Բողոքի նոր ակցիաներ Ռուսաստանում՝ Նավալնիին ազատ արձակելու պահանջով։ Լուսանկարներ, տեսանյութեր
Ընդդիմության կալանավորված առաջնորդ Ալեքսեյ Նավալնիին ազատ արձակելու պահանջով բողոքի ակցիաներ են անցկացվել հունվարի 31-ին ողջ Ռուսաստանի տարածքում։
Իշխանությունները մոբիլիզացրել էին ոստիկանությունն ու Ռոսգվարդիան և զանգվածաբար ձերբակալում էին ցուցարարներին։
Ինչպես հաղորդում է ռուսական «Նովայա գազետա» պարբերականը, Մոսկվայի ժամանակով ժամը 16:40-ի դրությամբ երկրով մեկ ձերբակալվել է ավելի քան 3 հազար մարդ։
Ձերբակալվածների թվում են նաև լրագրողներ և ֆոտոլրագրողներ։
Մոսկվայում իշխանությունները նախապես փակել էին քաղաքի կենտրոնը․ մետրոյի կայարանները չէին աշխատում, այնտեղ թույլ չէին տալիս մուտք գործել ավտոտրանսպորտին և անգամ՝ հետիոտնին։
Ռուսական Ռոսկոմնադզոր գերատեսչությունը, որը պատասխանատու է հաղորդակցությունների համար, հայտարարություն է տարածել, որ բոլոր լրատվամիջոցները, որոնք «սխալ» տվյալներ կտարածեն բողոքի ակցիաների մասնակիցների թվի մասին, կտուգանվեն։
Մոսկվայում ցուցարարներն ուղևորվել են դեպի «Մատրոսսկայա տիշինա» բանտ, որտեղ կալանքի տակ է Նավալնին։
Այնտեղ ձերբակալվել են ակցիա շատ մասնակիցներ։
