Վրաստանի օմբուդսմեն. «Մանկական աղքատությունը երկրում աճել է 6%-ով»
Մանկական աղքատության աճ Վրաստանում
Վրաստանի մարդու իրավունքների պաշտպանի զեկույցի համաձայն՝ 2024 թվականին «Սոցիալապես խոցելի ընտանիքների միասնական տվյալների բազայում» գրանցված երեխաների թիվը նախորդ տարվա համեմատ աճել է 6,51%-ով: Զեկույցում նշվում է, որ աղքատությունը շարունակում է մնալ երկրի կարևորագույն խնդիրներից մեկը:
Զեկույցում նաև ասվում է, որ երեխաների իրավունքների հնարավոր խախտումների դեպքերի զգալի մասը, որ հետաքննվել է 2024 թվականին, կապված է եղել երեխաներ ունեցող ընտանիքների աղքատության և ծանր սոցիալ-տնտեսական վիճակի հետ:
«Ուշագրավ է, որ «Սոցիալապես անապահով ընտանիքների միասնական տվյալների բազայում» գրանցված մինչև 18 տարեկան երեխաների թիվը կազմում է 369.924 մարդ: Նրանցից 270.712-ը ստանում է նպաստ:
Բացի այդ, 4161 ընտանիք ներառվել է ճգնաժամային իրավիճակում գտնվող և երեխաներ ունեցող ընտանիքների օժանդակության պետական ենթածրագրում: Ուսումնասիրված դեպքերը ցույց են տալիս, որ կենտրոնացված ծրագրերից բացի ընտանիքների մեծամասնությունը նաև մասնակցում է տարբեր մունիցիպալ մակարդակի ծրագրերի:
Չնայած պետական աջակցությանը՝ օմբուդսմենի գնահատականը մեկ անգամ ևս հաստատում է, որ երկրում գործող սոցիալական պաշտպանության թիրախային՝ կենտրոնական և մունիցիպալ ծրագրերը լիարժեք չեն բավարարում բարդ սոցիալ-տնտեսական իրավիճակում գտնվող և երեխաներ ունեցող ընտանիքների կարիքները: Դա իր հերթին վտանգի տակ է դնում երեխաների բարեկեցությունը, առողջությունը, զարգացումն ու կյանքը:
Բացի այդ, չնայած մարդու իրավունքների պաշտպանի հանձնարարականներին, ծնողների և երեխաների խնամք իրականացնող անձանց հմտությունների զարգացումը, ընտանիքների համար ինքնուրույն կյանքի աջակցության մեխանիզմների ներդրումը և արդյունավետ սոցիալական աշխատանքի իրականացումը մնում են չլուծված խնդիրներ»,- ասված է օմբուդսմենի զեկույցում:
Հետևեք մեզ — Facebook | Youtube | Telegram
Մանկական աղքատության աճ Վրաստանում
