Aİ şərtlərə əməl olunmaması səbəbilə Moldovaya məhkəmə islahatları üçün vəsait ayırmaqdan imtina edib
Ziarul de Gardă-nın materialları əsasında
Avropa İttifaqı məhkəmə islahatları proqramı çərçivəsində Moldovaya 28 milyon avro ayırmaqdan imtina edib. Bu qərarın səbəbi Kişinyovun yardım göstərilməsi üçün labüd şərtləri yerinə yetirməməsi olub.
Bu məbləğ Moldovanın dövlət büdcəsinə ödənməyəcək, Aİ-də qalacaq.
“Aİ islahat prosesini diqqətlə izləyib və qeyd edib ki, Moldova hakimiyyəti 2014-2015-ci illər ərzində məhkəmə sahəsində islahatların aparılmasında yetərincə səy göstərməyib. Vəsait və personalın yetərincə ayrılmaması üzündən lazımı islahatlar əldə edilməyib. Nəticədə nail olunmuş inkişaf yetərsizdir”, – Avropa İttifaqının Moldovadakı nümayəndə heyətinin məlumatında deyilir.
Aİ-nin Moldovadakı nümayəndə heyətinin başçısı Piter Mixalkonun sözlərinə görə, “Aİ yenə də moldavanların daha yaxşı gələcək qurmaq cəhdlərində dəstəkləyir. İndi biz yaxın illərdə vətəndaşlara necə kömək edə biləcəyimiz haqda düşünürük. Biz moldavanların həyatını bilavasitə yaxşılaşdıran layihələrə öncəlik vermək istəyirik”.
Hazırda Aİ Moldova büdcəsini dörd başqa sahədə də ixtisar edib. Hələlik maliyələşdirmənin nə zaman bırpa olunacağı bəlli deyil.
Aİ-nin məhkəmə islahatlarına yardımın dayandırılması haqda qərarı ilə əlaqədar olaraq dövlət büdcəsində 30 milyon avroya yaxın defisit yaranacaq. Bu haqda Ziarul de Gardă-ya Moldova Hüquq Resursları Mırkəzinin prezidenti Vladislav Qribinça deyib. Onun sözlərinə görə, bu vəsait mahiyyət etibarilə Kişinyov hakimiyyəti tərəfindən artıq xərclənib və Aİ sadəcə bu vəsaitləri kompensasiya etmək niyyətində idi.
Vladislav Qribinça izah edir ki, məhkəmə islahatları üçün növbəti iki maliyyə yardımı tranşını Aİ bu ilin yazında islahatların nəticələrinin dəyərləndirilməsinə əsasən həyata keçirməli idi.
“Bizim bu köçürmələrin heç birini ala bilməməyimiz faktı, güman ki, məhkəmə islahatlarının təsiri yetəri qədər olmayıb, baxmayaraq ki, qanunvericilik tədbirləri həyata keçirilmişdi. İnsanlar heç bir dəyişiklik hiss etmirlər”, – ekspert bildirib.
