8 զոհ, 13 գերի, 24 անհետ կորած․ կողմերը՝ Հայաստանի և Ադրբեջանի սահմանին մարտերի հետևանքների մասին
Հայաստանի և Ադրբեջանի սահմանին նոյեմբերի 16-ին տեղի ունեցած մարտերի հետևանքով կողմերը կենդանի ուժի կորուստներ են կրել։ Արցախյան երկրորդ պատերազմից ի վեր ամենախոշոր բախումների հետևանքով զոհվել է ութ զինծառայող, 13-ը գերեվարվել է, 24-ը՝ անհետ կորել։ Մարտերը դադարեցվել են ռուսական կողմի միջամտությունից հետո։
Տեղեկություններ Երևանից
ՊՆ հաղորդագրությունը
Հայաստանի պաշտպանության նախարարությունը հաղորդում է, որ նոյեմբերի 17-ին ժամը 10։00-ի դրությամբ իրադրությունը արևելյան սահմանագոտում, «ուր տեղակայված հայկական դիրքերի վրա նախորդ օրը լայնածավալ հարձակում էին գործել Ադրբեջանի ԶՈւ ստորաբաժանումները, հարաբերականորեն կայուն է, կրակի դադարեցման պայմանավորվածությունը հիմնականում պահպանվում է»։
Ռազմական գերատեսչությունը հաղորդում է, որ նոյեմբերի 16-ի սրացման հետևանքով հայկական կողմից զոհվել է մեկ զինծառայող, 13-ը գերեվարվել է Ադրբեջանի կողմից, կապը կորել է 24 զինծառայողների հետ, որոնողական աշխատանքներ են ընթանում։ Ինչպես հաղորդվում էր նախօրեին, Հայաստանը մարտերի ընթացքում կորցրել է երկու մարտական դիրք, դրանք անցել են Ադրբեջանի վերահսկողության տակ։
ՊՆ-ն հաղորդում է նաև, որ ռուսական կողմի միջնորդությամբ ընթանում են բանակցություններ՝ ստեղծված իրավիճակի հանգուցալուծման և գերեվարված հայ զինծառայողների վերադարձի շուրջ։
ԱԳՆ հաղորդագրությունը
Նախորդ օրվա իրադարձությունների հետ կապված՝ Ռուսաստանին դիմելու առնչությամբ Հայաստանի ԱԳՆ մամուլի քարտուղարը հաղորդել է, որ անմիջական և բազմամակարդակ քննարկումներ են ընթանում։
Վահան Հունանյանը հիշեցրել է, որ նախօրեին տեղի է ունեցել Հայաստանի վարչապետի ու Ռուսաստանի նախագահի հեռախոսազրույցը, որի ընթացքում Նիկոլ Փաշինյանը Վլադիմիր Պուտինին է ներկայացրել իրավիճակը:
Այս համատեքստում «երկու երկրների ղեկավարները քննարկել են հնարավոր համատեղ քայլերը», որոնց իրականացումն ամրագրված է Հայաստանի և Ռուսաստանի միջև երկկողմ իրավապայմանագրային հենքով:
Մամուլի քարտուղարն անդրադարձել է նաև ՄԱԿ Անվտանգության խորհրդին դիմելու հարցին։ Վահան Հունանյանի խոսքով՝ Հայաստանի ԱԳՆ-ն արդեն իրազեկել է ՄԱԿ Անվտանգության խորհրդի նախագահին իրավիճակի մասին․
«Ցանկանում ենք նշել, որ Հայաստանի Հանրապետության տարածքային ամբողջականությունը և ինքնիշխանությունը պաշտպանելու համար դիտարկվում է միջազգային իրավունքի և դիվանագիտական պրակտիկայի բոլոր գործիքների կիրառումը»:
Տեղեկություններ Բաքվից
ՊՆ հաղորդագրությունը
Ադրբեջանի պաշտպանության նախարարությունը հաղորդել է նոյեմբերի 16-ի մարտերի ընթացքում տեղի ունեցած կորուստների մասին։
«Ադրբեջանական կողմից յոթ մարդ է զոհվել, ևս 10 զինծառայող վիրավորվել է», — ասված է պաշտպանական գերատեսչության հաղորդագրությունում։
Նոյեմբերի 16-ի երեկոյան Հայաստանի և Ադրբեջանի սահմանին տեղի ունեցած մարտերը կասեցվել են Ռուսաստանի պաշտպանության նախարար Սերգեյ Շոյգուի և Ադրբեջանի պաշտպանության նախարար Զաքիր Հասանովի միջև բանակցություններից հետո։
«Հեռախոսազրույցի ժամանակ Զաքիր Հասանովը նշել է, որ սահմանին Հայաստանի կատարած սադրանքները վճռականորեն կասեցվել են։ Սերգեյ Շոյգուն պատրաստակամություն է հայտնել ջանքեր գործադրել մարտական գործողությունների դադարեցման և իրավիճակի կայունացման համար», — ասված է Ադրբեջանի պաշտպանության նախարարության մամուլի ծառայության հաղորդագրությունում։
ԱԳՆ հայտարարությունը
Ադրբեջանի ԱԳՆ-ն հայտարարությամբ է հանդես եկել՝ սահմանային բախումների վերաբերյալ։
«Վերջին օրերին Հայաստանի կողմից նպատակաուղղված սադրանքներ են դիտվում։ Սա Հայաստանի ղեկավարության հերթական արկածախնդրությունն է։
Այսպես, Հայաստանի պաշտպանության նախկին նախարարի ապօրինի այցն Ադրբեջանի տարածք, որը ժամանակավորապես վերահսկվում է ռուս խաղաղապահների կողմից, և այնտեղ ռազմական խորհրդակցությունների անցկացումը, Հայաստանի Զինված ուժերի անձնակազմի շուրջ 60 տոկոսի կենտրոնացումը ճանապարհին, որը տանում է դեպի Լաչինի շրջանում ադրբեջանական բանակի դիրքեր, ինչպես նաև Հայաստանի Զինված ուժերի կողմից Քելբաջարի և Լաչինի շրջաններում ադրբեջանական բանակի դիրքերի ուղղղությամբ ինտենսիվ հրաձգությունը վկայում է այն մասին, որ հայկական կողմը նպատակաուղղված կերպով սրում է իրավիճակը։
Սա վկայում է այն մասին, որ Հայաստանը շահագարգռված չէ տարածաշրջանում խաղաղության և անվտանգության ապահովմամբ, ինչպես նաև Ադրբեջանի հետ սահմանազատման հարցում։ Ընդգծենք, որ լարվածությունը տարածաշրջանում Հայաստանի հերթական ռազմաքաղաքական սադրանքն է։ Ներկա լարվածության համար հիմնական պատասխանատվությունը կրում է Հայաստանի ռազմաքաղաքական ղեկավարությունը», — ասված է Ադրբեջանի արտաքին քաղաքական գերատեսչության հայտարարությունում։
