ბაქოში აქციაზე დაკავებულები ქალაქიდან გაიყვანეს და გაათავისუფლეს
ოპოზიციური პარტიების, „რესპუბლიკური ალტერნატივისა“ და „მუსავათის“ არასანქცირებული მიტინგი 16 თებერვალს, 15:00 საათზე, ცენტრალური საარჩევნო კომისიის შენობასთან უნდა გაიმართოს. ქალაქის ხელისუფლება აქციის გამართვის უფლებას მხოლოდ იმ შემთხვევაში გასცემდა, თუკი ის გარეუბანში, ლოკბატანის დასახლებაში გაიმართებოდა. მაგრამ ოპოზიციონერები ამას არ დაეთანხმნენ და ქალაქის ცენტრში შეკრება გადაწყვიტეს.
ყველა, ვინც ბაქოში დღეს გამართულ მიტინგზე დააკავეს, უკვე თავისუფალია. პოლიციამ ისინი ავტობუსებით ქალაქიდან გაიყვანა.
ოპოზიციური პარტია “რეალის” ლიდერის, ილგარ მამედოვის თქმით, მას ოთხი საათის განმავლობაში “ატარებდნენ”, სანამ ტრასაზე გაიყვანდნენ და გამოუშვებდნენ.
17:00
დანიშნულ დროს, ცესკოს შენობის წინ, რამდენიმე ათეული ოპოზიციონერი და აქტივისტი, ასევე, ჟურნალისტი, ბევრი პოლიციელი და სპეცრაზმელი შეიკრიბა.
პოლიციამ ტერიტორიას ალყა შემოარტყა, აქციის მონაწილეები დააკავეს და ავტობუსებში შეყარეს. მათი ნაწილი გარკვეული მანძილით დააშორეს აქციის ტერიტორიას და გაათავისუფლეს.
წინასწარი მონაცემებით, სულ ცოტა 50 ადამიანი დააკავეს.
13:30
აქციის დაწყებამდე ორი საათით ადრე, ცესკოს შენობასთან პოლიცია შეიკრიბა.
აქციის გამართვის ადგილისკენ მიმავალ გზასა და სახლიდან გამოსვლისთანავე დააკავეს „რესპუბლიკური ალტერნატივის“ ლიდერი ილგარ მამედოვი და პარტია „მუსავათის“ რამდენიმე აქტივისტი.
