Չեչնիայի ղեկավարն ԱՄՆ պատժամիջոցներին պատասխանել է երկու գնդացիրներով

Չեչնիայի ղեկավար Ռամզան Կադիրովը, նրա կինն ու երկու դուստրերը ներառվել են ԱՄՆ «սև ցուցակում» մարդու իրավունքների զանգվածային խախտումների համար։

Կադիրովն ի պատասխան Ինստագրամում երկու գնդացիրներով լուսանկար է հրապարակել և հայտարարել, որ «մարտն ընդունում է»։

«Պետդեպարտամենտը մեծածավալ արժանահավատ տեղեկություններ ունի այն մասին, որ Կադիրովը պատասխանատվություն է կրում մարդու իրավունքների բազում կոպիտ խախտումների համար, որոնք տեղ են գտել տասը տարի առաջ, այդ թվում՝ խոշտանգումների և արտադատարանային մահապատիժների համար», — ասված է ԱՄՆ պետքարտուղար Մայք Պոմպեոյի հայտարարությունում, որը հրապարակվել է հուլիսի 20–ին։

ԱՄՆ–ն նաև կոչ է արել միանալ այդ որոշմանն այն երկրներին, որոնք նույնպիսի հայացքներ ունեն Կադիրովի վերաբերյալ։

• Ո՞վ է Եվրոպայում սպանում չեչեններին, որոնք քննադատում են Չեչնիայի ղեկավար Կադիրովին

• «Լինում է, որ ամուսինը ծեծում է»։ Չեչնիայի ղեկավարը պաշտպանել է 23-ամյա կնոջ մահվան համար ենթադրյալ մեղավորներին 

• Արտադատարանային մահապատիժներ Չեչնիայում

Փաստաթղթում ընդգծվում է, որ սահմանափակող միջոցները տարածվում են նրա տիկին Մեդնի Կադիրովայի և դուստրերի՝ Այշատ և Կարինա (Խադիժաթ) Կադիրովաների վրա։

Ռամզան Կադիրովն արդեն ներառվել էր ամերիկյան ֆինանսների նախարարության պատժամիջոցների ցանկում, ինչը նրան արգելում էր տնտեսական գործությունեություն տարածել ԱՄՆ տարածքում, իսկ ամերիկյան ընկերություններին՝ նրա հետ գործ ունենալ։

Այժմ Կադիրովին արգելվում է ԱՄՆ մուտք գործել։

Կադիրովի և Մոսկվայի հակագրոհը

Չեչնիայի ղեկավարն ի պատասխան ծաղրել է Պոմպեոյին։ Իր Telegram-ալիքում նա երկու գնդացիրներով լուսանկար է հրապարակել զենքով լի սենյակում։

Նա հայտարարել է, որ «մարտն ընդունում է» և «ամեն ինչ հետաքրքրանում է»։

Այս իրավիճակը բավականին լուրջ են համարել նաև Մոսկվայում։

ՌԴ ԱԳՆ պաշտոնական ներկայացուցիչ Մարիա Զախարովան Ֆեյսբուքի իր էջում գրել է․

«Հայելային պատասխանը դժվար կլինի, բայց մի բան կմտածենք»։

Ինչի՞ համար է մեղադրվում Ռամզան Կադիրովը

Ռուսական և միջազգային լրատվամիջոցները պարբերաբար նյութեր են հրապարակում մի շարք հանցագործություններին Ռամզան Կադիրովի մասնակցության մասին։

Եթե ընդհանրացնենք, այսպիսի ցուցակ կստացվի․

• մարդկանց առևանգում, խոշտանգում և սպանություն Չեչնիայի տարածքում,

• ԼԳԲՏ ներկայացուցիչների հետապնդում և սպանություն հանրապետությունում,

• իրավապաշտպան Նատալյա Էստեմիրովայի սպանությունը Գրոզնիում,

• լրագրող Աննա Պոլիտկովսկայայի և քաղաքական գործիչ Բորիս Նեմցովի սպանությունները,

• Եվրոպայում չեչեն էմիգրանտների շրջանում նրա հակառակորդների սպանությունը,

• չեչեն գործարարների ռեկետ Ռուսաստանի տարածքում։

Այս մեղադրանքներից ոչ մեկը Ռուսաստանում չի հետաքննվել։