Tbilisidə keçirilən aksiyanı dağıtmaq üçün polis güc tətbiq edib. 16 nəfər saxlanılıb
Tbilisidə etirazlar
Noyabrın 19-da səhər tezdən polis və xüsusi təyinatlılar Tbilisinin mərkəzi prospektlərindən birində dinc nümayişi dağıtmaq üçün güc tətbiq ediblər. Etirazçıları başqa əraziyə köçürmək cəhdi qarşıdurma ilə nəticələnib.
Aralarında qadınların da olduğu 16 nəfər həbs edilib. Video görüntülərdə polisin etirazçıları vəhşicəsinə döydüyü görünür. Bir çox jurnalistlərin işləməsinə qadağa qoyulub. Onlardan biri də döyülərək həbs edilib.
Yeni parlament seçkiləri tələbi ilə etirazçılar noyabrın 17-si axşamdan Tbilisidə Çavçavadze prospektini bağlayıblar. Noyabrın 19-da səhər tezdən buraya minlərlə polis və xüsusi təyinatlılar cəlb olunub.
Hüquq-mühafizə orqanlarının əməkdaşları mitinq iştirakçılarına bir neçə tərəfdən hücum edib, onların qurduqları çadırları dağıdıb və insanları qonşu Melikişvili prospektinə doğru qovublar.
Etirazçıları küçənin başqa hissəsinə sıxışdırmaq cəhdi qarşıdurmaya səbəb olub. Polis sərt saxlamalara başlayıb.
Jurnalistlərin və mitinq iştirakçılarının yaydığı kadrlardan görünür ki, saxlanılanlar arasında bir azyaşlı da var. Anasının onu polisin əlindən qopararaq apardığı iddia edilir.
Melikişvili prospektində davam edən etiraz aksiyası zamanı müxalif “Mtavari Arxi” telekanalının operatoru Sergi Baramidze də saxlanılıb. Məlumatı yayan kanal polisin operatoru döyərək kamerasını sındırdığını bildirib. Saxlanılandan iki saat sonra operator iltizamla buraxılıb.
“Hətta məni saxlayanda pencəyimi çıxartdılar. Məni polis bölməsinə aparandan sonra [zorakılıq olmayıb], sadəcə zəng vurulan zaman polisə gəlməli olduğum haqda iltizam imzalatdılar, vəssalam”.
Media, İnformasiya və Sosial Araşdırmalar Mərkəzinin məlumatına görə, mitinqin dağıdılması zamanı “OC Media”nın jurnalisti Mariam Nikuradzeyə də işləməyə imkan verilməyib və onun saxlanılanların fotolarını çəkdiyi mobil telefonu əlindən alınıb.
Daha bir neçə jurnalist fiziki zorakılığa və məhdudiyyətlərə məruz qalıb.
Müxalif “Milli Hərəkat” partiyasının liderlərindən biri Giorgi Vaşadze bildirib ki, yüksək rütbəli polis əməkdaşları onu və partiyanın digər lideri Nika Meliyanı saxlamağa cəhd ediblər.
Hazırda saxlanılanlar arasında müxalifətin “Dəyişiklik Naminə Koalisiya”sının üzvlərinin də olduğu məlum olub. Onlardan biri – Nik Kvitatiani xəstəxanaya yerləşdirilib.
“Mtavari Arxi”nin operatoru ilə birlikdə daha iki saxlanılan qadının sərbəst buraxıldığı artıq məlumdur.
Gürcüstanın Gənc Hüquqşünaslar Assosiasiyasının sədri Nona Kurdovanidzenin sözlərinə görə, qeyri-hökumət təşkilatlarının vahid qaynar xəttinə saxlanılan 12 nəfər barədə məlumat daxil olub.
“Vəkillər onların yerini müəyyənləşdirməyə çalışırlar, biz heç kimi köməksiz qoymayacağıq”, – Kurdovanidze vəd edir.
Daxili İşlər Nazirliyi “Publika” internet nəşrinə 16 nəfərin saxlanılmasını təsdiqləyib, onlardan üçü artıq zaminə buraxılıb.
Bu arada, müxalifət liderlərinin fikrincə, etirazlar dayanmır və indiki mərhələdə “mobil” aksiyaya çevriləcək.
“Bir nömrəli qayda: biz [polisə] özümüzü tutmaq imkanı vermirik. İkinci qayda: polislə məsafəmizi saxlayırıq; bizə tərəf hərəkət etsələr, biz də hərəkət edəcəyik, onlar dayansa, biz də dayanacağıq”, – Giorgi Vaşadze aksiya iştirakçılarına bu və digər təlimatları verib.
