Jurnalist fəaliyyətinə görə ölümlə hədələnib
Azərbaycanda naməlum şəxs jurnalisti peşə fəaliyyətindən çəkindirmək məqsədilə təhdid edib. Aytən Məmmədovanın bildirdiyinə görə, onun boğazına bıçaq dirəyən şəxs ondan adını çəkmədiyi məhkəmədən yazmamağı tələb edib.
- Azərbaycanda “Media haqqında” qanun qəbul edilib: bu nə deməkdir? Müstəqil jurnalistlərin şərhləri
- Azərbaycanda müstəqil jurnalistlər “Media haqqında” qanuna qarşı
- “Pegasus” proqramı – Azərbaycanda müstəqil jurnalistlərə və fəallara qarşı gizli silah
Nə baş verib?
Mayın 8-də gecə jurnalist Aytən Məmmədova evə qayıdarkən Bakıda yaşadığı binanın liftində hücuma məruz qalıb. Arxasınca liftə daxil olan tanımadığı şəxs jurnalistin boğazına bıçaq dirəyərək onu və azyaşlı qızını ölümlə hədələyib, “ağıllı olmağı” və adını çəkmədiyi məhkəmə prosesi haqda yazmamağı tələb edib.
“Çənəmin altından çox möhkəm ağrı verəcək tərzdə tutub sıxdı və bıçağı boğazıma dirədi. Dedi ki, məhkəmə işi barədə yazmayım. Qızımla hədələdi, amma hansı iş barədə hədələdiyini demədi”, – jurnalist hadisə yerinə gələn həmkarlarına danışıb.
Aytən Məmmədova ictimai maraq kəsb edən məhkəmə proseslərinin işıqlandırılması, müxtəlif işlərin mühakiməsində ortaya çıxan qaranlıq məqamların araşdırılması ilə tanınır. Jurnalist bu işlərlə bağlı sosial şəbəkələrdə də tez-tez statuslar yazaraq ictimaiyyətin diqqətini səs-küylü məhkəmə proseslərinin şübhəli tərəflərinə cəlb edir.
Son dövrdə Aytən Məmmədovanın əsas izlədiyi və işıqlandırdığı məhkəmə prosesi Azərbaycanın Tovuz rayonu Dondar Quşçu kəndində 10 yaşlı Nərmin Quliyevanın qətlə yetirilməsi ilə bağlıdır.
Jurnalist özü və yaxın ətrafı hücumun məhz bu işlə bağlı olduğuna əmindir.
10 yaşlı Nərminin qətli
2019-cu ilin noyabrında azyaşlı Nərmin itkin düşüb. 2020-ci ilin yanvarında isə uşağın yandırılmış meyiti yaşadığı kəndin ərazisində tapılıb. Şübhəli olaraq kənd sakini 1973-cü il təvəllüdlü İlkin Süleymanov həbs edilib.
Ötən ilin mayında İlkin Süleymanov məhkəmə qarşısına çıxarılıb və o, ifadəsində bildirib ki, Nərmin Quliyevanın qətlini ağır işgəncələr altında boynuna almağa məcbur olub.
Proses zamanı dinlənilən şahid ifadələrində bir-birinə uyğun gəlməyən məqamlar ortaya çıxıb, məsələ ilə bağlı rayonun o zamankı polis rəisi də daxil olmaqla bir sıra yüksək vəzifəli şəxslərin adları hallanır.
10 yaşlı Nərminin qətli və faktla bağlı aparılmış cinayət araşdırmasındakı ziddiyyətlər ictimailəşəndən sonra ölkə prezidenti İlham Əliyev bu işi şəxsi nəzarəti altına götürüb. Və iş sıradan kriminal hadisə olmaqdan çıxıb.
Faktla bağlı cinayət işi qaldırılıb
Hücuma məruz qalandan dərhal sonra jurnalist 102 polis xidmətinə müraciət edib. Qısa müddətdə hadisə yerinə gələn polislər Aytən Məmmədovanın ifadəsini alıblar. Səhəri gün (9 may) jurnalist tibbi ekspertizadan keçirilib. Qeyd edək ki, jurnalistin boğazında bıçaq izi qalıb.
Daxili İşlər Nazirliyi mətbuat xidmətinin yaydığı məlumata görə, jurnalistə qarşı edilən hücumla bağlı Cinayət Məcəlləsinin 134-cü (Öldürməklə və ya sağlamlığa ağır zərər vurmaqla hədələmə) maddəsi ilə cinayət işi başlanıb.
İctimaiyyət ədalətli araşdırma tələb edir
“Müdafiə Xətti” hüquq-müdafiə təşkilatı jurnalistlərlə birlikdə Aytən Məmmədovanın məruz qaldığı hücumla bağlı mətbuat konfransı keçirib.
“Azərbaycan hakimiyyətinin fundamental azadlıqlara arxa çevirdiyini nəzərə alsaq, bu hadisəni Azərbaycanda Elmar Hüseynovun qətli ilə başlayan prosesin davamı hesab edirəm. Azərbaycanda mətbuata qarşı ilk güllə Elmar Hüseynovla bağlı açıldı, ardınca Rafiq Tağı, Rasim Əliyev oldürüldü. İndiyə qədər bu cinayətlərin heç biri açılmayıb. Açılmaması da onu göstərir ki, bütün bu hadisələr siyasi sifarişdir və məqsədli şəkildə Azərbaycan mediasının susdurulmasına hesablanıb. Əgər Aytən Məmmədovaya qarşı hücum da digər cinayət işləri kimi araşdırılmayacaqsa məsuliyyət beynəlxalq təşkilatlar qarşısında media azadlığını təmin edəcəyinə dair öhdəlik götürmüş İlham Əliyev hakimiyyətinin üzərində qalacaq”, – jurnalist Şəmşad Ağa mətbuat konfransında bildirib.
Jurnalistlərdən, ictimaiyyət nümayəndələrindən ibarət bir qrup Aytən Məmmədovaya qarşı edilən hücumla bağlı Azərbaycan prezidenti İlham Əliyevə, daxili işlər naziri Vilayət Eyvazova, Dövlət Təhlükəsizlik Xidmətinin rəhbəri Əli Nağıyevə, baş prokuror Kamran Əliyevə açıq müraciət ünvanlayıb.
“Bir daha vurğulayırıq ki, jurnalist Aytən Məmmədovaya edilən hücum, söz və mətbuat azadlığına edilən hücumdur. Onun boğazına dirənən bıçaq bütün jurnalistlərin boğazına dirənən bıçaqdır. Bu səbəbdən ölkə başçısından və hüquq mühafizə orqanlarından tələb edirik ki, bütün jurnalistlərin təhlükəsizliyi və güvənli olaraq öz peşə fəaliyyətlərini yerinə yetirə bilmələri üçün cinayətkar və bu cinayətin arxasında dayanan şəxslər tez bir zamanda tapılaraq cəzalandırılsın!”, – müraciətdə deyilir.
