Աղմկոտ «մալուխային» գործով դատապարտվածներն ազատ կարձակվեն երկու ամսից

Պաշտպանության նախարարության՝ աղմկոտ «մալուխային գործով» դատապարտված նախկին պաշտոնյաներն ազատ կարձակվեն մոտ 2 ամիս անց: Վերաքննիչ դատարանն այսօր փոխել է մեղադրանքի որակավորումը՝ մսխման հոդվածը փոխարինելով պաշտոնեական դիրքի չարաշահման հոդվածով, հետևաբար կրճատելով դատապարտյալների ազատազրկման ժամկետները:

Պաշտպանության նախարարության 5 աշխատակիցներ ձերբակալվել են 2014թ-ի հոկտեմբերին 4 մլն լարիի մսխման մեղադրանքով: Նրանք մեղադրվում էին «Սիլկնետ» ինտերնետ-պրովայդերի օգտին պայմանագրի ապօրինի կնքման համար: Ձերբակալվածներն իրենց մեղքը չէին ընդունում: Դատարանը նրանց նախնական կալանք նշանակեց:

Պաշտպանության նախարար, Ազատ դեմոկրատներ կուսակցության առաջնորդ Իրակլի Ալասանիան հայտարարեց, որ իր աշխատակիցների ձերբակալումը քաղաքական ենթատեքստ է ունեցել: Դրանից հետո վարչապետն Ալասանիային հեռացրեց պաշտոնից: Ազատ դեմոկրատները լքեցին իշխող կոալիցիան և անցան ընդդիմության շարքերը:

Նախարարի պաշտոնները լքեցին նաև ԱԳ նախարար Մայա Փանջիկիձեն և եվրաինտեգրման հարցերով պետական նախարար Ալեքսի Պետրիաշվիլին:

2015թ-ի հունիսին քաղաքային դատարանը մեղադրյալներին ազատեց նախնական կալանքից Ազատ դեմոկրատների պատգամավորների երաշխավորմամբ: Սակայն 2016թ-ի մայիսին դատարանը բոլոր 5-ին 7 տարվա ազատազրկման դատապարտեց: Պաշտպանությունն այդ որոշումը բողոքարկեց վերաքննիչ դատարանում:

2016թ-ի հոկտեմբերի 8-ին կայացած խորհրդարանական ընտրություններից հետո, երբ Ազատ դեմոկրատները չկարողացան հաղթահարել 5 % շեմը, Իրակլի Ալասանիան հայտարարեց քաղաքականությունից հեռանալու մասին: Կուսակցությունը լքեցին ևս մի քանի առաջնորդներ: Նրանցից մեկը՝ Վիկտոր Դոլիձեն, ավելի ուշ նոր կառավարությունում եվրաինտեգրացիայի պետնախարար նշանակվեց, այդ հաստիքը ստեղծել էր իշխող «Վրացական երազանք» կուսակցությունը: