Abzas Media fəaliyyətini xaricdə olan yeni komanda ilə davam etdirəcək
“Abzas Media”nın yeni komandası
Altı əməkdaşı həbs edilən müstəqil “Abzas Media” nəşri fəaliyyətini Azərbaycandan kənarda olan yeni komanda ilə davam etdirəcəyini açıqlayıb. Saytın kontenti əsasən Avropada yaşayan və çalışan jurnalistlər tərəfindən yaradılacaq. Bu qərarı nəşrin həbsdə olan rəhbərləri digər əməkdaşların təhlükəsizliyi üçün veriblər.
- İşçi hüquqları müdafiəçisi 3 il azadlıqdan məhrum edilib
- Azərbaycan məhkəməsi tanınmış hüquq müdafiəçisinin məhkumluğunu ləğv etməyib
- Azərbaycanda qeydiyyat problemi – kütləvi cərimələr
“Son 3 ayda “Abzas Media” rəhbərliyi və bütün redaksiya heyəti “qaçaqmalçılıq” ittihamı ilə həbs edilib. Bizimlə əməkdaşlıq edənlər təzyiqlərə, bank hesablarının dondurulmasına və ölkədən çıxış qadağalarına məruz qalıblar”, – “Abzas Media”nın Facebook səhifəsində dərc olunan bəyanatda deyilir.
“Bu həbs və təzyiqlərin siyasi motivli olduğunu və apardığımız korrupsiya araşdırmalarının qarşısını almaq məqsədi daşıdığını bir daha qeyd edirik.
Hökumət “Abzas Media”nın əməkdaşlarını həbs etməklə onun resurslarını tükəndirib və yaranmış repressiv mühit Azərbaycandan fəaliyyəti artıq mümkünsüz edir. Bu səbəblə həbsdə olan “Abzas media” rəhbərliyinin istəyi ilə bu dövrdə müvəqqəti baş redaktor vəzifəsini Leyla Mustafayeva yerinə yetirəcək. O, Avropanın müxtəlif ölkələrinə səpələnmiş yeni redaksiya heyətinin işinə nəzarət edəcək”.
Qeyd edək ki, Leyla Mustafayeva tanınmış azərbaycanlı jurnalistdir və artıq uzun illərdir ki, Almaniyada yaşayır və çalışır.
“Biz jurnalist fəaliyyəti üçün təhlükəsiz mühitin yaradılmasının vacibliyini başa düşürük və bu çətin dövrlərdə söz azadlığına dəyər verən qlobal ictimaiyyətin və əcnəbi həmkarlarımızın dəstəyini yüksək qiymətləndiririk.
Bu çətin günlərdə nümayiş etdirdiyiniz anlayışınız və dəstəyiniz üçün təşəkkür edirik. “Abzas Media” hazırkı şəraitdə belə jurnalistika prinsiplərini qoruyaraq dəqiq və qərəzsiz xəbərlər çatdırmağa sadiq qalacaq”, – bəyanatda deyilir.
Öz növbəsində Leyla Mustafayeva məlumat verib ki, müxtəlif ölkələrdən 15 media qurumu, o cümlədən ForbiddenStories, France 24, rfi, The Guardian, Le Monde, Paper Trial, arc, OCCRP, Der Standard, ZDF, RTS, Knack, IRPI Media, Radio France, Le Soir və ZDF “AbzasMedia”nın fəaliyyətlərində iştirak edəcək.
Nəşr artıq müəllifləri sadalanan media qurumlarının jurnalistləri olan Azərbaycan hakimiyyətini tənqid edən bir neçə məqalə dərc edib.
