«Ոչ ոք չի կարող սպառնալ ՀՀ-ին»․ Փաշինյանը՝ ռուսաստանաբնակ հայ գործարարին
Սամվել Կարապետյանին կալանավորելու միջնորդություն
Հայաստանի Քննչական կոմիտեն ռուսաստանաբնակ հայ գործարար Սամվել Կարապետյանին կալանավորելու միջնորդություն է ներկայացրել դատարան։ Կարապետյանի դեմ քրեական վարույթ է նախաձեռնվել զանգվածային լրատվության միջոցով հարցազրույց տալու ընթացքում իշխանությունը զավթելուն, ՀՀ կառավարության լիազորություններին սահմանադրությամբ չնախատեսված եղանակով տիրանալուն ուղղված հրապարակային կոչ հնչեցնելու հիմքով։
Նախօրեին Սամվել Կարապետյանը հարցազրույց էր տվել, անդրադարձել եկեղեցի-իշխանություն հակասություններին և հայտարարել՝ ինքը եկեղեցու կողքին է, և, եթե քաղաքական գործիչներին չհաջողվի լուծել հարցը, իրենք իրենց ձևով կմասնակցեն «եկեղեցու դեմ արշավին»։ Այս հայտարարությունից հետո իրավապահները խուզարկություն էին սկսել գործարարի առանձնատանը, մի խումբ անձինք բերման էին ենթարկվել։
Վարչապետ Նիկոլ Փաշինյանի խոսքով՝ Կարապետյանի հայտարարությունը ոչ թե եկեղեցու, այլ Հայաստանի մասին էր։ Շեշտել է՝ երկրում տիրող ժողովրդավարությունը չպետք է նույնացվի թուլության հետ։
«Հայաստանի Հանրապետությունը ժողովրդավարական երկիր է, որտեղ յուրաքանչյուրն ունի կարծիք արտահայտելու, հավաքներ անցկացնելու, քաղաքական և հանրային կյանքին մասնակցելու իրավունք։ Բայց ՀՀ-ին սպառնալ որևէ մեկը չի կարող, ես ամենակոշտ և ամենակոպիտ միջոցները կձեռնարկեմ ցանկացած նման դեպքում»․- այսօր հայտարարել է վարչապետը։
Քաղաքագետ Ռոբերտ Ղևոնդյանի գնահատմամբ՝ գործ ունենք Ռուսաստանի կողմից Հայաստանի դեմ տարվող հիբրիդային պատերազմի հերթական փուլի հետ։
«Հստակ է, որ հիբրիդային պատերազմ է տեղի ունենում և այդ տրամաբանության շրջանակում փորձ է կատարվում բազմաթիվ ուղղություններով ՀՀ-ին հարվածներ հասցնել։ Ուղղություններից մեկն էլ հայկական արմատներ ունեցող ռուս օլիգարխներն են, այդ թվում՝ Կարապետյանը»,- JAMnews-ի հետ զրույցում նկատել է նա։
- Հավանակա՞ն, թե՞ ի սկզբանե ձախողված․ ՀՀ-ում քննարկվում է Փաշինյանի իմպիչմենտի հարցը
- «Նախկիններն ուզում են ցույց տալ, թե մենք էլ ենք իրենց պես թալանչի»․ Փաշինյան
- «Դո՛ւրս Հայաստանից»․ Երևանում Վալենտինա Մատվիենկոյին դիմավորեցին բողոքի ակցիայով
- Լավրովի այցը Երևան. ավանդական ծրագիր և ոչ ավանդական ընդունելություն
Գործարարը չի ընդունում մեղադրանքը։ Ի՞նչ պատիժ է նախատեսում օրենքը
Կարապետյանի փաստաբանները լրագրողներին հայտնել են՝ գործարարն իրեն առաջադրված մեղադրանքը չի ընդունում։ Փաստաբան Արմեն Ֆերոյանը մեղադրանքն ապօրինի է որակել։
«Իբր Սամվել Կարապետյանը հնչեցրել է իշխանությունը զավթելու հրապարակային կոչեր, որն իրականության հետ բացարձակ կապ չունի։ Ապօրինի մեղադրանք են առաջադրել»,- նկատել է Ֆերոյանն ու հավելել՝ յուրաքանչյուր անձ ինքնուրույն կարող է դիտել տեսանյութն ու գնահատել՝ «դա հանցագործությո՞ւն է, թե՞՝ ոչ»։
