დონალდ ტრამპი არა მხოლოდ აშშ-ის პრეზიდენტად რჩება, არამედ ხელახლა არჩევის მაღალი შანსებიც აქვს

აშშ-ის ისტორიაში, მოქმედი პრეზიდენტის ხელისუფლებიდან ჩამოშორების მესამე მცდელობა ჩავარდა. რესპუბლიკელების მიერ კონტროლირებადმა სენატმა არასაკმარისად მიიჩნია ბრალდებები, რომელიც ოპონენტებმა დონალდ ტრამპს წაუყენეს.

იმპიჩმენტს მხარი დაუჭირა პრეზიდენტისადმი ოპოზიციურად განწყობილი დემოკრატიული პარტიის ყველა წარმომადგენელმა. მაგრამ ერთის გამოკლებით ყველა რესპუბლიკელმა (ტრამპის პარტია) ხმა პრეზიდენტის სასარგებლოდ მისცა – ისინი კი სენატში უმრავლესობაში არიან.

პრეზიდენტ ტრამპს მხარს უჭერენ აშშ-ის მოქალაქეები. Gallup International-ის კვლევის თანახმად, რომელიც ზუსტად კენჭისყრის წინ გამოქვეყნდა, იმ ადამიანთა რიცხვმა, ვისაც ტრამპის საქმიანობა მოსწონს, სარეკორდო მაჩვენებელს – 49 პროცენტს მიაღწია.

როგორ მისცეს ხმა სენატორებმა და როგორ არის მოწყობილი იმპიჩმენტის სისტემა

48 სენატორმა მხარი დაუჭირა ბრალდებას, რომლის თანახმადაც, პრეზიდენტმა ტრამპმა ბოროტად გამოიყენა ძალაუფლება.

52-მა სენატორმა კი აშშ-ის პრეზიდენტი უდანაშაულოდ ცნო.

იმპიჩმენტის წარმატებით დასრულებისთვის, ტრამპის მოწინააღმდეგეებს მინიმუმ ხმათა 2/3-ის დაგროვება სჭირდებოდათ.

ამ მუხლით პრეზიდენტის იმპიჩმენტს მხარი დაუჭირა სენატის ყველა დემოკრატმა წევრმა და ერთმა რესპუბლიკელმა.

მეორე ბრალდებაში – კონგრესის მუშაობისთვის ხელის შეშლაში – ტრამპი დამნაშავედ ცნო 47-მა სენატორმა, 53-მა კი ხმა იმპიჩმენტის წინააღმდეგ მისცა.

პირველ კენჭისყრასთან სხვაობა იმით აიხსნება, რომ რესპუბლიკელმა სენატორმა მით რომნიმ იმპიჩმენტს მხარი დაუჭირა პირველი მუხლით და მეორე მუხლით წინააღმდეგ წავიდა.

ტრამპის რეპუტაცია შეირყა თუ პირიქით, გამყარდა? კომენტარები

კონგრესის სპიკერმა, ნენსი პელოსიმ სენატში კენჭისყრის შესაძლო შედეგების კომენტირებისას, არაერთხელ განაცხადა, რომ ამას მნიშვნელობა არ აქვს. მისი აზრით, დონალდ ტრამპი ყველა ვარიანტში შევა ისტორიაში, როგორც აშშ-ის მესამე პრეზიდენტი, რომელსაც იმპიჩმენტი გამოუცხადეს და ვერასოდეს მოახერხებს ამისგან გათავისუფლებას.

პოლიტოლოგებს ეჭვი არ ეპარებათ, რომ თავად დონალდ ტრამპი სენატის კენჭისყრის შედეგების გამოყენებას ახალი საპრეზიდენტო რბოლაში შეეცდება.

„ის ამას საკუთარ გამარჯვებად გამოაცხადებს, მისი მხარდამჭერები კიდევ ერთხელ დარწმუნდებიან იმაში, რომ ხმას აძლევენ ნამდვილ გმირს, რომელმაც ვაშინგტონის ისტებლიშმენტი გამოიწვია, – მიაჩნია სტოუნ ბრუკის უნივერსიტეტის პროფესორს, პოლიტოლოგ ჯონათან სანდერსს. – არ გამოვრიცხავ, რომ იმპიჩმენტის მცდელობამ მას ამომრჩეველთა ახალი ხმები მოუტანოს, რომლებიც ამ დრომდე ვერ ახერხებდნენ საკუთარ არჩევანში ჩამოყალიბებას“.

ქვემო მოყვანილი ვიდეო ნახვის ყველა რეკორდს ხსნის. აშშ-ის წარმომადგენელთა პალატის სპიკერი ნენსი პელოსი, რომელიც პრეზიდენტ ტრამპის იმპიჩმენტის პროცესში ლიდერის როლს ასრულებდა, დემონსტრაციულად ხევს გამოსვლის ტექსტს, რომლითაც ტრამპმა კონგრესს მიმართა. მანამდე, რამდენიმე წუთით ადრე, ტრამპმა მისთვის ხელის ჩამორთმევაზე უარი თქვა.

პრეზიდენტის არჩევნები აშშ-ში, 2020 წლის ნოემბერში ჩატარდება

პრეზიდენტის იმპიჩმენტის პროცესი მიმდინარეობდა იმ დროს, როდესაც აშშ-ში, ნოემბერში გასამართი საპრეზიდენტო არჩევნების კამპანია დაიწყო.

დარეგისტრირებული ამომრჩევლის ნახევარი მიიჩნევს, რომ ტრამპი ხელმეორე ვადით არჩევას იმსახურებს.

მთავარი მოტივი: გასულ წელს მათი ფინანსური მდგომარეობა გაუმჯობესდა და მათ მომავალ წელსაც ამ ტენდენციის შენარჩუნების იმედი აქვთ.

ამავდროულად, სოციოლოგები არნახულ პოლარიზაციაზე საუბრობენ.

ტრამპის მოწონების რეიტინგი რესპუბლიკური პარტიის ამომრჩეველთა შორის – 94 პროცენტია; დემოკრატიული პარტიის მომხრეებში კი – 7 პროცენტი.