Alman siyasətçi: NATO-nu ləğv eləmək lazımdır

Almaniya Bundestaqında Sol partiya fraksiyasının sədri Sara Vaqenknext NATO-nun buraxılmasını və Avropada Rusiyanın iştirakı ilə yeni alyansın yaradılmasını təklif edib.Bununla da alman siyasətçi Şimal-Atlantik Alyansın “köhnəldiyini” deyən yeni seçilmiş ABŞ prezidenti Donald Trampın səsinə səs vermiş olub. “NATO-nu buraxmaq və onu Rusiyanın da daxil olacağı kollektiv təhlükəsizlik sistemilə əvəz etmək lazımdır”, – Vaqenknext bəyan edib.

“Alman dalğası”nın xəbər verdiyi kimi Vaqenknext həmçinin Almaniya hökumətini “yanlışlarda və uğursuzluqlarda” günahlandırıb.Sol partiyasının nümayəndələri zaman-zaman Almaniya hökumətinin və Aİ-nin RF ilə bağlı siyasətini tənqid edirlər. Əsasən də Moskvaya qarşı tətbiq edilən sanksiyaların “təhlükəli” olduğunu bildirirlər.Almaniyanın Bild və Britaniyanın The Times nəşrlərinə yanvarın 15-də verdiyi müsahibəsində Tramp NATO-nu köhnəlmiş qurum adlandırıb və bəyan edib ki, alyansa daxil olan əksər ölkələrin “ödəməli olduğunu ödəməməsini” ABŞ-a qarşı ədalətsizlik hesab edir. Hərçənd, “qalan məsələlərdə NATO mənimçün önəmlidir”, – yeni seçilmiş ABŞ prezidenti  bildirib.