Gürcüstanın yüksək dağlıq ərazisində baş vermiş aviaqəzada üç nəfər həlak oldu
Gürcüstanın Kazbegi rayonunda özəl vertolyotun qəzaya uğraması nəticəsində üç nəfər həlak olub. Vertolyot “Rums Otel Kazbegi” otelinə xidmət göstərən “Aviator” şirkətinə məxsus olub. Pilot və mehmanxananın iki əməkdaşı həlak olublar.
Aviaqəza günorta vaxtı yaşayış məntəqələrindən kənarda Daba Stepantsminda kəndindən bir qədər aralıda baş verib.
Stepantsminda yaxınlığında nə baş verib
“İnterpresnyus” agentliyi şahidlərin özlərini dərc edib. Onların bildirdiklərinə görə, “vertolyot havada ikən alışıb, qığılcımlar və tüstü çıxıb, sonra isə o yerə düşüb”.
Hadisə yerinə Xilasetmə xidmətinin əməkdaşları, təcili yardım, polis və ekspert-kriminalistlər gəliblər.
DİN təhlükəsizlik və ya nəqliyyatın istifadəsi qaydalarının pozulması faktı üzrə cinayət işinə başlayıb.
Kazbegidə yerləşən “Rums Otel”in sahibi olan “Açara Qrupp” şirkəti pilotun və şirkətin iki əməkdaşının həlak olması faktını təsdiqləyib. “Açara Qrupp” həlak olanların ailələrinə dərin hüznlə başsağlığı verib və istintaqla qeyd-şərtsiz əməkdaşlığa hazır olduğunu bildirib.
İqtisadiyyat Nazirliyi: vertolyot təzə və saz idi
Kazbegidə qəzaya uğramış vertolyot ABŞ-Kanada istehsalı olan “BELL-505” tipinə aiddir. O, 2018-ci ildə istehsal olunub və elə həmin ilin iyun ayının 15-də Mülki aviasiya agentliyində qeydiyyatdan keçib. Bu barədə Gürcüstan İqtisadiyyat və inkişaf nazirliyinin bəyanatında deyilir. Qurumdan verilən informasiyaya görə, Kazbegi bələdiyyəsində baş vermiş faciəvi hadisənin səbəb və təfərrüatlarının araşdırılması üçün aviasiya və dəniz nəqliyyatı sahəsində hadisələrin araşdırılması bürosunun rəhbəri hadisə yerinə yollanıb.
“Hazırkı mərhələdə bizdə olan məlumata əsasən, vertolyot texniki baxışdan uğurla keçib və onu təcrübəli pilot idarə edib. Vertolyot “Aviator +” şirkətinə (Açara Qrupp) məxsus olub”, – qurumun bəyanatında deyilir.
Elektrik ötürücü xətləri ilə toqquşma?
Qəza elektrik ötürücü xətləri ilə toqquşmanın nəticəsi deyil. Bunu “EnerqoPro Corcia” şirkətindən bildiriblər. Şirkətdə bu versiyanı qəti şəkildə təkzib ediblər və vurğulayıblar ki, Kazbegidə elektrik ötürücü xətləri zədələnməyib və fasiləsiz çalışırlar.
