Հայաստանի պաշտպանության նախարարի պաշտոնակատարը նոր կառավարության կազմում իրեն չի տեսնում
«Ես բացառում եմ իմ աշխատանքը նոր կառավարության կազմում»
Հայաստանի պաշտպանության նախարարի պաշտոնակատար Վիգեն Սարգսյանը կաշխատի այս պաշտոնում, քանի դեռ չի նշանակվել նոր նախարարը: Այս մասին Վիգեն Սարգսյանը հայտարարել է հայաստանյան լրատվամիջոցների հետ հանդիպման ժամանակ:
Նա ասել է, որ նոր ձևավորված թիմում իրեն չի տեսնում, որովհետև քաղաքական տարակարծություններ ունի նորընտիր վարչապետ Նիկոլ Փաշինյանի հետ.
«Ձևավորված թիմն առաջընթաց չի կարող ապահովել: Ես ունեմ քաղաքական հայացքներ, որոնք թույլ չեն տա այդ քաղաքական թիմում աշխատել: Որևէ բան չի կարող ինձ իմ պարտականություններից հետ պահել՝ մինչև չիմանամ, թե ով է ստանձնել այս պարտականությունները:
Այո, ես բացառում եմ իմ աշխատանքը նոր կառավարության կազմում, որովհետև ցանկացած նախարար վարձու աշխատող չէ: Նախարարը քաղաքական պաշտոն է, քաղաքական հայացքներ կան: Դժվար է լինել արդյունավետ նախարար, երբ նույն խնդրին չեք ծառայում»:
Վիգեն Սարգսյանն ասել է, որ ամեն ինչ կանի, որպեսզի այս պաշտոնում իրեն փոխարինող անձը հաջողի, կփոխանցի նոր պաշտոնյանին ողջ տեղեկատվությունը՝ 10 ժամանոց բրիֆինգի միջոցով:
«Տեղի ունեցածը հեղափոխություն չէ»
Վիգեն Սարգսյանն անդրադարձել է նաև հայաստանյան իրադարձություններին, ընդդիմադիր Նիկոլ Փաշինյանի ընտրությանը վարչապետի պաշտոնում: Նախարարի պաշտոնակատարն ասել է, որ տեղի ունեցածը հեղափոխություն չի համարում: Ըստ նրա, տեղի է ունեցել իշխանափոխություն:
Նա ասել է, որ ներկայումս Հանրապետական մեծամասնությունը կառուցողական ընդդիմություն է, և պետք է տեսնել, թե ինչպես է դա աշխատելու գործնականում։
«Սահմանում կուտակումները շարունակվում են»
Նորընտիր վարչապետ Նիկոլ Փաշինյանի նախաձեռնած վերջին մեկ ամսվա իրադարձությունները, որոնք թավշյա հեղափոխութուն կոչվեցին, զուգորդվել են սահմանային լարվածությամբ: Վիգեն Սարգսյանի խոսքով՝ լարվածությունը չի արտահայտվել կրակոցներով:
«Եղել են կուտակումներ, որոնք շարունակում են մնալ նույնը»,- ասել է նա:
Սարգսյանը շեշտել է, որ հայկական զինված ուժերը շարունակում են վերահսկել իրավիճակը, պատրաստ լինելով ցանկացած գործողությունների հակահարված հասցնել:
Վիգեն Սարգսյանի խոսքով՝ պետության ինստիտուտները զինված ուժերի հետ փոխկապակցելն անհրաժեշտություն է, հատկապես Հայաստանի նման երկրում, որտեղ ամեն 40-րդը զինվորական է:
«Մարդիկ պետք է հասկանան, թե ինչ է մեծ բանակը փոքր երկրում»,- ավելացրել է նա:
Նախարարի պաշտոնակատարը կարծում է, որ անվտանգությունը վերկուսակցական է, երկրի պաշտպանությունը մեկ կուսակցության կամ խորհրդարանական մեծամասնության գործառույթը չէ: