Azərbaycanlı mollalara avtomobillər hədiyyə olundu

On dörd molla dövlətdən yerli istehsal olan “Khazar SD” markalı avtomobilləri hədiyyə alıb. Daha yeddisini isə bu cür hədiyyə noyabr ayında gözləyir. Dini Qurumlarla İş üzrə Dövlət Komitəsinin sədr müavini Səyyad Aranın sözlərinə görə, hədiyyə nüfuzlu və hörmətli din xadimlərinə verilib və həmin addım məhz bununla izah olunur.

Halbuki, Mənəvi dəyərlərin təbliği fondunun icraçı direktoru Mehman İsmayılov bildirir ki, maşınlar dini icmaların maddi-texniki bazasının yaxşılaşdırılması məqsədini güdür və bu onlara şəxsi hədiyyə deyil, işlərinə köməkdir.

Avtomobillərin açarları yalnız kişilərə qismət olub, halbuki ölkədə qadın mollalar da var. Lakin, Aranın iddiasına görə, onlardan yalnız az qisminin rəsmi statusu mövcuddur.

Daha öncə analoji hal Naxçıvan Muxtar Respublikasında baş verib – oradakı dörd molla “NAZ Lifan 330” markalı avtomobillər alıb.

İctimaiyyət arasında bu hadisə birmənalı qarşılanmayıb.

Belə ki, məsələn, iqtisadçı ekspert Natiq Cəfərli deyir ki, dövlətin bu cür səxavətliliyi yalnız etik normaları deyil, dövlətin dindən ayrı olması prinsipini də pozur. Bundan əlavə, iqtisadçı hesab edir ki, burada Azərbaycan üçün ciddi təhlükə gizlənir, çünki inanclı adamlar din xadimlərinin dövlətlə yaxınlığını görərək, onlara inamı itirə, onlarda uzaqlaşa və özlərinə digər ölkələrdə dini lider axtara bilərlər.

Jurnalist Rəsul Mirhəşimli onunla razılaşmır. Onun fikrincə, bu hədiyyə heç bir problemə səbəb ola bilməz: «Bu din xadimləri hədiyyə alana kimi işlədikləri tərzdə işlərini davam etdirəcəklər».