“TIR” sürücülərinin etirazı Bakıda nəqliyyatın hərəkətini iflic edib
Dörd “TIR” sürücüsü Bakıda əsas yolu kəsib və bununla da Azərbaycan paytaxtında böyük tıxacların yaranmasına səbəb olub. Aksiya təşkilatçıları iki məmurun əməllərinə etiraz ediblər. Həmin məmurlar yüngül həyəcanla canlarını qurtarıblar, etirazçılar isə saxlanılıb. Hakimiyyətin sürücülərin etirazına reaksiyası ekspertləri və cəmiyyəti hiddətləndiirb.
- Müstəqil jurnalist Bakıda polis şöbəsində döyülüb
- COVID-pasportu olan Azərbaycan vətəndaşlarının yarısı imtiyazlardan məhrum olacaq
- Əliyev “Media haqqında” qanunu imzalayıb. Azərbaycan prezidentini qərarını yenidən nəzərdən keçirməyə çağırırlar
Nə baş verib?
Fevralın 17-də səhər tezdən Azərbaycanda demək olar ki, bütün kütləvi informasiya vasitələri dörd böyüktonnajlı yük maşınının Bakının əsas yolunu – Heydər Əliyev prospektini kəsdiyi haqda məlumat yayıb. Bu magistral şəhərin mərkəzini aeroport və əhalisi sıx olan şəhərkənarı yaşayış məntəqələri ilə birləşdirir. Bakıda demək olar ki, bütün hərəkət dayanıb, böyük tıxaclar yaranıb.
Yük maşınlarının birinin üzərinə sürücülər etirazlarının səbəbini yazdıqları banner yerləşdiriblər.
“Bizi bu həddə çatdıran Dövlət Avtomobil Nəqliyyatı Xidmətinin rəisi Anar Rzayev və şöbə müdiri Malik Əliyev! İcazə vərəqələrini verin. Məhsullar xarab olmaq üzrədir. Müflis olmuşuq!”, – bannerdə yazılıb.
Məlum olub ki, sürücülərin dördü də “R Qrup Kargo” yerli logistika firmasını təmsil edir.
Tezliklə sürücülərin şikayətçi olduğu Dövlət Avtomobil Nəqliyyatı Xidməti bəyanatla çıxış edib. “İcazələrin bölgüsü prosesində daşıyıcıların özlərinin də iştirakı təmin edilib. Yalnız bir daşıyıcı – Rəmiş Cəfərov belə bölgüyə qarşı çıxaraq özünə əlavə imtiyazlar tələb edib”, – qurumun məlumatında deyilir.
Bir qədər sonra Rəqəmsal İnkişaf və Nəqliyyat Nazirliyində təcili iclas keçirildiyi, sürücülərin əməllərinə qarşı etiraz etdikləri Anar Rzayevə xəbərdarlıq edildiyi, Malik Əliyevin isə vəzifəsindən azad olunduğu haqda KİV-də məlumat yayılıb.
Bu xəbərlə təxminən eyni vaxtda polis etirazçı sürücülərin saxlanıldığı haqda bildirib. Yük maşınları hadisə yerindən aparılıb, şəhərdə hərəkət bərpa olunub.
Bir neçə dəqiqədən sonra Rəqəmsal İnkişaf və Nəqliyyat Nazirliyi məmurların cəzalandırılması xəbərini təkzib edib: “Dövlət Avtomobil Nəqliyyati Xidmətində heç kim işdən azad olunmayıb və heç kimə xəbərdarlıq edilməyib”.
Fevralın 17-də axşam Daxili İşlər Nazirliyi Bakıda yolu kəsən dörd sürücüyə qarşı cinayət işinin qaldırıldığı haqda bildirib. Onlar “ictimai asayişi pozan əməllərin təşkilində və bunda fəal iştirakda” ittiham olunurlar.
Telekanallarda xəbərlərin axşam buraxılışında etirazçı sürücülərin “vətəndaşlara yaratdıqları narahatlığa” görə üzr istədiklərini əks etdirən videolar yayılıb.
Hüquq müdafiəçisi polis şöbəsində döyülüb
Sürücülərin saxlanıldığı haqda məlumat yayılandan sonra “Müdafiə xətti” təşkilatının hüquq müdafiəçiləri sürücülərin saxlanıldığı polis şöbəsinə yollanıblar.
Hüquq müdafiə təşkilatının rəhbərlərindən biri Rüfət Səfərovun sözlərinə görə, onun özünü polis şöbəsinin binası qarşısında saxlayıb, içəri aparıblar, döyüb və təhqir ediblər. Təxminən bir saat sonra hüquq müdafiəçisi azad olunub.
Jurnalistlərə müsahibəsində saxlanılan sürücülərdən birinin atası danışıb ki, onların evinə 15 nəfərə yaxın maskalı şəxs girib, ailə üzvlərini döyüb və onun oğlunu özləri ilə aparıblar.
Daxili İşlər Nazirliyinin mətbuat xidmətindən bildirilib ki, sürücünün atasının danışdıqları yalandır.
Şərh
“Yük maşınları ilə bağlı dünənki vəziyyət haqda.
İnsanlar böyük çətinliklə, yüzlərlə maneəni aşaraq, biznes qururlar. Üstəlik bu, qlobal biznesdir – beynəlxalq yükdaşımadır – daha böyük zəhmət tələb edir.
Sahibkara öz biznesini inkişaf etdirməyə, daha uğurlu olmağa, yeni iş yerləri açmasına, daha çox vergi ödəməsinə kömək etmək əvəzinə, dövlət strukturları onları müflisləşdirmək üçün əllərindən gələni edirlər (yük maşınlarında ət vardı).
İnsanlar dinc yolla öz etirazlarını bildiriblər. Özümdən bilirəm – strukturlara səsini çatdırmaq mümkün deyil, sahibkarları sağımlıq inək kimi görürlər. Dinc yolla! Çarəsizlikdən!
Onları çağırıb, dinləmək, kömək etmək, problemi yoluna qoymaq, dövlətin bisnesmenlərə, biznes mühitinə qayğı göstərdiyini sübut etmək əvəzinə sürücüləri saxlayıb, “ramzankadırovsayağı” səfeh üzrxahlıq videoları çəkiblər”, – Bakıda kitab mağazaları şəbəkəsinin sahibi Nigar Köçərli sosial şəbəkədə yazıb.
“İlham Əliyev bu 4 TIR sürücüsündən qorxmursa, həqiqətən xalqa arxalanırsa, bu gün sürücülər azad edilməli, problemləri araşdırılmalıdır. Etməsə, sürücülərin müdafiə komitəsi yaradılmalı, onlara dəstək verməliyik.
18 ildir Əliyevə görə hər gün yollar bağlanır, saatlarla tıxacda qalırıq. Bir gün də etirazını başqa cür dinləmədiklərinə görə TIRlarla edən sürücülərə görə tıxac yaranmasına dözmək olar”, – İctimai fəal Baxtiyar Hazıyev yazıb.
