Azərbaycanda qapalı məkanlarda yenə maskalardan istifadə etmək tövsiyə olunur
Bu həftə ərzində Azərbaycanda koronavirusa yoluxma halları 70 faiz artıb. Ancaq son iki gün ərzində dörd nəfər infeksiya qurbanı olub. Ölkədə pandemiyanın yeddinci dalğası haqda danışmağa başlayıblar. Səhiyyə Nazirliyi əhalini qapalı məkanlarda və ictimai nəqliyyatda maskadan istifadə etməyə çağırır.
- Azərbaycanın quru sərhədləri açılmayacaq
- Venesuela prezidentinin Azərbaycana səfəri koronavirusun yenidən yayılması ilə müşayiət olunub
- Azərbaycanda hələ də koronavirusa görə karantin ləğv edilməyib. Səbəb nədir?
Son günlərdə Azərbaycanda COVID-19 infeksiyasına yoluxma faktlarının kəskin artımı müşahidə olunur. Əgər cari həftənin əvvəlində bütün ölkədə cəmi 383 koronavirus xəstəsi müəyyən olunmuşdusa, cümə günü onların sayı 650 nəfərə çatıb. Beləliklə, dörd günn ərzində yoluxma artımı 70 faiz təşkil edib.
Ancaq son iki gün ərzində dörd nəfər koronavirus qurbanı olub, baxmayaraq ki, həftənin ilk üç günündə infeksiyalardan ölənlərin sayı sıfıra bərabər idi.
Xüsusi karantin rejimi davam edir
2020-ci ilin martından Azərbaycanda koronavirus pandemiyasına görə elan olunan xüsusi karantin rejimi ləğv edilməyib. İki il yarıma yaxındır ki, qonşu ölkələrlə quru sərhədləri bağlı qalır. Azərbaycandan çıxmaq ancaq təyyarə ilə mümkündür. Müvafiq olaraq ölkəyə gəlmək də.
Amma bir neçə ay əvvəl, üzə çıxarılan yoluxma hallarının sayı ikirəqəmli gppstəriciyə endiyi zaman Nazirlər Kabineti yanında Operativ Qərargah bir sıra məhdudiyyətləri aradan qaldırıb.
Hazırda məhdudiyyətlərdən ancaq ticarət mərkəzlərinə və restoranlara daxil olan zaman COVID-19 virusuna qarşı tam vaksinasiyadan (üç doza) keçildiyi yoxlanılır. Bu müəssisələrin bəziləri bu tələbə sadəcə formal yanaşır.
Səhiyyə Nazirliyinin xəbərdarlığı
Azərbaycan Səhiyyə Nazirliyinin ekspert mütəxəssisi Zakir Quliyev AzərTac dövlət agentliyinə müsahibəsi zamanı bildirib ki, COVID-19 pandemiyası hələ də davam edir.
Zakir Quliyev, Azərbaycanın Səhiyyə Nazirliyinin ekspert mütəxəssisi. Foto: AzərTAc
“Son vaxtlar yoluxma sayında müşahidə olunan artım Ümumdünya Səhiyyə Təşkilatını (ÜST) belə bir açıqlama verməyə məcbur etdi ki, koronavirus pandemiyası davam edir və virusun yeni mutasiyaları aşkarlanır. Hazırda ABŞ, Fransa, Böyük Britaniya və Almaniya kimi ölkələrdə kəskin artım müşahidə olunur”, – o deyib.
Azərbaycanda yoluxma hallarının artmasına gəlincə, Səhiyyə Nazirliyinin nümayəndəsi vurğulayıb ki, əvvəlki illərlə müqayisədə hazırda koronavirusa yoluxma hallarında artım müşahidə olunur:
“Bunu nəzərə alaraq, gələcəkdə rəqəmlərin daha da təhdidedici səviyyəyə çatmaması üçün vətəndaşlarımızdan karantin rejiminin qaydalarına riayət etmələrini xahiş edərdim. Bunu deyərkən, gigiyena qaydaları və sosial məsafəni nəzərdə tuturam”.
“Vətəndaşlara koronavirusun yeni dalğasından qorunmaq üçün hamımızın bildiyi gigiyenik qaydaları (tez-tez əlləri yumaq və ya antiseptik vasitələrdən istifadə) davam etdirmələrini tövsiyə edirəm. Ciddi zərurət yaranmadığı halda insanların kütləvi toplaşdığı məkanlardan çəkinsinlər. Eyni zamanda, vətəndaşlara qapalı məkanlarda, həmçinin ictimai nəqliyyatda sıxlıq olduğu təqdirdə qoruyucu maskalardan istifadə etmələrini məsləhət görürəm”, – ekspert əlavə edib.
Azərbaycanda vaksinasiya
Yoluxma azalandan və əksər məhdudiyyətlər aradan qalxandan sonra Azərbaycanda koronavirusa qarşı vaksinasiyaya maraq kəskin azalıb.
Baxmayaraq ki, Operativ Qərargah vaksinə böyük tələbat olduğunu bildirir. Beləliklə, 2022-ci il iyulun 15-nə olan məlymata əsasən, ancaq bu gün ərzində Azərbaycanda 1935 nəfər koronavirusa qarşı vaksin vurdurub.
Ölkə əhalisinin 49,8 faizi vaksinin iki, 33,2 faizindən çoxu isə hər üç dozasını vurdurub.
