Çin təqvimi ilə gələn Yeni ilin ilk həftəsini necə keçirməli?
Nəhayət, Yeni il demək olar ki, gəlib. Fevralın 16-da Çin təqvimi ilə yeni qəməri il təhvil olur, amma yalnız martın 2-də 2018-ci ilin artıq yetişdiyini qəti demək mümkün olacaq.
Çox qədim Çin ənənəsinə görə, bu məhz necə baş verir (qəməri təqvimin 3,5 min il əvvəl yarandığı hesab olunur)?
Hər şey ondan başlayır ki, fevralın 13-də ev tər-təmiz yuyulub, təmizlənir, evdəki bütün pal-paltar tamamən təmiz olmalıdır, lazımsız, istifadə olunmayan əşyalar atılmalıdır.
Fevralın 15-də ailələr bir yerə toplanmağa çalışır və ilin bu axşamı o qədər vacibdir ki, onun xətrinə çoxları yüz minlərlə kilometrlik yolu qət edir. Hər bir evdə bayram süfrəsində mütləq qreypfrut, kahı yarpağı və qurudulmuş istridyə olur – bu ərzaqlar yeni ildə uğur və var-dövlət gətirir.
Fevralın 16-da İL BAŞLAYIR. Uşaqlara və yaşlı adamlara qırmızı zərfin içində pul hədiyyə edirlər (məbləğ hədiyyə edənin imkanından asılıdır). Çoxları bu zərflərdən qapıçı, mühafizəçi, taksi sürücüsü və il ərzində gündəlik xidmət göstərmiş hər kəsə hədiyyə edir. Axşamı isə valideynlərlə birlikdə keçirmək lazımdır. Söhbət cütlükdən gedirsə, o zaman ərin valideynlərinin yanına gedirlər.
Fevralın 17-i arvadın valideynlərini ziyarət günüdür. Üstəlik mütləq cüt sayda olan hədiyyələrlə birlikdə.
Fevralın 18-də evdə qalmağa və heç yana çıxmamağa çalışırlar. Məsələ ondadır ki, həmin bu gün heç kimlə mübahisə və ya daha betər, münaqişə etmək qətiyyən olmaz. Bu ehtimaldan yan ötmək üçün ən yaxşısı evdə oturub, sadəcə ev əhlini görməkdir.
Fevralın 19-da tanrılarla görüşə hazırlaşmaq lazımdır. Günün ikinci yarısında masalara meyvə vazları, alkoqollu içkilər və mütləq balıq, donuz və toyuq yeməkləri düzülür. Səhərdən başlayaraq hamının evində ətirli buxurlar çəkilir.
Gecə yarısından dərhal sonra isə hamı küçələrə və ya heç olmasa balkona çıxır, atəşfəşanlıq edib, şənlənmək üçün. Çünki fevralın 20-də Dövlət Tanrısının doğum günüdür. Həmin gün mümkün qədər çox yemək lazımdır, yeri gəlmişkən, bunun Dövlət Tanrısının xoşuna gəldiyi hesab olunur.
Fevralın 21-də isə hər şey tam əksinə olur. Bu gün Yoxsulluq Tanrısının doğum günüdür, buna görə də yenidən evi yaxşıca yuyub, təmizləmək, bütün köhnə və istifadədən çıxan hər şeyi yenidən seçib atmaq lazımdır.
Fevralın 22-i qeyri-adi gündür. Bu, yeni ilin yeddinci günüdür və həmin gün ilahə Nuva ilk insanı yaradıb. Əvvəlki altı gün ərzində o, heyvanları var edib, hər gün birini: toyuğu, iti, donuzu, keçini, inəyi və atı. Çoxları insanlığın yaranış gününü kağızdan böyük insan fiqurları kəsib və/və ya poema yazmaqla qeyd edir. Bundan başqa fevralın 22-i dağlara piyada gəzinti üçün də əla gün hesab olunur.
Martın 2-i yeni qəməri il qəti şəkildə gəlmiş olur. Çoxları artıq həmin gün işə çıxır. Amma bu günün axşamı ilin ən əsrarəngiz olaylarından biri – kağız fənərlər festivalı baş tutur. Həm də illər keçdikcə bu gün daha bir məna kəsb edib – bu gün Sevgililər Günü, bir növ Avropa ənənəsindəki Müqəddəs Valentin Gününün analoqu olub.
İcmal “Quartz” jurnalının hekayəsi əsasında hazırlanıb
