"გირჩი" ახალი წლის ღამეს ზურაბ ჯაფარიძეს გააქირავებს

აუქციონი ინტერნეტში უკვე გაიხსნა და პირობების ნახვა ამ ბმულზე არის შესაძლებელი.

ამ დროისთვის ზურაბ ჯაფარიძის საახალწლო ვიზიტის მსურველთა ლიდერების სამეული მზადაა, ამაში 111 ლარი (დაახლოებით 40 დოლარი), 100 ლარი (დაახლოებით 37 დოლარი) და 50 ლარი (დაახლოებით 19 დოლარი) გადაიხადოს.

პარტია ხუთ გამარჯვებულს გამოავლენს. თითოეულთან ვიზიტი მინიმუმ 35 წუთი გაგრძელდება.

„გირჩში“ აზუსტებენ, რომ ზურაბ ჯაფარიძის სტუმრობა მხოლოდ თბილისის ფარგლებშია შესაძლებელი.

ვინ არის „გირჩი“?

„გირჩის“ ლიდერი ზურაბ ჯაფარიძე 2018 წლის საპრეზიდენტო არჩევნებში მონაწილეობდა და პირველ ტურში ამომრჩეველთა ხმების 2,26 პროცენტი მიიღო – ეს 36 034 ხმაა.

პარტია 2015 წელს ყოფილი მმართველი პარტიიდან, „ერთიანი ნაციონალური მოძრაობიდან“ წამოსულმა პოლიტიკოსთა ჯგუფმა ჩამოაყალიბა.

„გირჩის“ ლიდერები აქტიურები არიან სოციალურ ქსელებში და დროდადრო არაორდინარულ აქციებს მართავენ.

მაგალითად, 2016 წლის ახალი წლის ღამეს, „გირჩის“ აქტივისტებმა საკუთარი ოფისის ეზოში დემონსტრაციულად დათესეს კანაფი. რამდენიმე თვის წინ კი თბილისში მარიხუანის კოსტიუმირებული ფესტივალი გამართეს.

„გირჩის“ ამომრჩევლები ძირითადად ახალგაზრდები არიან, რომლებიც პარტიის ულტრალიბერალურ შეხედულებებს უჭერენ მხარს.

„გირჩის“ მთავარი ამოცანა – ნარკოტიკების ლეგალიზაცია, საკონტრაქტო სამხედრო სამსახურზე გადასვლა და სავალდებულო სამხედრო გაწვევის გაუქმებაა. გაერთიანებაში ასევე გამოდიან დახმარებებისა და სუბსიდიების გაუქმების, ეკონომიკაში სახელმწიფოს მინიმალური ჩარევის მოწოდებებითა და ა.შ.

„გირჩის“ წარმომადგენლების სარჩელის დამსახურებით, 2018 წლის ივლისში საკონსტიტუციო სასამართლომ ფაქტობრივად დააკანონა ქვეყანაში მარიხუანის მოხმარება, როდესაც ადმინისტრაციული ჯარიმა გააუქმა. ამის საპასუხოდ, საქართველოს შინაგან საქმეთა სამინისტრომ მოამზადა კანონპროექტი, რომელიც მარიხუანის მოხმარებაზე მთელ რიგ შეზღუდვებს ითვალისწინებს.

2017 წლის აპრილში, „გირჩმა“ დაარეგისტრირა რელიგიური ორგანიზაცია, „საქართველოს ქრისტიანული, ევანგელისტური, პროტესტანტული ეკლესია – ბიბლიური თავისუფლება“. როგორც მაშინ პარტიის ლიდერებმა განმარტეს, მათ ამით მოძებნეს ახალგაზრდების სამხედრო სავალდებულო სამსახურიდან კანონიერად გათავისუფლების გზა.

სქემა ასეთია – ორგანიზაციაში მიდის წვევამდელი, მას აძლევენ ცნობას, რომ ის სასულიერო პირია და სახელმწიფო მას ათავისუფლებს სამსახურისგან, რადგანაც, ქართული კანონმდებლობის თანახმად, სამხედრო სამსახურში გაწვევა შეიძლება გადავადდეს, თუ ადამიანი სასულიერო პირია ან სასულიერო სემინარიაში სწავლობს.

ორგანიზაციის ჩანაფიქრმა იმუშავა, მათთან ბევრი ისეთი ადამიანი მიდის, ვისაც არმიაში სამსახური არ სურს. როგორც „გირჩში“ აცხადებენ, ასეთი „სასულიერო პირი“ უკვე სამი ათასზე მეტია.