Ադրբեջանում բանտարկված լրագրողի մայր. «Իմ դուստրը պետք է մահանա բանտո՞ւմ»
Ուլվիա Ալիի մայրը դիմել է օմբուդսմենին
Արդեն 23 օր է, ինչ Բաքվում ձերբակալված լրագրող Ուլվիա Ալիի (Գուլիևա) մայր Իլհամա Գուլիևան մտահոգված է դստեր առողջական վիճակով: JAMnews-ի հետ զրույցում նա հայտնել է, որ այս ամբողջ ժամանակահատվածում Ուլվիան դեռևս բժշկական զննություն չի անցել:
Ուլվիա Ալին բռնութան գործադրմամբ ձերբակալվել էր 2024 թվականի մայիսի 7-ի գիշերը Բաքվի ոստիկանության գլխավոր վարչության աշխատակիցների կողմից: Նույն օրը նրա տանն իրականացվել էր խուզարկություն, և Խաթայի շրջանային դատարանի որոշմամբ՝ նրա նկատմամբ որպես խափանման միջոց էր ընտրվել 1 ամիս և 29 օր ժամկետով կալանքը:
Ձերբակալության պահից ի վեր լրագրողը հայտարարում է իր ծանր վիճակի մասին: JAMnews-ի խմբագրություն ուղարկած նամակում նա գրում է, որ ձերբակալության ժամանակ իր նկատմամբ կիրառված բռնության հետևանքները պահպանվում են. «Ամեն օր գլխացավ, սրտխառնոց, գլխապտույտ, աչքերիս առաջ սևանում է: Կասկածում եմ, որ բռնության գործադրումից հետո իմ առողջությանը ավելի լուրջ վնաս է հասցվել»:
Իլհամա Գուլիևայի խոսքով՝ այս ժամանակահատվածում ինքը երեք անգամ բողոք է ներկայացրել օմբուդսմենի աշխատակազմ: Սակայն որևէ դիմումի պաշտոնական պատասխան չի տրվել: Վերջին հեռախոսազանգի ժամանակ նրան հայտնել են, որ «կպատասխանեն 15 օրվա ընթացքում»:
«Շտապ բժշկական օգնության կարիք ունեցող մարդուն ասել, որ պատասխանը կլինի 15 օր հետո՝ ծաղր է իմ, իմ դստեր, մարդկային կյանքի նկատմամբ: Իմ դուստրը պետք է մահանա բանտո՞ւմ»,— հարցնում է մայրը:
- Լրագրող Ուլվիա Ալին ձերբակալվել է. «Այժմ ավելի քան 20 լրագրող բանտում է, և ես նրանցից մեկն եմ»
- Ադրբեջանում 18 տարվա ազատազրկման դատապարտված հետազոտող. «Իմ սիրտն ազատ է»
- «Եվրոպան հրաժարվեց ռուսական նավթից, բայց ոչ դրա տրանզիտից». պատժամիջոցներ Ադրբեջանի նկատմամբ
Նախապատմություն
Ուլվիա Ալիի ձերբակալությունը դիտարկվում է որպես Ադրբեջանում անկախ լրագրողների նկատմամբ ուժեղացող ճնշման շարունակություն: 2024 թվականի դեկտեմբերին Meydan TV-ի նկատմամբ սկսված քննության շրջանակներում, որը ստացել է «Meydan TV-ի գործ» անվանումը, արդեն ձերբակալվել է ինը լրագրող:
Նրանք մեղադրվում են «մաքսանենգության» մեջ: Ձերբակալված լրագրողների թվում են Ռամին Դեկոն (Ջաբրայիլզադե), Այնուր Գյանբերովան (Էլգյունեշ), Այսել Ումուդովան, Այթակ Ահմեդովան (Թապդիկ), Խայալա Աղաևան, Նաթիկ Ջավադլին, Շամշադ Աղան, Նուրլան Լիբրեն և Ֆաթիմա Մովլամլին:
Meydan TV-ն հայտարարում է, որ այս ձերբակալություններն ուղղված են խմբագրության և նրա աշխատակիցների՝ քննադատական բնույթ ունեցող լրագրողական գործունեության դեմ:
Հետևեք մեզ — Facebook | Youtube | Telegram
Ուլվիա Ալիի մայրը դիմել է օմբուդսմենին
