Həbsdə olan keçmiş siyasi mühacirin həyat yoldaşına ölkədən çıxmaq qadağan edilib
Keçmiş siyasi mühacir həbs edilib
İyulun sonunda Almaniyadan qayıdandan sonra Bakıda həbs edilən keçmiş siyasi mühacir Anar Əliyevin həyat yoldaşına Azərbaycanı tərk etmək qadağan olunub. Qadın uşaqları ilə birlikdə dərs ilinin əvvəlində yaşadığı yerə qayıda bilməməsindən narahatdır. O, artıq ölkədən çıxışına qoyulan qadağa ilə bağlı məhkəməyə şikayət edib. Ekspertin fikrincə, Azərbaycan qanunlarına əsasən, yalnız ittiham olunan şəxslərin ölkədən çıxışına qadağa qoyula bilər.
- Azərbaycan sərhədləri daha iki ay bağlı qalacaq
- “Banditizm”də Bəxtiyar Hacıyev Facebook statuslarını silməyə məcbur edilib
- Yerli hüquq müdafiəçiləri həbsdəki Ermənistan vətəndaşlarına baş çəkiblər
Növbəti siyasi mühacirin həbsi
Anarə Əliyeva deyir ki, qayınatası xəstə olduğu üçün həyat yoldaşı Anar Əliyevlə və övladları ilə birlikdə iyulun 8-də Almaniyadan Bakıya gəliblər. Avqustun 4-də geriyə biletləri də əllərində olub. Cütlük Almaniyada işləyir, uşaqlar isə orada məktəbdə təhsil alırlar.
Amma iyulun 25-də Anar Əliyev polisə çağırılıb və artıq evə qayıtmayıb. Anarə Əliyevanın sözlərinə görə, əri narkotik satışında ittiham olunur.
“Dedilər ki, Anarın cibindən külli miqdarda narkotik çıxıb, buna görə onu Nizami rayon Baş Polis İdarəsinə aparıblar. Bu, necə ola bilər? Həmin şalvarı ona əlimlə vermişəm, cibində heç nə yox idi. Anar narkotik istifadə etmir, heç vaxt da etməyib. Amma heç narkotik istifadə edən adam cibinə onu qoyub polis bölməsinə getməz”, – Anarə bildirib.
Onun sözlərinə görə, Anar Əliyev əslində Azərbaycanda insan haqlarının pozulmasına qarşı Almaniyada keçirilən etiraz aksiyalarında iştirak etdiyinə görə həbs edilib.
“Məndən bir neçə hüquq-mühafizə orqanının yüksək rütbəli əməkdaşı Anarın narkotik istifadəçisi olduğunu təsdiq edən kağız yazmasını istəyiblər. Nizami rayon Polis İdarəsinin istintaq şöbəsindən Rüfət İbayev, müstəntiq Ayxan Təhməzli və digərləri həmçinin Anarın və mənim valideynlərimdən yazılı izahat alıblar ki, mən Almaniyaya gedəcəyim halda, bu məsələni ictimailəşdirməyəcəm və xarici təşkilatlara bu barədə heç bir informasiya verməyəcəm, kömək istəməyəcəm. Mənimlə söhbət zamanı da bunu istəyiblər, mən də söz vermişəm. Çünki işimi, oradakı uşaqlarımın gələcəyini itirmək istəmirdim. Ancaq sonradan bildim ki, ölkədən çıxışıma qanunsuz olaraq “stop” qoyulub”, – Anarə Əliyeva sosial şəbəkədə yazıb.
Ölkədən çıxış qadağasından şikayət edilib
Vəkil Elçin Sadıqov fəalın həyat yoldaşının ölkədən çıxışına qadağa qoyulması ilə bağlı Bakının Nizami Rayon Məhkəməsinə şikayət edib.
“Biz qadağanın qanunsuz sayılması və onun ləğv edilməsi xahişilə məhkəməyə müraciət etmişik”, – Sadıqov Turan-a bildirib və qeyd edib ki, Anarə Əliyeva nə şahid, nə zərərçəkən, nə də təqsirləndirilən şəxs qismində istintaqa cəlb olunmayıb. Şikayətə baxılması sentyabrın 1-nə təyin edilib.
Anarə Əliyeva Turan-a deyib ki, şantaja məruz qalır.
“Nizami Polis İdarəsində həyat yoldaşımı yola gətirməyi, onu “cinayət törətdiyini etiraf etməyə” razı salmağı, həmçinin mətbuata və beynəlxalq təşkilatlara bu məsələ barədə məlumat verməməyi təklif edirlər. Bunun əvəzində ölkədən çıxışa qadağanın götürüləcəyini vəd edirlər.
Mən belə bir qanunsuz sövdələşməni qəti şəkildə rədd etdim. Bundan sonra məni təqsirləndirilən şəxs qismində cəlb edəcəklərilə hədələdilər”, – Anarə Əliyeva deyib.
Ekspert rəyi
Hüquq sahəsində ekspert Namizəd Səfərov Əliyevanın ölkədən getməsinə qoyulan qadağanı əsassız adlandırıb.
“Cinayət Prosessual Məcəlləsinə əsasən ölkədən çıxışa qadağa yalnız təqsirləndirilən şəxsə şamil edilə bilər. Azərbaycanın heç bir qanununda zərərçəkənlərin, şahidlərin və ya şahid qismində cəlb oluna bilən şəxslərin ölkədən çıxışına məhdudiyyətlərin qoyulması ilə bağlı qaydalar yoxdur. Eyni zamanda, Cinayət Prosessual Məcəlləsinə əsasən təqsirləndirilən şəxsin ailə üzvləri onun əleyhinə ifadə vermək üçün şahid qismində cəlb oluna bilməzlər, bu, Konstitusiyaya ziddir”, – Səfərov bildirib.
Daxili İşlər Nazirliyinin mətbuat xidmətinin rəhbəri Elşad Hacıyev bundan öncə bildirib ki, Anar Əliyev konkret cinayət əməli törətməkdə şübhəli bilinərək cəlb olunub, istintaq davam edir”.
O, həbs edilən şəxsin xanımının söylədiklərinin həqiqətəuyğun olmadığını bildirib.
