Bloq: "Mənim abxaz qardaşım Castin Biber haqda heç nə eşitməyib, mən isə çeçen musiqisi haqda"

Bir neçə il əvvəl əminəvələri qonaq gəlmişdi. Onlar Suxumidə yaşayır və Tbilisiyə ildə bir neçə dəfə – həkimə getmək, şoppinq etmək (analarımızın söhbətinə qulaq asanda bildim ki, burada qiymətlər Suxumidəkindən xeyli ucuzdur), nənəyə baş çəkmək, axır vaxtlar isə həm də babamın qəbrini ziyarət etmək üçün gəlirlər.

Hər gəlişlərində mən və bacım onlarla ünsiyyətdə oluruq, hər dəfəsində də bu görüşlər bol emosiya və çoxlu yeni təəssüratla müşayiət olunur.

İlk vaxtlarda çox utanırdım, hər dəfə özümü onlarla birinci dəfə görüşürmüş kimi hiss edirdim. Amma bu duyğu tez keçib gedir, həmişə də danışmağa sözümüz olurdu. Bu dəfə söhbət həm də musiqidən – sevdiyimiz qruplar və müğənnilərdən düşdü. Və biz bir-birimizə necə də təəccübləndik!

Zövqlərimizin tamamilə müxtəlif olduğu məlum oldu – onların mənim sevdiyim mahnılardan xoşları gəlmir və əksinə.

“Qərb” və “Şərq” prinsipi ilə parçalanma yaşadıq: mən ingilis, onlarsa rus dilində mahnıları dinləyirlər.

Onlara öz “playlist”imi göstərdim, qardaşlardan ən balacası olan Alan təəccüblə dedi: “Telefonunda 100 mahnı var və bir dənə də olsun rus mahnısı yoxdur?!”

Onların çox sevdiyim “One Direction”un mövcudluğundan xəbərləri var (ötən görüşlərimizdən birində onları bu qrupla tanış etmişdim). Ariana Qrande və Arctic Monkeys haqqında isə ümumiyyətlə eşitməyiblər.

Heyrət içində idim. (Ona görə yox ki, onların mütləq bu musiqiçiləri tanımalı olduqlarını düşünürəm, sadəcə ətrafımda olan demək olar ki, hər kəsin onlar haqqında məlumatlı olmasına artıq alışmışam).

Məni ən çox təəccübləndirən isə onların hətta Castin Biberi də tanımamaları oldu.

Əvəzində isə ərəb və çeçen musiqisini dinlədiklərini öyrəndim. Mənim üçün isə çeçen musiqisinin (elə Çeçenistanın özünün də) mövcudluğu bir yenilikdi.

Sevdiyimiz televiziya verilişləri barədə danışanda da eyni şey oldu.

Riçi (böyük kuzenim) ancaq Rusiya kanallarına baxdığını dedi. Rusiya telekanallarında gedən bir dənə də olsun əyləncə verilişinin adını çəkə bilmədiyimi görüb təəccübünü gizlədə bilmədi.

Onun sözlərinə görə, məktəblərində ingilis dili o qədər də vacib fənn deyil. Mənim və bir çox sinif yoldaşlarımın ingilis dilində anladığımız və danışa bildiyimiz onu çox təəccübləndirdi.

Kiçik bacım Mariya və Alan həmyaşıddırlar. Mariya ingilis dilini birinci sinifdən öyrənir. Alan isə beşinci sinfi bitirsə də, ingilis dilini hələ öyrənməyə başlamayıb.

Riçi həkim olmaq istəyir. Mən interyer dizaynı ilə məşğul olmağı düşünürəm. Heç olmasa bu məsələdə, gələcək peşələrimizi müzakirə edərkən, biz  bir-birimizin “qəribə” seçimlərimizi anlayışla qarşılayırıq.

Material müəllifinin təklif etdiyi terminlər, toponimlər, fikirlər və ideyalar onun şəxsinə aiddir və JAMnews- un və ya onun ayrı-ayrı əməkdaşlarının fikirləri və ideyaları ilə üst-üstə düşməyə bilər. JAMnews dərc olunan materialların altında yazılan və təhqir, təhdid, zorakılığa çağırış və ya başqa səbəblərdən etnik narazılıq doğuran kimi dəyərləndirilən şərhləri silmək haqqını öz üzərində saxlayır