Məktəblər və metro bağlanır: Azərbaycanda karantin yenidən sərtləşdirilir

Azərbaycanda koronavirusa yoluxma hallarının kəskin çoxalması ilə əlaqədar yenidən karantin rejiminin sərtləşdirilməsi haqda elan olunub. Bakı metropoliteni və ölkədəki bütün təhsil müəssisələri bağlanır. Hakimiyyət yaxın günlərdə digər qadağaların tətbiqi haqda xəbərdarlıq edib.

• “Hər iki ölümdən birində prezident günahkar sayılmalıdır”. Abxaziya niyə pandemiya ilə mübarizədə Rusiyadan yardım istəyir? 

• Ermənistanda koronavirusa yoluxanların sayına görə yeni anti-rekord

Bugün Azərbaycanın Nazirlər Kabineti yanında Operativ Qərargah 509 yeni COVID-19 virusuna yoluxma halı qeydə alındığı haqda elan edib. İki nəfər ölüb, 129 nəfər sağalıb və xəstəxanadan evə buraxılıb. Pandemiya başlayandan Azərbaycanda 43 789 nəfər koronavirusa yoluxub, onlardan 621 nəfər ölüb, 39 800 nəfər sağalıb.

Sanitar-epidemioloji vəziyyətdən, aktiv müalicə fazasında olan koronavirus xəstələrinin sayından və virusun yayılma sürətindən çıxış edərək aşağıdakı məhdudiyyətlər tətbiq edilir:

• 19 oktyabr 00:00-dan 2 noyabr 06:00-a qədər Bakı metropolitenində sərnişin daşınması dayandırılır;

• Oktyabrın 19-dan noyabrın 2-ə qədər ölkənin bütün təhsil müəssisələrində tətil elan olunur.

Azərbaycan Respublikasının Nazirlər Kabinetinin sərəncamı ilə dövlət strukturlarında əməkdaşların sayı 30 faizə qədər azaldılacaq, qalanlar distant rejimdə işləyəcək.  Bu qaydanın özəl sektor və digər sahələrdə fəaliyyət göstərən müəssisə və təşkilatlarda tətbiq edilməsi tövsiyyə olunur.

Yüksək risk qrupuna daxil olan 65 yaşdan yuxarı şəxslərə xüsusi ehtiyac olmadan küçəyə çıxmamaq məsləhət görülür.

Koronavirusa yoluxma hallarının artımının davam etməsi halında digər qadağaların tətbiqinin mümkünlüyü ilə bağlı əhaliyə xəbərdarlıq edilib.

2020-ci il noyabrın 2-ə qədər bütün ölkə ərazisində karantin rejimi qüvvədə olacaq. Karantinin uzadılması ilə bağlı qərar ənənəvi olaraq təqvim ayının sonunda qəbul edilir.