Փաստաբաններից Լիաննա Գասպարյանն էլ մանրամասնել է, որ մեղադրանքն առաջադրվել է քրեական օրենսգրքի 422-րդ հոդվածի 2-րդ մասով։
«Զավեշտալին այն է, որ նշված հոդվածը պատիժ է նախատեսում նաև այլընտրանքային ձևով, ինչպես նաև տուգանք պատժատեսակ, հանրային աշխատանքներ, հանդիսանում միջին ծանրության հանցագործություն։ Նման հոդվածով կալանքի միջնորդություն ներկայացնելը վկայում է այն մասին, որ այս ամբողջ գործընթացն ապօրինի է։ Մենք մեր բողոքներն են ներկայացնելու դատարաններում»,- նշել է Գասպարյանը։
JAMnews-ն ուսումնասիրել է Քրեական օրենսգրքի 422-րդ հոդվածն ու պարզել, որ դրա 2-րդ մասի համաձայն՝ եթե իշխանությունը զավթելուն, տարածքային ամբողջականությունը խախտելուն կամ սահմանադրական կարգը բռնի տապալելուն ուղղված հրապարակային կոչը արվել է՝ օգտագործելով հրապարակայնորեն ցուցադրվող ստեղծագործությունները կամ զանգվածային լրատվության միջոցները կամ տեղեկատվական կամ հաղորդակցական տեխնոլոգիաները, ապա այն պատժվում է՝
- տուգանքով՝ քսանապատիկից հիսնապատիկի չափով,
- կամ հանրային աշխատանքներով՝ հարյուր հիսունից երկու հարյուր յոթանասուն ժամ տևողությամբ,
- կամ ազատության սահմանափակմամբ՝ մեկից երեք տարի ժամկետով,
- կամ կարճաժամկետ ազատազրկմամբ՝ մեկից երկու ամիս ժամկետով,
- կամ ազատազրկմամբ՝ երկուսից հինգ տարի ժամկետով։
Փաշինյանը պնդում է՝ եկեղեցու թեման գործարարի համար «ծխածածկույթ է»
Լրագրողների հետ զրույցում վարչապետն ակնարկել է, որ Կարապետյանի հայտարարությանը պայմանավորված է «Հայաստանի էլեկտրական ցանցեր» ընկերության պետականացման գործընթացով։ Պնդել է՝ եկեղեցու թեման «ընդամենը ծխածածկույթ է»։ Գործարարին պատկանող «Տաշիր գրուպ» ընկերությունը ՀԷՑ-ը ձեռք է բերել 2016 թվականին։
Հանրային ծառայությունները կարգավորող հանձնաժողովն այսօր 10 միլիոն դրամ գումարի չափով տուգանել է ընկերությանը: ՀԾԿՀ-ից փոխանցում են՝ ՀԷՑ-ին տուգանել են արձանագրված տեխնիկական և առևտրային խախտումների համար։
Վարչապետը պատահական չի համարում, որ Կարապետյանը սկսեց ակտիվանալ և հայտարարություններ անել հենց այն ժամանակահատվածում, երբ կառավարության անդամները ստացան հանձնարարական՝ վերականգնել ՀԷՑ-ի կողմից ժողովրդին հասցված վնասները կամ պետականացնել կառույցը։
«Մեր մասնագետները քննարկում են, Ազգային ժողովում արդեն կա ՀԷՑ–ն ազգայնացնելու և կից օրենքներում փոփոխությունների նախագիծ»,- հայտարարել է Փաշինյանը՝ առանց մանրամասնելու, թե ինչ ընթացակարգով է կազմակերպվելու դա։
Վարչապետը չի բացառել, որ ՀԷՑ-ի աշխատանքի խափանումներն արվել և արվում են «Հայաստանում ներքին դժգոհություն գեներացնելու համար»։
«Պայքարելու եմ ողջ ուժով»․ Կարապետյան
Գործարարը արդեն երկու հայտարարություն է հրապարակել։
