სომხეთში კორონავირუსის პირველი შემთხვევა დაფიქსირდა

1 მარტს, სომხეთში, კორონავირუსით დაინფიცირების პირველი შემთხვევა გამოვლინდა. სომხეთის 29 წლის მოქალაქე ცოტა ხნის წინ თეირანიდან დაბრუნდა.

23 თებერვალს, ირანში პირველი დაინფიცირებულის გამოვლენის შემდეგ, სომხეთმა ორი კვირით დაკეტა საზღვარი ამ ქვეყანასთან, რათა ვირუსის შემოსვლა აერიდებინა თავიდან. მაგრამ ითქვა, რომ არანაირი შეზღუდვა არ დაწესდებოდა ირანიდან სამშობლოში დაბრუნებული სომხეთის მოქალაქეებისთვის.

მათთვის სპეციალური რეისები ხორციელდება და სწორედ ერთ-ერთი ასეთით დაბრუნდა პირველი დაინფიცირებული. თეირანში, სომხეთის საელჩოს ცნობით, უკანასკნელი რამდენიმე დღის განმავლობაში, სომხეთში, დაახლოებით, 360 ადამიანი დაბრუნდა.

• როგორ უნდა დავიცვათ თავი კორონავირუსისგან. კითხვებზე პასუხები 2-წუთიან ვიდეოში

• კორონავირუსი ქართულ ეკონომიკას ურტყამს

ყველა დეტალი

პირველმა, კორონავირუსით დაინფიცირებული ადამიანის შესახებ ინფორმაცია სომხეთის პრემიერ-მინისტრმა, ნიკოლ ფაშინიანმა 1 მარტს, გამთენიისას, Facebook-ის საკუთარ გვერდზე გაავრცელა. მან დაწერა, რომ დაავადებული ადამიანი თეირანიდან 28 თებერვალს, მეუღლესთან ერთად დაბრუნდა.

უკვე დღისით, ჯანდაცვის მინისტრმა პრესკონფერენცია გამართა და მოქალაქეებს ურჩია პანიკას არ აყვნენ, უბრალოდ, დაიცვან უსაფრთხოების ნორმები.

არსენ ტოროსიანმა განაცხადა, რომ დაინფიცირებული ჯერჯერობით მკურნალობის კურსს არ გადის, რადგან მას არც ვირუსის სიმპტომები აქვს და არც ტემპერატურა. კორონავირუსზე ტესტმა უარყოფითი პასუხი აჩვენა მისი მეუღლის შემთხვევაში, თუმცა, მას, შესაძლოა, ინკუბაციის პერიოდი ჰქონდეს.

მინისტრმა განსაკუთრებით გაუსვა ხაზი იმ ფაქტს, რომ ყველა მგზავრი შემოწმება გადის, როგორც ირანში, ისე სომხეთის აეროპორტში. ამ მომენტისთვის 32 ადამიანია იზოლირებული.

უსაფრთხოების ზომები

„თვითმფრინავის მთელი რიგი, რომელშიც ის (ინფიცირებული) იჯდა, ორი რიგი წინა და უკანა მხარეს, თუკი ისინი ყველა დაინფიცირებულები არიან, ვერავის დაინფიცირებას ვერ მოასწრებდნენ“, – განაცხადა ჯანდაცვის მინისტრმა.

მან ასევე აღნიშნა, რომ კორონავირუსით დაავადებული ადამიანი ქალაქში ტაქსით არ გადაადგილდებოდა. ის აეროპორტიდან სახლში ახლობლის ავტომობილით მივიდა, რომელიც უკვე იზოლირებულია. სახლიდან საავადმყოფოში ის სასწრაფო დახმარების მანქანამ გადაიყვანა, ექიმების ჯგუფი, რომელსაც მასთან ჰქონდა კონტაქტი, ასევე იზოლირებულია.

არსენ ტოროსიანი მიიჩნევს, რომ უსაფრთხოების ყველა ნორმა მიღებულია და პანიკის მიზეზი არ არსებობს. მან საზოგადოებას შეახსენა, რომ საჭიროა ხელების ხშირი დაბანა, დაავადებულებთან ურთიერთობისას ნიღბის ტარება, გადაკოცნისა და ხელის ჩამორთმევისგან თავის შეკავება ნაცნობთან შეხვედრისას.

ტრადიციული მსვლელობის გაუქმება

სომხეთში, 1 მარტს, ყოველთვის იმართება 2008 წლის მოვლენების მსხვერპლთა ხსოვნისადმი მიძღვნილი აქცია. მაშინ, საპრეზიდენტო არჩევნების შედეგებით უკმაყოფილი მოქალაქეების საპროტესტო აქციის დაშლისას, 10 ადამიანი დაიღუპა.

პოსტ-რევოლუციური სომხეთის ხელისუფლება განსაკუთრებული ყურადღებით უდგება ამ მოვლენების გამოძიებას. ქვეყნის ყოფილი პრეზიდენტი, რობერტ კოჩარიანი ამ საქმის გამოა დაპატიმრებული – კონსტიტუციური წესრიგის დამხობის ბრალდებით.

და პირველ მარტს, პარტია „სამოქალაქო თანხმობამ“, რომლის ლიდერიც პრემიერ-მინისტრი ნიკოლ ფაშინიანია, მაინც გააუქმა 2008 წლის მოვლენების მსხვერპლთა ხსოვნისადმი მიძღვნილი მსვლელობა. პარტიის ოფისში განაცხადეს, რომ „აქცია უქმდება კორონავირუსით დაავადების პირველი შემთხვევის გამოვლენის გამო“.