«IT պիցցերիա» Հայաստանում. երբ շեֆ խոհարարը հաճախորդն է
Յուրահատուկ բիզնես գաղափար
Գործարարներից շատերը բողոքում են, թե դժվար է նոր պրոդուկտ ստեղծել, որը գրավիչ կլինի մարդկանց համար։
Հովհաննես Մարգարյանը պատմում է, թե ինչպես ծնվեց իր գաղափարը, և զարգացման ինչ ուղիներ են արդեն ձևավորվում։
Այստեղ ամեն ինչ հնարավոր է
![Հովհաննես Մարգարյանը](https://jam-news.net/app/uploads/2022/07/Yes_Hovhannes-Margaryan.jpg)
«Մոտ երկու տարի առաջ էր: Ընկերներիս հետ սրճարանում պատվիրեցինք պիցցա, բայց մատուցողուհուն խնդրեցինք, որ պիցցայի բացադրիչներից մի քանիսը հանեն, մի քանի բաղադրիչներ էլ ավելացնեն: Վերջում, երբ հաշիվը տրամադրեցին, ինձ հետաքրքրեց, թե նման դեպքերում ինչպե՞ս են հաշվարկում գումարը: Պարզվեց, ավելացված բաղադրիչների արժեքն ավելացված է, սակայն հանված բաղադրիչների արժեքը պակասեցված չէ:
Կիսահումորային քննարկման մեջ մտանք նախ մատուցողի, ապա՝ մենեջերի հետ: Հարցին, թե՝ ինչո՞ւ բացակայող բաղադիչների գումարը հանված չէ, պատասխանը մեկն էր՝ կարգն է այդպես, այլ կերպ հնարավոր չէ: Այդ հնարավոր չէ-ն դարձավ պատճառը, որ սկսեմ մտածել՝ ինչո՞ւ հնարավոր չէ: Այդ ժամանակ էր, որ որոշեցի ստեղծել պիցցերիա, որտեղ հաճախորդի բոլոր առաջարկներն ու ցանկությունն ունեն մեկ պատասխան՝ ԱՅՈ»:
![Շեֆ-խոհարարը։ Յուրահատուկ բիզնես գաղափար](https://jam-news.net/app/uploads/2022/07/YES_cheif_oven-1024x683.jpg)
Երկու տարի՝ գաղափարը կյանքի կոչելու համար
«Որոշեցինք ստեղծել մի հարթակ, որի օգնությամբ մարդն ինքը կարող է «պատրաստել» իր նախընտրելի պիցցան: Ինքս ունենալով գովազդային ոլորտի շուրջ տասնհինգ տարվա փորձառություն, հասկանում էի, որ վիզուալն ամենակարևորն է: Ի վերջո, կանգ առանք իլյուստրացիոն լուծումների վրա, ինչը հնարավորություն կտար մարդկանց ցանկալի պիցցան սեփական երևայակայությամբ «հավաքելուն» զուգահեռ ունենալ նաև հաճելի, ժամանցային տրամադրություն:
![Հաճախորդը կարող է իր ճաշակով ընտրել բոլոր բաղադրիչները](https://jam-news.net/app/uploads/2022/07/Yes_selfpreparing-1024x555.png)
Այդ փուլում հանդիպեցի IT ոլորտը ներկայացնող Ռաֆիկ Ավետիսյանի հետ, առաջարկեցի դառնալ համասեփականատեր և ապահովել նախագծի ծրագրային մասը: Համաձայնության եկանք, ամիսներ շարունակ անցանք տարբեր փուլերով, փորձելով անընդհատ կատարելագործել ստեղծված հավելվածը:
![Ռաֆիկ Ավետիսյանը](https://jam-news.net/app/uploads/2022/07/Yes_Rafik-Avetisyan.jpg)
Այն պարբերաբար տրամադրում էինք փորձարկման: Այսօր մարդկանց ժամանակը շատ թանկ է. մարդիկ ուզում են արագ ստանալ ամեն ինչ: Մեր հիմնական նպատակն այն է, որ մեր առաջարկն այնքան պարզ լինի, որ մարդիկ նվազագույն ժամանակում կարողանան անցնել բոլոր փուլերն ու հավաքել իրենց նախընտրած պիցցան:
Ես այս նախագծին նայում էի որպես գովազդային արշավի: Ինքս հայաստանյան մի շարք խոշոր գովազդային նախագծերի կրեատիվ տնօրենն եմ եղել: Երևի նաև դա էր պատճառը, որ ովքեր ինձ ճանաչում էին, ամենասկզբից էլ վստահ էին՝ եթե մտքիս դրել եմ, անպայման կստացվի:
Սկսեցինք խոհարական թիմ հավաքել և փորձել հասկանալ՝ ինչպե՞ս անել, որ մեր պիցցան տարբերվի: Անընդհատ փորձարկում էինք: Մոտ կես տարի փորձարկել ենք խմորը, մինչև ստացել ենք այն, ինչն այսօր ունենք:
Մենք այս տարի ենք բացվել, բայց արդեն մտածում ենք զարգանալու մասին»։
![Պատրաստի պիցցան](https://jam-news.net/app/uploads/2022/07/YES_pizza_close-1024x682.jpg)
Զարգացման տեսլականը
«Մենք մեզ IT պիցցերիա ենք համարում, որը ծրագրային լուծումների շնորհիվ մարդկանց հնարավորություն է տալիս ուտելիք պատվիրելուն զուգահեռ նաև հաճելի ժամանց ունենալ:
Մեր պատվիրատուները հաճախ ասում են՝ նմանատիպ բանի միշտ սպասում էինք։ Այն, որ մեր գաղափարը սպասված էր ու հետաքրքիր նախագիծ է, վկայում է նաև սոցիալական մեդիայում մեր տեսանյութերի դիտումների քանակը: Մարդիկ դիտում են, ապա՝ փորձում, հետո՝ դառնում մեր մշտական հաճախորդը։
Կայուն զարգացման տեմպերով գնում ենք առաջ: Արդեն ունենք մեր հեղինակային իրավունքը: Առաջիկայում մտադիր ենք ընդլայնել մեր աշխարահագրությունը թե՛ Հայաստանի տարածքում, թե՛ արտերկրում: Մենք հավատում ենք, որ հաջողելու ենք նաև երկրից դուրս: Այս պահին բանակցում ենք Չեխիայի գործարարներից մեկի հետ, որը համացանցում կարդացել է մեր հավելվածի մասին ու հետաքրքրված է նախագծով:
Հույս ունենք, որ բանակցությունները կունենան դրական ավարտ և մեր ծրագրային ապահովման ու թիմի կողմից փորձի փոխանցման արդյունքում մեր պրոդուկտը ներկայացված կլինի նաև Պրահայում»:
![Խոհարարը պատրաստում է հերթական պատվերը](https://jam-news.net/app/uploads/2022/07/YES_cheif_preparing-1024x683.jpg)
Յուրահատուկ բիզնես գաղափար