«Հայ ժողովրդի սրբությունների համար պայքարելու եմ իմ ողջ ուժով, ուր էլ լինեմ, ինչ էլ որ լինի։ Թույլ չեմ տալու, որ որևէ մեկը, իր որևէ նպատակ հետապնդելով, հոշոտի մեր սրբությունները»,- նախօրեին հայտարարել է նա։
Կարապետյանի բնորոշմամբ՝ իր շուրջ ծավալվող իրադարձությունները ցույց են տալիս «գործող իշխանության ողջ սնանկությունը»։ Ասել է նաև, որ երբեք չի հրաժարվել իր սկզբունքներից ու արժեքներից, որոնց «հիմքում՝ ինքը Հայաստանն է, անհուն հարգանքն ու սերը հայրենիքի, ավանդույթների, պատմության, եկեղեցու հանդեպ»։
«Վստահ եմ, որ համախմբվելու ենք ու կարողանալու ենք ելք գտնել մեր երկրի շուրջ ստեղծված ծանր իրավիճակից։ Աստծո օգնությամբ»,- դիմելով քաղաքացիներին՝ նկատել է նա։
Աջակցություն են հայտնել Մոսկվան, ՀՀ ընդդիմությունն ու Մայր Աթոռը
Ռուսաստանի ԱԳՆ խոսնակ Մարիա Զախարովան նկատել է՝ պատրաստ են անհրաժեշտ աջակցություն ցուցաբերել, որպեսզի Կարապետյանի բոլոր իրավունքները հարգվեն.
«Մոսկվան ուշադիր հետևում է Ռուսաստանի քաղաքացի Կարապետյանի շուրջ ստեղծված իրավիճակին, որին Երևանում սպառնում են գրեթե ձերբակալությամբ՝ տարօրինակ պատրվակներով»։
Հայաստանի երկրորդ նախագահ Ռոբերտ Քոչարյանի գլխավորած ուժի՝ «Հայաստան» խմբակցության պատգամավորները նույնպես հանդես են եկել հայտարարությամբ։ Նշել են, որ «ազգի մեծ բարերարը» պաշտպանել է Հայ առաքելական եկեղեցին, իսկ Փաշինյանը «հաշվեհարդար» է տեսնում նրա հետ՝ ուժային կառույցներին տալով «ապօրինի հրահանգներ»։
«Խստորեն դատապարտում ենք ակնհայտ քաղաքական շարժառիթներով պայմանավորված հետապնդումը։ Հորդորում ենք ՀՀ իշխանություններին անհապաղ դադարեցնել ապօրինի գործողությունները»,- ասված է Մայր Աթոռի տարածած հայտարարությունում։
«Չեմ բացառում, որ ՌԴ-ում կան հիբրիդային պատերազմի հետևում թաքնված շրջանակներ»․ վարչապետ
Հայաստանի վարչապետի փոխանցմամբ՝ ինքը փոխադարձ վստահության վրա հիմնված շատ սերտ աշխատանքային հարաբերություններ ունի Ռուսաստանի Դաշնության նախագահի և կառավարության ղեկավարի հետ․
«Ես չեմ կարող հավատալ, որ Կրեմլից կամ ՌԴ կառավարությունից կարող է Հայաստանի դեմ նման գործողություն տեղի ունենալ, բայց չեմ բացառում։ Մեծ է հավանականությունը, որ Ռուսաստանում, այնուամենայնիվ, կան որոշակի շրջանակներ, որոնք այս հիբրիդային գործողությունների և պատերազմի հետևում են կանգնած»։
Փաշինյանի համոզմամբ՝ նման շրջանակներ կան ոչ միայն Ռուսաստանում։ Կարծում է՝ Հայաստանն ունի բոլոր կարողություններն ու հնարավորությունները առկա հիբրիդային ռիսկերը կառավարելու համար։
ԱԱԾ պետի հրաժարական․ ո՞րն է պատճառը
Վաղ առավոտյան հաղորդվեց, որ վարչապետ Փաշինյանի որոշմամբ՝ Արմեն Աբազյանն ազատվել է ԱԱԾ տնօրենի պաշտոնից։ Ազատման պատճառը, սակայն, չի մատնանշվում։ Ինքը՝ Փաշինյանը, լրագրողների ասել է, թե Աբազյանը ԱԱԾ տնօրենի պաշտոնում էր գրեթե 5 տարի, ուստի ժամանակն է, որ «մի փոքր հանգստանա» լարված աշխատանքից հետո։
