"Elgün İbrahimov üçün ədalət" aksiyasında baş verənlər: cinsi qısnama, təhqir və pis rəftar...

Elgün İbrahimov üçün aksiya

“Elgün İbrahimov üçün ədalət” tələbi ilə çağırış edilən və 28 May metrostansiyası önünə təyin edilən aksiyada saxlanılanlar Nəsimi Rayon Polis İdarəsində qısnamaya və hədə-qorxuya məruz qaldıqlarını deyirlər.

“Polislərdən biri bizi qısnamaya məruz qoydu”

“Saat 12 tamam idi. Dostumla etiraz aksiyası olacağı deyilən yerə getmişdik və orda heç kimi görmədik. Mülki geyimli 3 nəfər bizə yaxınlaşdı və özlərini polis kimi təqdim edib, əlimizdəki plakatlara baxmaq istədilər. Biz etiraz edəndə isə qolumuzdan sıxıb israr etdilər və plakatı zorla əlimizdən aldılar”, – bu sözləri iştirakçı qızlardan biri “JAMnews”a deyir. 

Adının açıqlanmasını istəməyən müsahibimiz bildirir ki, polis onları zorla maşına mindirib və Nəsimi Rayon Polis İdarəsinə aparıb. Təxminən 6 saat ərzində polis əməkdaşları onları Elgünün ölümünün intihar olduğuna inandırmağa çalışıblar. 

Gənc qızın sözlərinə görə, idarədə polislərin sayı həddən artıq çox olub. Onların arasında kobud rəftar edənlər, gəncləri “tapdalayıb keçəcəkləri” ilə hədələyənlər də var imiş. Müsahibimiz polislərdən birinin sözlərini isə cinsi qısnama kimi dəyərləndirir:

“Qızlardan biri dedi ki, “Sıramıza girirlər, məni qabağa soxun”. Polis isə ona cavabında “sənə qabaqdan soxacam, narahat olma”, – deyə cavab verdi”.

Aksiya iştirakçısı deyir ki, polislərdən birinin digərinə “akt zalında 63 nəfər var” deməsi ilə saxlanılanların sayını öyrənsə də, idarəyə sonradan gətirilənlər də olub. 

“Təxminən 15-ə yaxın qadın iştirakçı var idi. İştirakçıların əksəriyyəti universitet tələbələri idi. Lakin aralarında 16 yaşlı oğlanlar da gördüm. Polislər onların üstünə qışqırır, “özünüzü qız kimi aparmayın” deyirdilər. Uşaqlar çox qorxmuşdular və bizə sığınmağa çalışırdılar. Çünki biz sözümüzü deyə bilirdik”. 

Müsahibimiz bildirir ki, iştirakçılar arasında halı pisləşənlər də olub, lakin onların səhhətinə biganə yanaşılıb.  Polis idarəsində təxminən 6 saat saxlanıldıqdan sonra onlardan telefon şifrələrini tələb ediblər və “TikTok”, “Whatsapp”, “Instagram” hesablarına giriş ediblər. Daha sonra iştirakçıları maşına mindirərək metro stansiyasının yaxınlığında düşürüblər. Yetkinlik yaşına çatmayanlar isə valideynlərinin gəlməsini gözləməli olub.

• Azərbaycanda universitetlər: “Avtonom deyillər, distant təhsilə qadağa var”
• Paşinyanın reytinqi düşməkdə davam edir: CRRC-nin sorğusuna əsasən ona cəmi 15% respondent etibar edir
• Həbsdəki jurnalist Ülviyyə Əlinin anası: “Mənim uşağım türmədə ölməlidir?”

Aksiyada iştirak məqsədləri ilə bağlı isə gənc qız bunları deyir:

“Elgün azyaşlıdır, məndən də balacadır. Onun hər videosu qarşıma çıxanda parçalara ayrılırammış kimi hiss edirəm. Kimsə məzun gününə hazırlaşan bir gəncin canını alacaq qədər necə vicdansız ola bilər və qatil necə tapılmaz? Məsələni intihar kimi necə bağlaya bilərlər? Qanımız yerdə qalır, susuruq, irəliləyə bilmirik. Mən o aksiyaya gənclər üçün getmişdim, gələcəyimiz üçün, özümüz üçün, azyaşlıları qorumaq üçün. Peşman deyiləm, sadəcə bunu deyə bilərəm. Yenə olsa, yenə gedərəm”.

