Ինտելեկտուալ խաղի աշխարհի չեմպիոնը գլխավորել է Ադրբեջանի Հանրային հեռուստատեսությունը
«Ի՞նչ, որտե՞ղ, ե՞րբ» ինտելեկտուալ խաղի աշխարհի առաջնության հաղթող Բալաշ Քասումովը դարձել է Եվրոպական հեռարձակողների խորհդրդի անդամ հանդիսացող Ադրբեջանի տեղեկատվական-ժամանցային Հանրային հեռուստաալիքի (ITV) գլխավոր տնօրեն
Ադրբեջանի İTV-ին հիմնադրվել է 2005թ. և ադրբեջաներեն հեռարձակվում է երկրի ողջ տարածքում: Ադրբեջանը հարավկովկասյան հանրապետություններից վերջինն էր, որտեղ ստեղծվեց Հանրային հեռուստատեսություն:Ադրբեջանում հանրային հեռուստատեսության հիմնադրման նախադրյալներից մեկն եղել է Եվրոպայի խորհրդի պայմանը, որին Ադրբեջանն անդամակցել է 2001թ.: Այդ ժամանակից ի վեր հեռուստաալիքի եթերում նախըտնրական քարոզարշավի ժամանակ անվճար եթերաժամանակ է տրամադրվում թեկնածուներին: Մի շարք թեկնածուների համար դա միակ հնարավորությունն է իրենց ծրագիրն ընտրողներին հասցնելու համար, քանի որ ընդդիմության ներկայացիչները գրեթե հնարավորություն չունեն երևալ այլ հեռուստաալիքների եթերում:
Քասումովի նշանակման մասին առաջին տեղեկատվությունը տարածվել էր դեռ մեկ ամիս առաջ և այդ ժամանակ բուռն քննարկում առաջացրել սոցցանցերում: Գլխավորապես որովհետև Բալաշ Քասումովը հայտնի կերպար է՝ ինտելեկտուալ և էրուդիտ, ուստի շատերը կարծում էին, որ նրա ղեկավարությամբ İTV-ն կդառնա շատ ավելի լավը:
Ահա թե ինչ էին ասում այդ առումով օգտատերերը.
«Ուրախ եմ Բալաշի համար, հիմա կսկսեմ դիտել İTV-ն»:
«Հույս է առաջացել, որ մենք հիմա կունենանք գոնե մեկ լավ հեռուստաալիք: Հաջողություններ նոր տնօրենին»:
«Հաջողություններ նրան, բարձր ինտելեկտի մարդ է, իհարկե, գլուխ կհանի»:
Մյուսները չէին կիսում այդ լավատեսությունը՝ ասելով, որ նոր տնօրենն ընդամենը ձևականություն է, և դա որևէ կերպ չի անդրադառնա հեռուստաալիքի վրա.
«Ի՞նչ կարող է փոխվել նրա ղեկավարության օրոք: Այն ամբողջությամբ ալիք-գրաքննություն է, մի՞թե ինտելեկտուալները կարող են հանդուրժել, երբ լիարժեք կերպով չեն կարողանում տնօրինել իրենց հոգու լարերը»:
Այդ վեճերի ամենաթեժ պահին լրագրողներն ուշադրություն են դարձրել այն հանգամանքի վրա, որ հեռուստաալիքի գլխավոր տնօրենին ընդհանրապես, ոչ թե նշանակում են, այլ ընտրում: Այսինքն, ըստ օրենքի, հեռարձակող խորհուրդը, որի մեջ մտնում է առնվազն 6 մարդ, պետք է քվեարկի յուրաքանչյուր առաջադրված թեկնածուի համար: Տվյալ դեպքում այդ ընթացակարգը գրեթե անտեսել են. Քասումովին նշանակման առթիվ սկսել են շնորհավորել քվեարկությունից առաջ (որի անհրաժեշտության վերաբերյալ մեծամասնությունը չէր էլ կասկածում): Արդյունքում, մեկ շաբաթ անց քվեարկություն, այնուամենայնիվ, եղել է: Բալաշ Քասումովը միանգամայն սպասելիորեն հաղթել է և հունիսի 1-ից արդեն պաշտոնապես և օրենքով գլխավորում է İTV-ն:
Եվս մեկ կողմնակի պատճառ կա, թե ինչու է այս իրադարձությունն իր վրա այսքան ուշադրություն սևեռել: Բալաշ Քասումովը «Ի՞նչ, որտե՞ղ, ե՞րբ»-ի արդեն երկրորդ գիտակն է, որը զբաղեցնում է ղեկավար պետական պաշտոն: Մինչ նա պաշտոնյայի կարիերա էր սկսել Միքայիլ Ջաբարովը, որը նախ գլխավորեց Կրթության նախարարությունը, իսկ վերջերս զբաղեցրեց Հարկերի նախարարի պաշտոնը: Այնպես որ սոցցանցերում սա շատ արագ կատակների առիթ դարձավ: Ի դեպ, Միքայիլ Ջաբարովը և Բալաշ Քասումովը զարմիկներ են:
Ինչ վերաբերում է İTV-ի նախորդ գլխավոր տնօրեն Ջամիլ Գուլիևին, ապա ասում էին, որ նա իր պաշտոնը կորցրել է «Եվրատեսիլում» Ադրբեջանի ձախողման պատճառով: Ամեն տարի հենց İTV-ն է զբաղվում այդ մրցույթի մասնակցի և երգի ընտրությամբ, և ինքն էլ հեռարձակում է այն: Այս տարի Ադրբեջանի ներկայացուցիչը չհայտնվեց եզրափակչում, և դրանում շատերը մեղադրում են հեռուստաալիքի ղեկավարությանը: Դրանից շատ չանցած՝ Ջամիլ Գուլիևը ազատվեց աշխատանքից: Ըստ պաշտոնական վարկածի՝ առողջական խնդիրների պատճառով:
Բալաշ Քասումովն արդեն հասցրել է հայտարարել հեռուստաալիքում սպասվող կադրային բարեփոխումների մասին:
Բալաքիշի (Բալաշ) Քասումիվը ծնվել է Բաքվում 1978թ. հոկտեմբերի 20-ին: Ավարտել է Ադրբեջանի պետական տնտեսագիտական համալսարանը: Գլխավորում է GameTV.az պրոդյուսերական կենտրոնը, Ադրբեջանից «Ի՞նչ, որտե՞ղ, ե՞րբ»-ի ամենահայտնի և հաջողակ գիտակներից է:
