რუს დეპუტატს მიაჩნია, რომ სახელმწიფომ შშმ პირებზე ფული არ უნდა დახარჯოს

რუსეთის ერთ-ერთი უმსხვილესი ქალაქის, ეკატერინბურგის საქალაქო დუმის დეპუტატმა, ნიკოლაი კოსარევმა „ურალინფორმბიუროს“ კორესპონდენტის რამდენიმე შეკითხვას უპასუხა. ამ ინტერვიუს დიდი სკანდალი მოჰყვა.

კოსარევმა თქვა, რომ სახელმწიფომ ზომიერება უნდა დაიცვას, როდესაც ფულს ახალშობილებისა და შშმ პირების დასახმარებლად ხარჯავს.

ისინი ამას არ იმსახურებენ, ფიქრობს რუსი დეპუტატი.

„აი, ჩვენ ვქმნით პერინატალურ ცენტრებს, სადაც 500 გრამის წონის მქონე ახალშობილებს ვუვლით და შემდეგ, ჩემი აზრით, ხშირად ისეთ ადამიანებს ვამრავლებთ, რომლებსაც ჯანმრთელობის პოტენციალი არ გააჩნიათ. ისინი ინვალიდები არიან, ავადმყოფები“, – განაცხადა დეპუტატმა.

კოსარევმა ასევე უკმაყოფილება გამოხატა იმის გამო, რომ ინსულტგადატანილი ადამიანები ხშირად “ინვალიდები” ხდებიან და შემდეგ მთელი ცხოვრება „სახელმწიფოს კმაყოფაზე“ რჩებიან. კოსარევს მიაჩნია, რომ ეს კარგია სიკვდილიანობის სტატისტიკის შემცირების თვალსაზრისით, თუმცა სახელმწიფოს დამატებით ტვირთად აწვება.

კოსარევი ფიქრობს, რომ სახელმწიფოს პრიორიტეტი პერინატალური ცენტრების აშენება კი არ უნდა იყოს, სადაც დღენაკლულ ბავშვებს უვლიან, არამედ ისეთი თაობების აღზრდა, რომლებიც „საკუთარი ჯანმრთელობას ყურადღებით მოეპყრობიან”. 

დეპუტატის თქმით, თავად ის დიდი პასუხისმგებლობით ეკიდება საკუთარ ჯანმრთელობას, რათა ავად არ გახდეს და „სახელმწიფოს ზედმეტ ტვირთად არ დააწვეს” –  რეგულარულად დადის აბანოში, ეკოლოგიურად სუფთა პროდუქტით იკვებება და ხშირად გადის ბუნების წიაღში დასასვენებლად.