არჩევნების წინასწარი შედეგები აზერბაიჯანში - ფემინისტი ქალი პირველად გახდა მუნიციპალიტეტის წევრი
აზერბაიჯანში მუნიციპალური არჩევნების საბოლოო შედეგები 29 დეკემბერს გამოქვეყნდება. ამ მომენტისთვის ცნობილია, რომ ქალთა უფლებების დამცველი ვაფა ნაგი ქვეყნის ცენტრალური ნაწილის ნეფთჩალინის რაიონის სოფელ ჰოლ გარაგაშლის მუნიციპალიტეტში მოხვდა.
არჩევნები 23 დეკემბერს ჩატარდა და ექსპერტების უმრავლესობა თანხმდება, რომ ეს აზერბაიჯანში ყველაზე უცნაური მუნიციპალური არჩევნები იყო.
ამ არჩევნების უცნაურობა პირველ რიგში ისაა, რომ მასში პირველად მონაწილეობდა „პროტესტანტი ახალგაზრდობა“ – ყოფილი პოლიტპატიმრები, ახალგაზრდა ოპოზიციონერები და ფემინისტები. ისინი აქტიურ აგიტაციას ეწეოდნენ, თავიანთი გარემოცვიდან დამოუკიდებელი დამკვირვებლები მიიზიდეს და საზოგადოების დაინტერესება შეძლეს, თუმცა, როგორც წესი, აზერბაიჯანში მუნიციპალური არჩევნები პრაქტიკულად შეუმჩნევლად მიმდინარეობდა ხოლმე.
ყოფილ პოლიტპატიმარს მეჰმან გუსეინოვს, რომელმაც არჩევნებში ვერ გაიმარჯვა, ეს გაყალბების შედეგად მიაჩნია.
• რით იყო საინტერესო და უჩვეულო აზერბაიჯანის 2019 წლის მუნიციპალური არჩევნები
• რა იცვლება აზერბაიჯანში – საზოგადოება, მთავრობა, ოპოზიცია?
გამარჯვებულები და უკმაყოფილოები
ვაფა ნაგი, პირველ რიგში, იმით არის ცნობილი, რომ პროვინციაში საწოლის თეთრეულის სოციალური ბიზნესი შექმნა, რითაც რამდენიმე ადგილობრივი ქალი დაასაქმა. არჩევნებამდე რამდენიმე დღით ადრე თავის Facebook-გვერდზე ვაფა საარჩევნო კომისიის წევრების მხრიდან ზეწოლისა და მუქარების შესახებ საუბრობდა.
ბლოგერი მეჰმან გუსეინოვი ხელისუფლების მაკრიტიკებელ ვიდეოსიუჟეტებს იღებდა და პოლიციელის მიმართ ცილისწამების ბრალდებით, ორი წელიწადი ციხეში გაატარა. 23 დელემბერს საღამოს, არჩევნების დასრულების შემდეგ და ოფიციალური შედეგების გამოქვეყნებამდე დიდი ხნით ადრე მეჰმანის თანამოაზრეეებმა არჩევნებში მისი გამარჯვების შესახებ განაცხადეს. ახლა, როდესაც გაირკვა, რომ გუსეინოვი მუნიციპალიტეტში ვერ მოხვდა, ის საარჩევნო კომისიას გაყალბებაში ადანაშაულებს.
კიდევ ერთი დამოუკიდებელი კანდიდატი, ფემინისტი რაბია მამედოვა ირწმუნება, რომ ბიულეტენებიანი საარჩევნო ურნა მოჰპარეს, რის შედეგადაც ის მუნიციპალიტეტში ვერ მოხვდა. ახლა გოგონა გეგმავს ვადამდელ საპარლამენტო არჩევნებში მონაწილეობას, რომელიც 2020 წლის თებერვალში ჩატარდება.
მთლიანობაში, არჩევნების მსვლელობისას დამკვირვებლებმა და ჟურნალისტებმა რამდენიმე სერიოზული დარღვევის შემთხვევა დააფიქსირეს.
პოლიტიკური მიმომხილველი
შაჰინ რზაევი
ამ არჩევნების განსაკუთრებულობა ისაა, რომ ის დროში დაემთხვა „რეფორმების“ ილუზიას, რომელიც თითქოს აზერბაიჯანის ხელისუფლებამ ზემოდან აამოქმედა. თანამდებობებიდან რამდენიმე მხცოვანი და აშკარად არაპოპულარული ჩინოვნიკის მოხსნამ მოსახლეობას შესაძლო დემოკრატიული გარდაქმნების გაუმართლებელი იმედი ჩაუსახა, მათ შორის – საარჩევნო სისტემაშიც. თუმცა, ეიფორიამ მალევე გაიარა. ფალსიფიკაციის მექანიზმი ძველებურად მუშაობდა, მხოლოდ მეთოდები ოდნავ უფრო თანამდეროვე და უფრო გაქნილი გახდა.
მაგრამ არსებობს დადებითი მომენტიც. იმან, რომ არჩევნები, ძირითადად, ჩვეულ კალაპოტში ჩატარდა (როგორც ვიწინასწარმეტყველეთ), შესაძლოა, საარჩევნო კომისიას ბევრად უფრო მნიშვნელოვან 2020 წლის 9 თებერვლის საპარლამენტო არჩევნებზე პრობლემები შეუქმნას. ამ არჩევნებს უკვე გაცილებით მეტი ყურადღებით დააკვირდებიან, და ამომრჩეველთა პოლიტიკური აქტიურობაც ბევრად მაღალი იქნება.
პროექტი დაფინანსებულია დემოკრატიის კომისიის მცირე გრანტების პროგრამის ფარგლებში, აშშ-ის საელჩოს მიერ. გამოცემაში გამოთქმული მოსაზრებები ავტორისეულია და შეიძლება არ ასახავდეს აშშ-ის სახელმწიფო დეპარტამენტის თვალსაზრისს.
