ԵՄ-ն կարող է պատժամիջոցներ սահմանել Վրաստանի իշխանամետ հեռուստաալիքների դեմ
ԵՄ պատժամիջոցները վրացական հեռուստաալիքների դեմ
«Ազատություն» ռադիոկայանը հայտնում է, որ Եվրամիության ներկայացուցիչներն առաջին անգամ քննարկել են Եվրոպական արտաքին կապերի ծառայության (EEAS) առաջարկը, այն է՝ պատժամիջոցներ սահմանել Վրաստանի երկու իշխանամետ հեռուստաալիքների՝ Imedi-ի և POSTV-ի նկատմամբ։ Բրյուսելը այս հեռուստաալիքներին մեղադրում է ռուսական քարոզչություն տարածելու մեջ։
Ենթադրվում է, որ պատժամիջոցները կներառեն այս հեռուստաալիքների ակտիվների սառեցում, ԵՄ տարածքում հեռարձակման լիցենզիաների կասեցում, ինչպես նաև հեռուստաալիքների սեփականատերերի համար վիզայի սահմանափակումներ։
Պատժամիջոցները կկարգավորվեն ԵՄ-ի կողմից սահմանված ռեժիմով, որն ուժի մեջ է մտել անցյալ տարի Ռուսաստանի հիբրիդային գործունեության դեմ պայքարի համար։
«Imedi հեռուստաալիքը համարվում է Վրաստանի ամենահայտնի հեռուստաալիքներից մեկը և պատկանում է բիզնեսմեն Իրակլի Ռուխաձեին, ով արդեն հայտնվել է Լիտվայի և Ուկրաինայի պատժամիջոցների տակ։ Transparency International-ը նախկինում ներկայացրել է ապացույցներ, որ հեռուստաալիքի ֆինանսավորմանը մասնակցում է իշխող «Վրացական երազանք» կուսակցության հիմնադիր Բիձինա Իվանիշվիլին»,- ասված է «Ազատություն» ռադիոկայանի հրապարակման մեջ։
Ռադիոկայանը պատմում է, որ 2025 թվականի հունվարին Եվրոպական արտաքին կապերի ծառայությունը (EEAS) փորձել է պատժամիջոցներ սահմանել նաև Վրաստանի խորհրդարանի պատգամավորների և Ներքին գործերի նախարարության բարձրաստիճան պաշտոնյաների դեմ։ Մասնավորապես՝ դա տեղի է ունեցել 2024 թ․-ի խորհրդարանական ընտրություններից և բողոքի ցույցերի ճնշումից հետո, սակայն նախաձեռնությունը արգելափակվել է Հունգարիայի և Սլովակիայի կողմից։
«Այս անգամ այս երկու երկրները Բելգիայի, Իտալիայի և Հունաստանի հետ միասին կրկին թերահավատորեն են տրամադրված։ Նրանք իրենց անհամաձայնությունն են հայտնում պատժամիջոցների հետ՝ պատճառաբանելով դա խոսքի ազատության սահմանափակմամբ և երկակի ստանդարտների սպառնալիքով։
Բալթյան երկրները, Լեհաստանը, Նիդերլանդներն ու Չեխիան աջակցում են պատժամիջոցներին։ Դեռևս սեպտեմբերին Չեխիան ազգային պատժամիջոցներ էր սահմանել Վրաստանի Ներքին գործերի նախարարի տեղակալ Ալեքսանդր Դարախվելիձեի, երեք դատավորների և մեկ դատախազի նկատմամբ։
ԵՄ-ի իրավաբանական ծառայությունը նշել է, որ EEAS-ի ներկայացրած ապացույցները դեռ չեն հաստատում Imedi-ի, POSTV-ի և ռուսական իշխանությունների միջև կապը, ուստի Բրյուսելը կշարունակի աշխատանքը լրացուցիչ նյութեր [ապացույցներ] հավաքագրելու ուղղությամբ»,— նշվում է հոդվածում։
«Ազատություն» ռադիոկայանի փոխանցմամբ՝ Ֆինլանդիան, Գերմանիան, Սլովենիան և Շվեդիան արդեն հայտնել են պատրաստակամություն՝ աջակցելու պատժամիջոցներին, իսկ Բուլղարիան, Ֆրանսիան և Ռումինիան նախատեսում են նախքան որոշում կայացնելը լրացուցիչ ուսումնասիրել հարցը։
Հետևեք մեզ — Facebook | Youtube
ԵՄ պատժամիջոցները վրացական հեռուստաալիքների դեմ
