Քաղաքների և գյուղերի հրետակոծություն․ Արցախ, մարտեր, իրավիճակը 2020 թ-ի նոյեմբերի 4-ի առավոտվա դրությամբ

Տեղեկություններ Բաքվից

• Գիշերվա ընթացքում մարտական գործողությունները շարունակվել են տարբեր ուղղություններով։

• Նոյեմբերի 4-ին առավոտյան ժամը 8-ից հայկական զինված ուժերը հրետակոծում են Տերտերի շրջանի Գուսանլի և Գազյան գյուղերն, ինչպես նաև Աղջաբեդի Հաջիլար, Գարախանլի և Բոյաթ գյուղերը, հաղորդում է Ադրբեջանի պաշտպանության նախարարությունը։

• Ադրբեջանի նախագահի օգնական Հիքմեթ Հաջիևը պատասխանել է Հայաստանի ԱԳՆ հայտարարությանը, որում խոսվում էր «Պատասխան հարվածներ հասցնելու Արցախի ղեկավարության իրավունքի մասին»․ «Այդպիսով հայկական կողմը հող է նախապատրաստում Ադրբեջանի խաղաղ քաղաքացիներին հարվածելու համար»։

• «Բաքուն պատրաստ է դադաեցնել պատերազմը։ Սակայն դրա համար նա [Հայաստանի վարչապետը] պետք է հայտարարի զորքերն օկուպացված տարածքներից դուրս բերելու մասին։ Սակայն նա այդ մասին չի խոսում», — հայտարարել է Ադրբեջանի նախագահ Իլհամ Ալիևն իտալական La Repubblica թերթին տված հարցազրույցում։

Տեղեկություններ Երևանից

• Գիշերը լարվածությունը պահպանվել է։ Կեսգիշերն անց ադրբեջանական դիվերսիոն խումբը Շուշի քաղաք ներխուժելու անհաջող փորձ է կատարել, քաղաքը հրետակոծվել է «Սմերչ» հրթիռներով, տուժածներ չկան, հաղորդում է Արցախի պաշտպանության նախարարությունը։

• Երկու խաղաղ բնակիչ է տուժել նոյեմբերի երեքի երեկոյան Ստեփանակերտի հրթիռակոծման հետևանքով։

• Հայաստանի ԱԳՆ-ն հայտարարել է, որ «էքզիստենցիալ սպառնալիքի պայմաններում Արցախի իշխանությունն ու Պաշտպանության բանակն իրավունք ունեն պաշտպանելու իրենց բնակչությունն ու հակահարված հասցնելու թշնամուն»։

• Հայաստանի ԱԳՆ-ն Ադրբեջանին մեղադրել է նաև «Արցախի քաղաքացիական բնակչության միտումնավոր հրետակոծման համար, հատկապես՝ առաջնագծից հեռու գտնվող կանանց և երեխաներին»։

• Հայաստանի վարչապետի խորհրդական Վաղարշակ Հարությունյանը հայտարարել է, որ հայ-ռուսական խորհրդակցություններ են սկսվել Հայաստանին օգնություն ցուցաբերելու համար։ «Ռուսական զորքը կանգնած է Երասխում, Լաչինի միջանցքի մոտ գտնվող հայկական գյուղում», — ասել է նա։