Meydan TV-ի լրագրողին թույլ չեն տվել Վրաստան մուտք գործել
Ադրբեջանական Meydan TV հեռուստաալիքի լրագրող Ջամալ Ալիին ապրիլի 19-ին թույլ չեն տվել Վրաստան մտնել: Նրա խոսքով՝ սահմանապահները պատճառ չեն նշել, մի որոշ ժամանակ պահել են և մոտակա չվերթով ետ ուղարկել Բեռլին, որտեղից նա Թբիլիսիի օդանավակայան էր եկել:
Meydan TV-ն ադրբեջանական ԶԼՄ է, որը հիմնադրվել է Գերմանիայում: Meydan TV-ն աչքի է ընկնում նախագահ Իլհամ Ալիևի հանդեպ քննադատական մոտեցմամբ և ակտիվորեն լուսաբանում է ադրբեջանական իշխանությունում առկա կոռուպցիայի խնդիրները: Meydan TV-ում աշխատող լրագրողները բազմիցս հետապնդումների են ենթարկվել Ադրբեջանում:
Ինչպես հայտարարել է ինքը՝ Ջամալ Ալին, ադրբեջանական տեղեկատվական Turan գործակալությանը, Վրաստան նրան չեն թողել պրոֆեսիոնալ գործունեության պատճառով: Լրագրողը մի քանի ամիս առաջ եղել է Վրաստանում և քննադատական հոդված հրապարակել SOCAR ադրբեջանական պետական նավթային ընկերության մասին, որն անվճար գազով է ապահովում Վրաստանի եկեղեցիները: Այն բանից հետո, երբ հրապարակվել է հոդվածը, Թբիլիսիում լրագրողի դեմ բողոքի ակցիա է իրականացվել:
Ջամալը մտադիր է փաստաբան վարձել և պայքարել արդարության համար: Նա մի քանի տարի առաջ ադրբեջանական իշխանությունների հետ կոնֆլիկտի մեջ է մտել: Ալին 2012թ-ի հունվարին ակտիվ մասնակցություն է ունեցել Բաքվում տեղի ունեցած հակակառավարական ելույթներին և կալանավորվել: Ազատ արձակվելուց հետո լքել է Ադրբեջանն ու ապաստան գտել Բեռլինում: Ադրբեջանցի լրագրողները վրացական իշխանություններից չկարողացան պաշտոնական բացատրություն ստանալ, թե ինչու են Ջամալ Ալիին արգելել Վրաստան մուտք գործել:
