3 տարի անազատության մեջ գտնվելուց հետո ազատամարտիկը կառավարության շենքի առջև նստացույց է սկսել
3 տարի, 8 ամիս անազատության մեջ գտնված ազատամարտիկ, պահեստազորի գնդապետ Վոլոդյա Ավետիսյանն այսօր ազատ է արձակվել համաներման շնորհիվ: Քրեակատարողական հիմնարկից դուրս գալուց հետո վերջինս շտապել է ոչ թե տուն, այլ ՀՀ կառավարության շենք, որտեղ նա հայտարարել է, որ անժամկետ նստացույց է սկսում:
Պահեստազորի գնդապետ Վոլոդյա Ավետիսյանը մի քանի տարի առաջ ազատամարտիկների սոցիալական վիճակի բարելավման պահանջով հանրահավաքային պայքար ծավալելուց հետո 2013 թ.-ի սեպտեմբերին խարդախության մեղադրանքով կալանավորվեց, ապա հաջորդ տարվա ամռանը դատապարտվեց 6 տարվա ազատազրկման: Ավետիսյանը և նրա պայքարի ընկերները պնդում են, որ իշխանությունները «շինծու քրեական գործ» հարուցեցին ու փորձեցին մեկուսացնել նրան պայքարից:
Վոլոդյա Ավետիսյանը վստահեցրել է, որ շարունակելու է պայքարել ոչ միայն ազատամարտիկների իրավունքների, այլև դատապարտյալների իրավունքների պաշտպանության համար:
Նա նշել է, որ նստացույցի միջոցով նպատակ ունի Հայաստանը օրենքի երկիր դարձնել. «Հայաստանում օրենք չի գործում: Սևով սպիտակի վրա օրենք է գրված, Ազգային ժողովի կողմից, նախագահի կողմից հաստատված, բայց դա չի գործում»:
Ազատամարտիկը կոչ է արել բոլորին միանալ իրեն՝ իշխանությանը հեռացնելու պահանջով:
