და დასრულება, ახალი ფურცლის გადაშლა – არავის არ უნდა სხვა კუთხიდან, ახალი პერსპექტივიდან შეხედოს კონფლიქტს და სხვა, ნაციონალიზმისგან დაცლილ აზრს მოუსმინოს. ეს ომი ჯერ კიდევ არ დასრულებულა და ალბათ კიდევ დიდი დრო დაჭირდება ამ ურთიერთ სიძულვილის დავიწყებას.დილა, ერთი სიტყვით იწყება ზოგჯერ ახალი დღეები, რომელიც შეიძლება ძალიან გვიან, მაგრამ აუცილებლად გათენდება”
ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