ԶԼՄ ներկայացուցիչները հետաքրքրվել են՝ արդյո՞ք Աբազյանին պաշտոնանկ անելը կապ ունի՞ Սամվել Կարապետյանի շուրջ ծավալվող իրադարձությունների հետ։
«Ընդհանրապես ԱԱԾ տնօրենի աշխատանքն առնչվում է գրեթե ամեն ինչի հետ, հատկապես նրա հետ, ինչ վերաբերվում է անվտանգությանը, այդ թվում՝ հիբրիդային անվտանգությանը»,- նկատել է նա։
Փորձագիտական կարծիք
Քաղաքագետ Ռոբերտ Ղևոնդյանի խոսքով՝ ռուսական կապիտալին տիրապետող որոշ անհատներ և քաղաքական ուժեր, որոնք ՀՀ-ում գործում են Ռուսաստանի շահերի տիրույթում, փորձել են և փորձում են քաղաքական դաշտում որոշակի իրավիճակ փոխել։
«Քանի որ դա չի ստացվում անել ժողովրդավարական ճանապարհներով, փորձ են կատարում կամ խոսում են այն մասին, որ դա կիրականացնեն այլ ճանապարհներով, ինչի մասին Սամվել Կարապետյանը հստակ հայտարարեց»,- մանրամասնել է նա։
Քաղաքագետի գնահատմամբ՝ նշված գործընթացում այդ քաղաքական ուժերը «պարազիտանում» են իշխանություն-եկեղեցի հակասության վրա, օգտագործում են եկեղեցին ՀՀ իշխանության նկատմամբ որոշակի քաղաքական առավելություն ձեռք բերելու համար։
Չի բացառում, որ Սամվել Կարապետյանն իր իսկ նախաձեռնությամբ է նման հայտարարություն արել։ Մյուս կողմից, նկատում է՝ դա համահունչ է պաշտոնական Մոսկվայի ցանկություններին, շահերին, ուստի պատահական չէ, որ ՌԴ-ից աջակցություն են հայտնում գործարարին։
Ընթացող գործընթացները Ղևոնդյանը դիտարկում է հիբրիդային պատերազմի շրջանակում և հավելում՝ Հայաստանը պետք է հստակ դիրքորոշում որդեգրի այդ հարցում՝ մինչև անգամ սահմանափակելով այդ գործընթացի մաս կազմող անձանց մուտքը ՀՀ․
«Այն մարդիկ, ովքեր ՀՀ քաղաքացիներ չեն և փորձում են օգտագործել իրենց դիրքը, հնարավորությունները, ռեսուրսները երկրի ներսում գործընթացների վրա հիբրիդային ազդեցություններ ունենալու համար, նրանց մուտքը պետք է արգելվի, ՀՀ-ում նրանց ռեսուրսները պետք է արգելափակվեն, որպեսզի հնարավոր չլինի օգտագործել»։
Կարծում է՝ նպատակահարմար կլիներ ուղղակի ՀՀ-ից ՌԴ աքսորել Կարապետյանին, իսկ Հայաստանում նրան հայտարարել անցանկալի անձ։ Շեշտում է՝ դա հնարավոր կլինի անել, եթե ՀԷՑ-ի պետականացման գործընթացը հաջող ընթանա։
JAMnews-ը քաղաքագետից հետաքրքրվել է հիբրիդային պատերազմի պայմաններում ինչպե՞ս պետք է Երևանը կառավարի առկա ռիսկերը։ Ղևոնդյանը պատասխանել է՝ պետք է արգելափակել ընդհանուր սփռման ռուսական ալիքների հեռարձակումը, դիվերսիֆիկացնել տնտեսությունը։ Ասում է՝ կառավարությունը ձեռնարկում է «փոքր քայլեր», բայց դրանք, որպես կանոն, կիսատ են մնում։
«ՀՀ պետականության, անկախության պահպանման նպատակով այդ գործողություններն անհրաժեշտություն են ոչ միայն 2026 թ․-ի ընտրությունների համատեքստում, այլև դրանից հետո»,- ամփոփել է փորձագետը։
Հետևեք մեզ — Facebook | Youtube | Telegram
Սամվել Կարապետյանին կալանավորելու միջնորդություն
