სამი წელი და ორი თვე პატიმრობა - გიგი უგულავა უზენაესმა სასამართლომ დამნაშავედ სცნო
პატიმრობა სამი წლით და ორი თვით – თბილისის ყოფილი მერი, ამჟამად ოპოზიციური პარტიის “ევროპული საქართველოს” ლიდერი გიგი უგულავა უზენაესმა სასამართლომ დამნაშავედ ცნო 48 მილიონი ლარის მითვისება-გაფლანგვაში.
საერთო ჯამში უზენაესმა სასამართლომ უგულავას 9 წლით თავისუფლების აღკვეთა მიუსაჯა.
თუმცა, იმის გათვალისწინებით, რომ უგულავა ციხეში უკვე იჯდა და ასევე ამნისტიის კანონის გათვალისწინებით, მას საბოლოო სასჯელად 3 წლით, 2 თვით და 8 დღით პატიმრობა განესაზღვრა.
მისი ადვოკატის, ბექა ბასილაიას თქმით, გადაწყვეტილება აღსასრულებლად უკვე გადაგზავნილია. გიგი უგულავას სავარაუდოდ დღესვე დააკავებენ.
თავად გიგი უგულავამ აღნიშნულ გადაწყვეტილებას უკვე უწოდა “ბიძინა ივანიშვილის დაკვეთა”. ის თავის ფეისბუკზე წერს:
გიგი უგულავა უკვე იყო დაკავებული თბილისის მერად ყოფნის პერიოდთან დაკავშირებული საქმის გამო. 2015-2017 წლებში ის იხდიდა სასჯელს “თბილსერვისისა” და რიყის პარკის ტერიტორიის გამო. მას ამ შემთხვევაშიც ბრალდებოდა საბიუჯეტო თანხების გაფლანგვა და სამსახურეობრივი მდგომარეობის ბოროტად გამოყენება. თავად უგულავა ბრალს არ აღიარებდა. მაშინაც და ახლაც ოპოზიციის ლიდერები აცხადებდნენ, რომ “ქართული ოცნება”უგულავას პოლიტიკური ნიშნით დევნის.
