Gəncəni dəyişmək istəyən Zeytun və Alisa - VİDEO
Əgər sizi gözübağlı bu məhəlləyə gətirsələr və Gəncənin mərkəzindən bir addımlıq məsafədə olduğunuzu deməsələr, buna heç vaxt inanmazsınız. Dar küçələr, nimdaş evlər Azərbaycanın ikinci şəhərinin çox müasir mərkəzinin düz ortasında yerləşir. Bu evlərdən birində Zeytun yaşayır və o, Gəncəyə alternativ teatr sənəti gətirib.
- Bakıda aktyorun küçə performansı zorakılıqla dayandırılıb – VİDEO
- Azərbaycanın ilk müstəqil teatrı Milli teatr günündə küçəyə atılıb
- İl yarımdan sonra Azərbaycanda teatrlar və kinoteatrlar fəaliyyətini bərpa edə bilər
Zeytun Həsənovun sözlərinə görə, teatr sənəti ilə 2021-ci ilin fevral ayında maraqlanıb və özünü bu işə həsr etməyə qərar verib.
Dörd ay ərzində sürətləndirilmiş teatr kursları keçib, daha sonra isə ilk tamaşaları – “Tetris” baş tutub.
Növbəti performansları yalnız festivallara təsadüf edir, çünki Gəncədə onları maliyyələşdirən, yerlə təmin edən olmayıb. İki performanslarını “DAO” adı altında nümayiş etdiriblər. “Dao” Çin dilində “yol” deməkdir.
Zeytun bir müddət sonra “Mistral” adı altında tək fəaliyyət göstərməyə başlayıb. İlk tək performansı “Soyuncaq” olub. O, bu tamaşanı 20 günlük depressiya müddətində ərsəyə gətirib. “İnsanların iplərlə idarə olunduğunu düşünürdüm və buna istinadən tamaşanı qurmuşdum”, – Zeytun deyir.
“Gəlincik” performansı isə həmin dövrdə aktual olan uşaqlara qarşı cinsi qısnamaya, erkən nikahlara fokuslanıb. Bu performansların hər birini Zeytun öz evində – emalatxanasında nümayiş etdirib.
Zeytun deyir ki, Gəncədə birdən-birə bir neçə “cəbhə”də mübarizə aparırlar. Hətta şort geyindiyinə görə yaşadığı məhəllədə iradlarla qarşılaşdığını da xatırlayır:
“Məni bir dəfə bir dayı kənara çəkib, xəbərdarlıq etdi ki, burada şort geyinmə. Mənsə qulaq asmadım və hər gün küçəyə şortda çıxmağa davam etdim. 10 gün sonra gördüm ki, həmin dayı da şort geyib. Onlar məni yox, mən onları dəyişdirirəm”.
“Auditoriyamız öz tanışlarımızdır. Həm barmen işləmişəm, həm əl işlərimə görə tanıyanlar var. Toplayanda az da olsa, bir kütlə ortaya çıxır”, – Zeytun performanslarını izləyənlər barədə danışır.
Onun yaşadığı və fəaliyyət göstərdiyi məkanda Alisa adlı pişik də var. Zeytun deyir ki, bu adı təsadüfən seçməyib: “Alisa möcüzələr diyarında” əsərini xatırladım. yaşadığım məkanı Gəncə üçün elə möcüzə adlandırmaq olar. Ona görə də, pişiyə belə ad verdim”.
“Mənim əsas fokusum Gəncədə nəyisə dəyişə bilməkdir. Bir şort geyinməklə nələrisə dəyişdiyimi gördüm, bu, mənə stimul verdi ki, daha çoxuna can atım”, – Zeytun sözlərini yekunlaşdırıb.