“Qudurmusunuz? Siz kimsiniz ki, aksiya edirsiniz?”

Saxlanılanlardan biri isə gənc oğlandır. O, “JAMnews”a deyir ki, plakat hazırlamayıb, daha çox hadisələri izləyə bilmək üçün aksiya təyin olunan əraziyə gedib və 28 May metrostansiyası yaxınlığında skamyalardan birində oturaraq gözləməyə başlayıb. Saat 12-ni keçəndən sonra aksiya başlamadığı üçün getməyə hazırlaşsa da, təsadüfən bir dostuyla qarşılaşıb. 

“Dostum aksiyaya görə gəlmişdi. Salamlaşıb danışmağa başlayanda 2 mülki geyimli polis bizə yaxınlaşıb telefonlarımızı istədi. Əvvəlcə vermək istəmədik, lakin problem yaranmasın deyə telefonları verdik. Telefonlarımızın kodlarını açmağımızı istədilər, sonra isə bizi və əlavə bir nəfəri mülki maşına yığıb, Nəsimi Rayon Polis İdarəsinə apardılar. Tanımadığımız digər şəxs dediyinə görə panik atak xəstəsi idi və o an çətinliklə nəfəs alırdı”.

Müsahibimiz qeyd edir ki, onlar polis idarəsinə çatanda çantaları və tələbə vəsiqələri də müsadirə olunub, eləcə də kobud rəftara məruz qalıblar. 

“Əvvəlcə bir otaqda ad, soyad, telefon nömrəsi və ünvan kimi məlumatlarımızı aldılar. Başqa bir otaqda isə barmaq izlərimizi götürdülər. Bizə qarşı rəftarları gözlədiyimiz kimi kobud idi. Təhqir etməkdən çəkinmirdilər, pulqabımdan şəxsiyyət vəsiqəmi çıxaranda polislərdən biri “Vəsiqən yoxdu, axmaq?” deyə qışqırdı. Aksiya ilə bağlı isə “Qudurmusunuz? Siz kimsiniz ki, aksiya edirsiniz?” deyə bağırırdılar”.

Gəncin sözlərinə görə, orada diqqətini çəkən hadisələrdən biri də polisin saxlanılan qadınlardan biri ilə söhbəti idi. Həmin qadın polislərə “Mən bundan əvvəl küçədə sözlü qısnamaya məruz qalanda polis harada idi?” deyə sual verib. Bundan sonra xeyli sayda polis ora yığışıb mübahisə eləməyə başladılar. Polislərdən biri isə qadını geyiminə görə günahkar çıxararaq cavab verib ki: “O biri qızların başına niyə bir şey gəlmir, ona olmur, buna olmur, sənə niyə olur?”

Müsahibimiz 6 saat saxlanıldığını, saxlanılanların ümumi sayının 60-70 nəfərə yaxın olduğunu deyir. Onların arasında azyaşlıların, hətta 13 yaşlı uşağın da olduğunu qeyd edir:

“Həmin uşağı saxlanılmazdan əvvəl aksiya ərazisində görmüşdüm, maska taxıb gəlmişdi. 13 yaşı olduğunu isə sonradan polis idarəsində öyrəndim. Bir uşaq isə 16 yaşında olduğunu desə də, 10 yaşında görünürdü. Bizi saat 18.25-də azad etdilər. Məndən əvvəl və sonra çıxanlar, içəridə qalanlar da oldu. Buraxılanda hamımızın telefonlarını alıb, bir-bir yoxladılar”.

Kontekst

Bir müddətdir sosial mediada Elgün İbrahimovun ölümünün Prokurorluq tərəfindən ciddi araşdırılmadığı ilə bağlı müxtəlif iddialar səsləndirilir. Həmçinin, bir sıra fəallar Elgününün hadisəsi ilə bağlı məlumatları əks etdirən bukletləri müxtəlif ərazilərə yapışdırır, küçələrdə paylayır. Bununla bağlı ictimai fəal Nicat Əmiraslanov da saxlanılmış, barəsində 15 sutka inzibati həbs cəzası seçilmişdi.

Baş vermiş ölümlə bağlı yayılan iddialar arasında hadisənin polislər tərəfindən törədilmiş qətl olduğu da yer alır.

Elgün İbrahimov üçün aksiya