Stalin İnquşetiyada qadağan edilib

İnquşetiya ərazisində Stalinin xatirəsini əbədiləşdirməyi qadağan edən qanun layihəsi Respublika Xalq Məclisinin deputatları tərəfindən ilk oxunuşda yekdilliklə qəbul edilib.

“Region ərazisində Stalinin xatirəsinin əbədiləşdirilməsinin qadağan edilməsi haqqında” qanun layihəsi inquş xalqının 1944-cü il fevralın 23-də sürgün olunmasının73-cü ildönümü ərəfəsində qəbul edilib.

“Qanun bütöv xalqları və ayrı-ayrı vətəndaşları kütləvi repressiyalara məruz qoymuş Stalinin xatirəsinin əbədiləşdirilməsinə qadağa qoyulmasını nəzərdə tutur”, – Respublika Parlamentinin sədri Zəlimxan Yevloyev bildirib.

O qeyd edib ki, qanun yalnız Stalinə heykəl və büstlərin qoyulmasını, onun adının şəhərlərə, kəndlərə, küçələrə verilməsini deyil, həmçinin onun əməllərinə açıq-aşkar haqq qazandırmağı da qadağan edir. O cümlədən də sovet öndərinin şəkillərinin ictimai yerlərdə və inzibati məkanlarda yerləşdirilməsini də yasaqlayır.

“Onlarla xalqı deportasiyaya məruz qoyan insana, on minlərlə ziyalını və hərbçini güllələtdirən, məhbəslərə göndərən tirana heykəl qoymaq, ondan qəhrəman düzəltmək ədəbsizlikdir”, – Xalq Məclisinin deputatı Məryəm Amriyeva bildirib.

1944-cü il fevralın 23-də inquş və çeçen xalqları Qazaxıstan və Qırğızıstana sürgün edilmişdi. Sürgün edilənlərin üçdə bir hissəsi yolda və 13 illik sürgün müddətində aclıqdan, soyuqdan və xəstəliklərdən tələf olublar.

Gürcüstanda, Stalinin doğma şəhəri Qoridə isə “dahi sərkərdə az qala Allahdır – toxunulmaz və ölməz. Burada onun çoxlu sayda davamçısı var: bu insanlar inanırlar ki, İosif Djuqaşvili (Stalin) Gürcüstanda dünyaya gələn (və gələcək) ən dahi şəxsiyyətlərdən biridir. “Dahi sərkərdənin ölümündən artıq 64 il keçir, amma onun təcəssümünü Gürcüstanın bütün ərazisində müxtəlif formalarda və müxtəlif yerlərdə görmək mümkündür. Gürcüstanda Stalinin pərəstişkarları – reportaj JAMnews.