Ermənistanda ali məktəb tələbələri təhsilə görə ordudan möhlətin ləğvinə etiraz edirlər

Bir qrup gənc Yerevanın mərkəzi küçələrində “Elm naminə möhlət mövcud olacaq” yazılmış plakatlarla yürüş keçiriblər. Onlar 18 yaşı tamam olmuş tələbələrin əvvəlcə təhsillərini başa vurub, daha sonra orduda xidmət etmələrini nəzərdə tutan mövcud qanunun dəyişdirilməməsini tələb ediblər.

İş orasındadır ki, Ermənistan hökuməti hərbi xidmət haqda qanunun dəyişdirilməsini və yalnız Müdafiə Nazirliyi ilə müqavilə imzalamış tələbələrə hərbi xidmətdən möhlət verilməsi ilə bağlı qanun layihəsi təqdim edib.

Hazırda möhlət ali məktəblərdə ödənişsiz əsaslarda təhsil alan tələbələrə verilir.

“Onlar deyirlər ki, çoxları təhsil möhlətini hərbi xidmətdən yayınmaq üçün istifadə edir. Amma biz hesab edirik ki, nəticədə məhz elmlə məşğul olmaq istəyənlər ziyan çəkəcəklər. Bu isə o deməkdir ki, bilavasitə elm ziyan çəkəcək”,  – Yerevan Dövlət Universitetinin tələbələrindən biri JAMnews-a bildirib.

Aksiya iştirakçıları vurğulayıblar ki, onlar Ermənistanda hər bir gəncin orduda xidmət etməli olduğu fikrini dəstəkləyirlər. Onlar sadəcə gələcək karyeralarını elmlə bağlamaq istəyənlərin maraqlarının nəzərə alınmasını istəyirlər.

Ermənistanın müdafiə naziri Vigen Sarqsyan da hesab edir ki, tələbə möhlətlərdən hərbi xidmətdən yayınmaq üçün istifadə olunmamalıdır.

O, jurnalistlərə bildirib ki, bu məsələnin nizamlanması üçün tələbələrə müqavilə imzalamaq təklif olunur. Bu müqaviləyə əsasən onlar təhsil zonasında Müdafiə Nazirliyinin təyinatına əsasən hərbi hazırlıq və xidmət keçməyi öhdələrinə götürürlər.

Bununla yanaşı nazirliklə müqavilə imzalayanlar iki yox, üç il hərbi xidmət çəkəcəklər.

“Möhlət hüququ ləğv olunmur, sadəcə bu hüquq xidmət növü ilə əlaqələndirilir. Ali təhsil aldıqdan sonra faydalı olmaq və silahlı qüvvələrdə zabit kimi xidmət etmək istəyən vətəndaş belə bir imkan əldə edəcək”, – Vigen Sarqsyan deyir.

Hüquq müdafiəçiləri də yeni layihə ilə bağlı narahatlıq ifadə ediblər. Helsinki Vətəndaş Assambleyasının Vanadzordakı rəhbəri Artur Sakunts bildirib ki, bu yolla cəmiyyət əhəmiyyətli dərəcədə hərbiləşdirilmiş olacaq.

Tezliklə qanun layihəsi Milli Məclisdə müzakir olunacaq.